Manyĩsya Ũla Wʼo

Kwambĩĩa Mwei wa 9, Kavuku ka Kwĩmanyĩsya ka Ũmbano kakeethĩawa na kĩlungu kyeũ kyonanĩtye ũndũ tũtonya kũtavanyʼa. Kyongo kya kĩlungu kĩu nĩ “Manyĩsya Ũla Wʼo.” Kĩeleelo kitũ kĩkeethĩawa ne kũmanyĩsya ũwʼo wa mũsingi ũla wĩ Mbivilianĩ tũtũmĩĩte ĩkũlyo na ĩandĩko.

Twamanya kana mũndũ nĩwendeewʼa, no twĩke mũvango wa kũmũsyokea kwa kũmũtiĩa tulakiti, kũmũnenga ĩvuku kana o ĩkaseti, kana kũmwonyʼa vitio kuma Kĩsesenĩ kya jw.org. Twaĩle kũtata vyũ tũsyoke ĩtina wa mĩthenya mĩvũthũ nĩ kana tũendeee kũneenea maũndũ ala tũneemanyĩasya. Nzĩa ĩsu nzaũ ya kũtavanyʼa vamwe na maũvoo ma amanyĩwʼa makeethĩawa maumĩte ilungunĩ ila syĩ nthĩnĩ wa ĩvuku Mbivilia Yo Ĩmanyĩasya Ata? Tũkeethĩawa tũtonya kũkwata makũlyo na maandĩko angĩ ilungunĩ isu ala makatũtetheeasya kũsyokea mũndũ na kwĩmanyĩsya Mbivilia nake tũtũmĩĩte Mbivilia yĩ yoka.

Nzĩa ĩla ĩelete thayũnĩ no ĩmwe. (Mt 7:13, 14) Nũndũ tũneenaa na andũ ma ndĩni syĩ kĩvathũkanyʼo na maeetwe kwa nzĩa syĩ kĩvathũkanyʼo, no nginya tũnyuve kyongo kĩla kĩũtuma mũndũ endeewʼa nĩ ũwʼo wa Mbivilia. (1Tim 2:4) O ũndũ tũendeee kũmanyĩa kũtũmĩa momanyĩsyo me kĩvathũkanyʼo kuma Mbivilianĩ ĩla twĩ ũtavanyʼanĩ, na o ũndũ tũendeee kwĩthĩwa na ũmanyi mwingĩ wa kũtũmĩa ‘ũndũ vaĩle ndeto ya ũla wʼo,’ nowʼo ũtanu witũ ũkongeleka na tũyona mosyao ma kũmanyĩsya ala angĩ ũwʼo.—2Tim 2:15.