Atĩĩa Ngelekanyʼo ya Athani—Naumu
1. Ĩvuku ya Naumu yĩtũmanyĩsya kyaũ?
1 O tondũ Naumu wathanie, matialyo ma mũsyĩ wa Nineva maĩkĩĩthasya kana Yeova nũĩvanĩasya amaitha make, na kana ala monekaa me kaũ mwingĩ maitonya kũmũsinda. (Nau. 1:2, 6) Kũkunĩkĩla wathani wa Naumu nĩũtũtetheesya tũkwate maũndũ tũtonya kũtũmĩa ũtavanyʼanĩ.
2. Twĩkaa ata nĩ kana ũvoo witũ wĩthĩwe wĩ wa kwendeesya?
2 Kiakisya Andũ na Ũimanenga Wĩkwatyo: Ũkaema kũsoma ĩvuku ya Naumu nesa, no wone ta yĩwetete o ĩũlũ wa kwanangwa kwa mũsyĩ mũnene wa Asuli ũla weetawa Nineva. (Nau. 1:1; 3:7) Ĩndĩ kwa andũ ma Yeova, ũsu waĩ ũvoo mũseo. Naumu, ũla ĩsyĩtwa yake yonanasya “Mũkiakisya,” nĩwamaĩkĩĩthisye Ayuti kana mũmaitha woo aĩ vakuvĩ kwanangwa! O na ĩngĩ, nĩwasyokie amatavya kana Yeova nĩ “ngome yĩ vinya mũthenya wa thĩna.” (Nau. 1:7) Ĩla tũũtavanyʼa, o naitũ twĩthĩawa tũitavya andũ ũvoo mũseo na tũimekĩa vinya mamwĩkwatye Yeova.—Nau. 1:15.
3. Tũtonya kũtũmĩa ngelekanyʼo ata tũimanyĩsya o tondũ Naumu weekaa?
3 Tũmĩa Ngelekanyʼo: Yeova nĩwaveveeie Naumu athane kana Nineva ĩkaanangwa o tondũ mũsyĩ wa Thebes (No-amoni), ũla waĩ Misili, waanangiwe nĩ Aasuli. (Nau. 3:8-10) Ĩla tũũtavya andũ ĩũlũ wa mũminũkĩlyo wa walanyʼo ũũ mũthũku, no tũwete mawatho amwe ma Mbivilia ala monanĩtye kana Yeova nĩwĩanĩasya ndeto syake syonthe. Kwa ngelekanyʼo, ĩla Ambaviloni na Ametia mavithũkĩie mũsyĩ wa Nineva mwaka wa 632 Yesũ atanamba kũsyawa, mbua nene ĩla yauwie nĩyatumie Ũsĩ wa Itekeli ũtũla na wavalũkya ngalĩko ĩmwe ya ũkũta wa Nineva. Na ĩndĩ mũsyĩ wa Nineva wavithũkĩwa na waanangwa o tondũ Yeova wathanĩte.—Nau. 1:8; 2:6.
4. Tũtonya kũtavanyʼa kwa nzĩa ĩkũeleeka ata?
4 Neena kwa Nzĩa Ĩkũeleeka: Naumu aandĩkie ũvoo wake aeleetye maũndũ nesa. Ndeto syake syaĩ itonya kũeleeka mĩtũkĩ. (Nau. 1:14; 3:1) O ta Naumu, o naitũ twaĩlĩte kũelesya maũndũ kwa nzĩa yĩ laisi kũeleeka. (1 Ako. 14:9) Ĩla wathokea mũndũ ya mbee, mũelesye nesa kĩla kyatuma ũmũthokea. Ĩla ũũmanyĩsya andũ Mbivilia, matetheesye mamũĩkĩĩe Yeova na Ndeto yake na mayona ũndũ ũvoo ũla mekwĩmanyĩsya ũtonya kũmatetheesya mo ene.—Alo. 10:14.
5. Wathani wa Naumu ũtũĩkĩĩthasya kyaũ?
5 Ĩvuku ya Naumu nĩyonanĩtye nesa ũndũ Naumu waĩ na mũĩkĩĩo mũlũmu kana Yeova nĩwĩanĩasya ndeto syake. O ũndũ mũminũkĩlyo wa nthĩ ĩno ya Satani ũthengeee, nĩtũkwataa ũkiakisyo ndetonĩ ii mbeveee: “Thĩna ndũkokĩla ĩvinda ya kelĩ.”—Nau. 1:9.