Mbathi Nzaũ sya Kũmũtaĩa Yeova!
1 Ũmbanonĩ wa kĩla mwaka wa Watch Tower Bible and Tract Society of Pennsylvania ũla weekiwe Matukũ 4, Mwei wa 10, 2014, nĩkwatangaasiwe mũvango wa kũvĩndũa ĩvuku yitũ ya mbathi. Ũsu waĩ ũndũ wa kũtanĩthya mũno. Onthe ala moombanĩte nĩmalilikanilwʼe kana mbathi sitũ sya Ũsumbĩ nĩ sya vata mũno ũthaithinĩ.—Sav. 96:2.
2 No wĩkũlye, ‘Nĩkĩ ve vata wa kũvĩndũa ĩvuku yitũ ya mbathi?’ Ve itumi sya kwĩka ũu. Kĩtumi kya mbee, nũndũ nĩkwĩthĩawa na ũmanyi mweũ wa Maandĩko, ndeto imwe ila syĩ mbathinĩ sitũ nĩsyaĩle kũvĩndũwa. (Nth. 4:18) Kĩtumi kĩngĩ nĩ kana, ndeto imwe ila itũmĩĩtwe mbathinĩ sitũ syaumĩtwʼe Mbivilianĩ ya Tafsiri ya Ulimwengu Mpya (Kĩsũngũ) ĩla ya tene. Ndeto isu nĩsyaĩle kũvĩndũwa syosane na ndeto ila syĩ Mbivilianĩ ĩla nzaũ. Nũndũ kũvĩndũa ndeto isu nĩ wĩa mwingĩ mũno, mũvango wa kwongeleela mbathi ingĩ nini ĩvukunĩ yitũ nĩwĩkĩtwe.
3 No nginya tweteele ĩvuku yĩu yeũ yĩse kumwʼa nĩ kana twambĩĩe kũtũmĩa mbathi isu nzaũ? Aiee. Twĩ na ũtanu kũmũmanyĩthya kana mbathi imwe nzaũ nikwambĩĩa kwĩkĩwa Kĩsesenĩ kitũ kya jw.org ĩtina wa myei mĩvũthũ. Ĩla wathi mweũ waumwʼa, wathi ũsu ũkavangĩĩawa kwinwa mũthyanĩ wa Ũmbano wa Ũthũkũmi na ũkeethĩawa ũandĩkĩtwe “wathi mweũ.”
4 Ũndũ Tũtonya Kwĩmanyĩsya Mbathi Isu Nzaũ: Ti ũndũ wĩ laisi kwĩmanyĩsya wathi mweũ. Ĩndĩ o na vailyĩ ũu, twĩenda twinae maũmbanonĩ maitũ “vate kũkilya” o tondũ mũandĩki wa Savuli weekaa. (Sav. 30:12) Nĩ kana wĩmanyĩsye wathi mweũ, ĩka maũndũ aa maatĩĩe.
Ĩthukĩĩsye mavinda maingĩ ũndũ wathi ũsu ũkũnĩtwe na piano Kĩsesenĩ kitũ. O ũndũ weethukĩĩsya wathi ũsu mavinda maingĩ, nowʼo ũkaũlilikanaa.
Ĩmanyĩsye ndeto sya wathi ũsu, na ũisyĩkĩa kĩlĩkonĩ.
Ina wathi ũsu ũatĩanĩsye na piano. Ĩka ũu nginya ũũkwatye nesa.
Inai mbathi isu nzaũ ĩngĩ na ĩngĩ Ũthaithinĩ wenyu wa Mũsyĩ nginya mwĩthĩwe mũtonya kwina nesa.
5 Ĩvindanĩ yũkĩte, ĩla wathi mweũ ũvangĩĩwe kũminĩa Ũmbano wa Ũthũkũmi, kĩkundi kĩkambaa kwĩthukĩĩsya wathi ũsu savalĩ ũmwe. Ĩtina wa ũu, kĩkundi kĩkainaa wathi ũsu kĩatĩanĩsye na piano o tondũ kĩkaa ĩla kĩkwina mbathi ila ingĩ.
6 Ĩla tũkwina vamwe twĩ maũmbanonĩ maitũ, nĩtũtanĩaa kũtũngĩanĩa mawasya maitũ tũimũtaĩa Yeova. Kwoou, tũyaĩle kwĩthĩwa na kĩmanyĩo kya kumaalũkanga ĩvinda ya kwina.
7 Ve nzĩa ĩngĩ tũtonya kwonanyʼa kana nĩtwonaa mbathi syĩ sya vata. Ĩla twĩ na maũmbano manene, nĩvethĩawa na wini mbee wa kĩla kĩlungu kwambĩĩa. Mavinda elĩ kwa mwaka, ana-a-asa na eĩtu-a-asa meyumĩtye kuma isio syĩ kĩvathũkanyʼo nĩmeeyĩvĩaa kũthi Patterson, New York nĩ kana makatetheesye kũseũvya mbathi sya kũtũmĩa ũthaithinĩ. Kwoou, ĩla mwene kĩvĩla watũkũlya twĩkale nthĩ nĩ kana twĩthukĩĩsye kĩlungu kya wini kĩla kĩseũvĩtwʼe, twaĩlĩte kwĩka ũu. Kwĩka ũu nĩkũtũtetheeasya kũmbanyʼa ngoo sitũ kwondũ wa maũvoo ala mekumwʼa.—Esa. 7:10.
8 Mũthyanĩ wa maũmbano maitũ ũmũnthĩ, twĩina wathi mweũ ũla wĩ na kyongo “Ufalme Umeanza Kutawala—Na Uje!” Wathi ũũ, ũla waumiwʼe ũmbanonĩ wa kĩla mwaka ũla wĩla kwĩkwa, waseũviwʼe kwonanyʼa kana kuma Ũsumbĩ wa Ngai wambĩĩa kũsumbĩka, myaka 100 nĩ mĩthelu.
9 Vate nzika, mbathi ii nzaũ nĩ “maũndũ maseo” kuma kwa Yeova. (Mt. 12:35a) Ekai tũtwʼe kwĩmanyĩsya mbathi ii nzaũ na tũisinaa kuma ngoonĩ, tũimũtaĩa na kũmũkumya Ngai witũ!—Sav. 147:1.