Ũndũ Tũtonya Kũtũmĩa Syĩndũ Ila Ilekotiĩtwe
1. O na kau nĩtwĩthĩawa na mavuku maandĩke, nĩ kĩndũ kĩngĩ kĩva tũtonya kũtũmĩa kĩkatũtethya?
1 Andũ aingĩ nĩmendete kũtũmĩa Kĩsese kya jw.org kũsoma ndeto syĩ mũyo na sya wʼo. (Mũta. 12:10) Ĩndĩ we nũtũmĩaa syĩndũ ila ilekotiĩtwe syĩ kĩsesenĩ kĩu? Syĩndũ isu ilekotiĩtwe nitumaa twĩthukĩĩsya ũvoo mwingĩ ũla wĩ kĩsesenĩ kitũ. Syĩndũ isu itonya kũtũtethya ata?
2. Tũtonya ata kũtũmĩa syĩndũ ila ilekotiĩtwe nĩ kana itwake na iyaka andũ ma mũsyĩ witũ ĩla tũkwĩmanyĩsya?
2 Ĩla Tũkwĩmanyĩsya Kana Twĩ na Ũthaithi wa Mũsyĩ: Kwĩthukĩĩsya Mbivilia, makaseti, kana mavuku angĩ ala malekotiĩtwe ĩla twĩ savalĩnĩ, kana tũkwĩka o maũndũ ma kĩla mũthenya, no kũtũtetheesye tũkatũmĩa ĩvinda yitũ nesa. (Aev. 5:15, 16) O na no twaĩlangye ũthaithi witũ wa mũsyĩ kwa kwĩthukĩĩsya ĩvuku yĩla yĩlekotiĩtwe na tũisianĩsya na yĩla ĩtumbĩthye. Kwĩthukĩĩsya syĩndũ ila ilekotiĩtwe ĩla tũkwĩmanyĩsya Mbivilia no kũtũtetheesye, na mũno mũno ethĩwa twĩenda kwaĩlangya ũndũ tũsomaa, kana ĩla tũkwenda kwĩmanyĩsya kĩthyomo kĩngĩ.
3. Nĩ andũ meva kĩsionĩ kitũ matonya kũtetheka nĩ syĩndũ ila ilekotiĩtwe?
3 Ũtavanyʼanĩ: Kĩsionĩ kitũ nĩtũtonya kũkomana na andũ matethĩawa na ĩvinda ya kũsoma mavuku maitũ, ĩndĩ no mendeewʼe mũno nĩ kwĩthukĩĩsya syĩndũ ila ilekotiĩtwe. Kana ethĩwa ti ũu, no tũkomane na mũndũ ũneenaa kĩthyomo kĩngĩ, na tũyona atonya kwendeewʼa eethukĩĩsya ũvoo mũseo wa Ũsumbĩ kwa “kĩthyomo kyake mwene.” (Meko 2:6-8) Isionĩ imwe kwĩthukĩĩsya nĩ ũndũ wa vata mũno. Kwa ngelekanyʼo, mbaĩ ya Hmong ĩtavasya syana syoo maũndũ ala meekĩkie ĩvindanĩ ya tene, na nililikanaa mũno maũndũ ala syatavwʼa. Andũ aingĩ ma Africa nĩmendete kwĩmanyĩsya maũndũ kwa kwĩthukĩĩsya ngewa.
4. Nĩ makũlyo meva tũtonya kwĩkũlya ĩũlũ wa kũtetheesya andũ kĩsionĩ kitũ?
4 Kĩsionĩ kitũ, andũ no matetheke ĩla twamathaũkĩa kĩndũ kĩlekotiĩtwe kwa kĩthyomo kyoo? Mũndũ no atetheke tũkamũtũmĩa simũnĩ kana o kombiũtanĩ yake ĩvuku ĩlekotiĩtwe? Nĩvatonyeka tũkaumya ĩvuku ĩlekotiĩtwe na tũiyĩkĩa nthĩnĩ wa CD nĩ kana tũtwaĩe mũndũ ũkwendeewʼa, na vatonyeka tũimũnenganĩsya vamwe na ĩvuku yĩla ĩtumbĩthye? Kĩndũ kyonthe kĩlekotiĩtwe kĩla twanenga mũndũ ũtavanyʼanĩ, kĩthĩwe nĩ ĩkaseti, ĩvuku, mbulosua, kana tulakiti no kĩtalwe ĩla tũkumya livoti. Syĩndũ ila ilekotiĩtwe syĩ kĩsesenĩ iseũvĩtwʼe nĩ kana itũtetheesye ĩla tũkwĩmanyĩsya Mbivilia na ĩla tũũtavanyʼa.—1 Ako. 3:6.