Atĩĩa Ngelekanyʼo ya Athani—Nzevania
1 Kwaĩ mwaka ta wa 650 Yesũ atanamba kũsyawa. Ĩvindanĩ yĩu, ngai yeetawa Mbaali nĩyo yathaithawa kĩla vandũ mũsyĩnĩ wa Yuta. Mũsumbĩ Amoni ũla waĩ mũthũku aĩ anooawa, na Mũsumbĩ Yosia akambĩĩa kũsumbĩka e mũnini. (2 Mav. 33:21–34:1) Ĩvindanĩ yĩu, Yeova nĩwatũmĩie Nzevania kũtavanyʼa ũsilĩlo Wake. O na kau nĩvatonyeka Nzevania akethĩwa aĩ wa nyũmba ya kĩ-ũsumbĩ ya Yuta, ndaaola ũito wa ndeto sya Yeova sya ũsilĩlo kwelekela ũsumbĩki wa Yuta. (Nzev. 1:1; 3:1-4) O ta Nzevania, twaĩlĩte kwĩthĩwa na ũkũmbaũ na tũitata ũndũ tũtonya ngwatanĩo na andũ ma mũsyĩ ĩikatũsiĩĩe kũmũthaitha Yeova ũndũ vaĩle. (Mt. 10:34-37) Nĩ ũvoo mwaũ Nzevania watavanasya, na waĩ na mawumĩlo maũ?
2 Manthai Yeova: No Yeova weka ũtonya kũtangĩĩa andũ mũthenya wa ũthatu wake wavika. Nĩkyo kĩtumi Nzevania weeie andũ ma Yuta mamũmanthe Yeova, mamanthe ũlũngalu, na maimantha ũuu mũthenya ũsu ũtambĩte kũvika. (Nzev. 2:2, 3) O naitũ twaĩle kwĩka ũu ũmũnthĩ. O ta Nzevania nĩtwĩkĩaa andũ vinya mamũmanthe Yeova. Ĩndĩ o naitũ twaĩlĩte kũmũmantha na tũitwʼa vyũ kũlea ‘kwĩthyũũa na ĩtina na kũeka kũmũvikĩla Yeova.’ (Nzev. 1:6) Tũmũmanthaa Yeova kwa kwĩmanyĩsya Ndeto yake nesa na kũmũvoya atũtongoesye. Tũmanthaa ũlũngalu kwa kwĩthĩwa na mwĩkalĩle mũseo. Tũmanthaa ũuu kwa kwĩthĩwa na wĩnyivyo na kwa kũatĩĩa ũtongoi ũla tũnengawe nĩ ũseũvyo wa Yeova.
3 Mosyao Maseo: Ũkanyʼo wa ũsilĩlo ũla Nzevania waumisye nĩwathuthisye andũ amwe ma Yuta, na mũno mũno Yosia ũla wambĩĩie kũmũmantha Yeova e o mũnini. Ĩtina, Yosia nĩwoosie ĩtambya ya kũvetanga mĩvwʼanano ĩla yathaithawa nthĩ ĩsu. (2 Mav. 34:2-5) O na kau ũmũnthĩ mbeũ ya Ũsumbĩ ĩla tũvuĩaa nĩtonya kũvalũka ũtee wa nzĩa, mavianĩ, kana mĩwʼanĩ, ve imwe ivalũkaa mũthanganĩ mũseo na ikaumya ũsyao. (Mt. 13:18-23) Twĩ na mũĩkĩĩo kana Yeova akaendeea kũathima kĩthito kitũ kya kũvuĩa mbeũ ya Ũsumbĩ.—Sav. 126:6.
4 Andũ amwe ma Yuta moonaa Yeova ndakesa kwosa ĩtambya. Ĩndĩ Yeova nĩwaĩkĩĩthĩtye andũ onthe kana mũthenya wake mũnene waĩ vakuvĩ. (Nzev. 1:12, 14) Ala meevithĩte syĩtwanĩ ya Yeova nomo mesaa kũtangĩĩwa. (Nzev. 3:12, 17) Tũendeee ‘kũmweteela Yeova,’ ekai tũtanĩe kũmũthũkũma twĩ na ngwatanĩo vamwe na Aklĩsto ala angĩ!—Nzev. 3:8, 9.
[Makũlyo]
1. Kwailyĩ ata mũsyĩnĩ wa Yuta ĩla Nzevania waĩ mwathani, na atwiĩe ngelekanyʼo yĩva nzeo ũmũnthĩ?
2. Twaĩlĩte kwĩka ata nĩ kana twĩvithwa mũthenya wa ũthatu wa Yeova wavika?
3. Nĩkĩ twaĩlĩte kũendeea kwĩthĩwa na kĩthito nthĩnĩ wa ũtavanyʼa?
4. Nĩkĩ twaĩlĩte ‘kũmweteela Yeova’?