Mĩio Ĩla Tũtũmĩaa Kũmanyĩsya Andũ
1. Atavanyʼa ma ũvoo mũseo maelekanĩtwʼe ata na mavundi?
1 Mavundi nĩmatũmĩaa mĩio yĩ kĩvathũkanyʼo. O na kau mĩio ĩmwe ĩtũmĩawa mavinda kwa mavinda kũtethya wĩa wa mwanya, mĩio ĩngĩ ĩtũmĩawa kĩla ĩvinda. Mavundi ala mesĩ wĩa nesa maitiaa mĩio ĩsu ĩtũmĩawa kĩla ĩvinda, na nĩyo methĩawa mesĩ kũtũmĩa nesa vyũ. Mbivilia yĩkĩĩte kĩla Mũklĩsto vinya eyumye ũtavanyʼanĩ na ayĩthĩwa e “mũtethya wa wĩa ũtasonokwʼa.” (2 Tim. 2:15) Nĩ mũio wĩva wa vata mũno katĩ wa mĩio yonthe ĩla tũtũmĩaa ũtavanyʼanĩ? Nĩ Ndeto ya Ngai, ĩla nĩyo tũtũmĩaa ‘kũtwʼĩkĩthya andũ amanyĩwʼa.’ (Mt. 28:19, 20) Kwoou, nĩtwaĩle kwĩthĩwa na ũtũĩka wa kũtũmĩaa ‘ũndũ vaĩle ndeto ya ũla wʼo.’ Ĩndĩ o na ũu wĩ o vo, ve mĩio ĩngĩ ya kũmanyĩsya tũtũmĩaa kĩla ĩvinda na kĩla Mũklĩsto nĩwaĩlĩte kũmanya ũndũ ũtonya kũmĩtũmĩa nesa kũmanyĩsya andũ ũwʼo.—Nth. 22:29.
2. Nĩ mĩio yĩva ya vata ĩla tũtũmĩaa kũmanyĩsya?
2 Mĩio Ĩla Tũtũmĩaa Mũno Kũmanyĩsya Andũ: Nĩ mĩio ĩngĩ yĩva twaĩle kũtũmĩa eka Mbivilia? Mũio ũla tũtũmĩaa mũno mũno kũmanyĩsya andũ Mbivilia nĩ ĩvuku Mbivilia Yo Ĩmanyĩasya Ata? Twamina kwĩmanyĩsya na mũndũ ĩvuku yĩu, tũtũmĩaa ĩvuku “Ĩyĩkalyei Ene Wendonĩ wa Ngai” nĩ kana tũmũmanyĩsye ũndũ waĩle kũtũmĩa myolooto ya Mbivilia thayũnĩ wake. Kwoou nĩtwaĩle kwĩthĩwa na ũtũĩka wa kũtũmĩa mavuku asu elĩ. O na ĩngĩ, ve mbulosua ingĩ syaĩle kũtũmĩwa ĩla tũũmanyĩsya Mbivilia. Kwa ngelekanyʼo, mbulosua Ũvoo Mũseo Kuma kwa Ngai! nĩ ĩmwe katĩ wa mĩio ĩla tũtũmĩaa mũno mũno kwambĩĩsya kwĩmanyĩsya Mbivilia na mũndũ. Kethĩwa kĩsio kitũ kĩ na andũ matesĩ kũsoma nesa, andũ tũte na mavuku maingĩ ma kĩthyomo kyoo kana andũ tũte na mavuku o na amwe ma kĩthyomo kyoo, no tũtũmĩe mbulosua Mwĩthukĩĩsye Ngai kana Mwĩthukĩĩsye Ngai Wĩkale Tene na Tene. Mũio wa vata wa kũmanyĩsya ũla tũtũmĩaa kwelekelya amanyĩwʼa ũseũvyonĩ nĩ mbulosua Naaũ Mekaa Kwenda kwa Yeova Ũmũnthĩ? O na ve vitio itũtetheeasya kũtwʼĩkĩthya andũ amanyĩwʼa ta Nĩkĩ Waĩle Kwĩmanyĩsya Mbivilia?, Nĩ Kyaũ Kĩendeeaa Nyũmbanĩ ya Ũsumbĩ?, na Je, Mungu Ana Jina? Nĩtwaĩle kwĩthĩwa na ũtũĩka wa kũtũmĩa mĩio ĩsu.
3. Ilungu sya ĩvinda yũkĩte nthĩnĩ wa Ũthũkũmi Witũ wa Ũsumbĩ ikatũtetheesya kwĩka ata?
3 Ĩvindanĩ yũkĩte, vakeethĩawa na ilungu nthĩnĩ wa Ũthũkũmi Witũ wa Ũsumbĩ ila ikatũtetheeasya kwĩthĩwa na ũtũĩka wa kũmanyĩsya tũtũmĩĩte mavuku ala twĩthĩawa namo. Twaendeea kũtũmĩa mĩio ĩsu nesa, tũkeethĩwa tũatĩĩe ũtao ũũ: “Ĩsũvĩe mwene, vamwe na momanyĩsyo maku. Ĩkalaa maũndũnĩ asu; nũndũ kwa kwĩka ũu ũkeetangĩĩa mwene na asu nao ala makakwĩwʼaa.”—1 Tim. 4:16.