‘Ũvoo Ũũ Mũseo Ũkatavanwʼa’!
1. Nĩ kyaũ kĩũtũĩkĩĩthya kana vai kĩndũ kĩtonya kũsiĩĩa wĩa wa kũtavanyʼa?
1 Vai kĩndũ o na kĩmwe kĩtonya kũmũsiĩĩa Yeova ndakeanĩsye kwenda kwake. (Isa. 14:24) O na kau Mũsili Ngiteoni e na aũme make 300 moonaa wĩ ũndũ wĩ vinya kũmasinda Amitiani ala maĩ na asikalĩ ma kaũ 135,000, Yeova amwĩie atĩĩ: ‘Ũkamatangĩĩa Isilaeli kuma kwʼokonĩ kwa Mitiani: Ndikũtũmĩte?’ (Asi. 6:14) Nĩ wĩa wĩva Yeova ũtetheeasya athũkũmi make meanĩsye ũmũnthĩ? Yesũ aisye atĩĩ: “Ũvoo ũũ mũseo wa ũsumbĩ ũkatavanwʼa nthĩ yonthe.” (Mt. 24:14) Vai mũndũ ũtonya kũsiĩĩa wĩa ũsu ũitethwʼa!
2. Nĩkĩ twaĩle kwĩthĩwa na mũĩkĩĩo kana Yeova akatetheesya kĩla ũmwe witũ ĩla wĩ ũtavanyʼanĩ?
2 Yeova Nũtetheeasya Kĩla Ũmwe Witũ: O na kau twĩ na mũĩkĩĩo kana Yeova nĩwathanĩte kana akatetheesya athũkũmi make me kĩkundi methĩwe na mosyao maseo, yo no twasye kana Yeova no atetheesye kĩla ũmwe witũ? Ĩvinda yĩmwe mũtũmwa Vaulo waĩ na vata mũnene, Yeova nĩwamũtetheeisye kwĩsĩla Mwana wake, Yesũ. (2 Tim. 4:17) O ta ũu, no twĩthĩwe na mũĩkĩĩo kana Yeova akatũtetheesya nĩ kana twĩanĩsye kwenda kwake.—1 Yoa. 5:14.
3. Yeova atũtetheeasya maũndũnĩ meva?
3 Mo maũndũ ala twĩkaa kĩla mũthenya nĩmatonya kwĩthĩwa matũvinyĩĩe ũkethĩa tũtiele na vinya mũnini kwondũ wa ũtavanyʼa? Mbivilia yaĩtye atĩĩ: “Nũmanengae vinya ala meũnyala.” (Isa. 40:29-31) Nĩwĩthĩwa ũkwatĩtwe nĩ ũvĩnganĩsya? Mbivilia ĩtwĩĩte atĩĩ: “Mwaũĩe Yeova mũio waku, nake akakũtwʼĩĩka.” (Sav. 55:22) Ve mavinda angĩ wĩthĩawa ũte na ũkũmbaũ? Ndeto ii no ikwĩkĩe vinya. “Enda, nakwa ngeethĩwa vamwe naku na kanywʼa waku.” (Kuma 4:11, 12) Kana no wĩthĩwe wĩ mũwau ũkethĩa ndũtonya kũtavanyʼa na kĩthito ũndũ wendaa? Manya kana Yeova nĩwendeeawʼa nue, na no aũtũmĩe o na wĩ na vinya mũnini weeyumya na ngoo yonthe.—1 Ako. 3:6, 9.
4. Kwĩthĩwa na mũĩkĩĩo kana Yeova akatũtetheesya kũtonya kũtũtethya ata?
4 Kwʼoko kwa Yeova ‘nĩkũtambũũku, na nũũ ũla wĩkũluta?’ (Isa. 14:27) Nũndũ twĩ na mũĩkĩĩo kana Yeova akatũtetheesya ũthũkũminĩ witũ, ekai tũtwʼe kũendeea kũtavanyʼa na kĩthito, ‘tũineena na ũkũmbaũ nthĩnĩ wa Mwĩaĩi.’—Meko 14:3.