Kũkeethĩwa Ũtanu Mwingĩ Nũndũ wa Matu Meũ na Nthĩ Nzaũ

Watho ũla Ngai wathanĩte wa kũtũngĩĩa maũndũ maseo ĩũlũ wa nthĩ, ũla wĩ ĩvukunĩ ya Isaia kĩlungu kya 65 nĩ wa wʼo nũndũ Yeova aũwetete ta weanĩie.

Yeova akoomba matu meũ na nthĩ nzaũ, na maũndũ ma mbee matikalilikanwa

65:17

Matu meũ nĩ kyaũ?

• Nĩ silikalĩ nzaũ ĩla ĩkatuma maũndũ mekĩka kwa nzĩa ya ũlũngalu ĩũlũ wa nthĩ

• Silikalĩ ĩsu yambĩĩie kũsumbĩka mwaka wa 1914 ĩla Klĩsto watwʼĩkie Mũsumbĩ wa Ũsumbĩ wa Ngai

Nthĩ nzaũ nĩ kyaũ?

• Nĩ andũ kuma nthĩ, ithyomo, na mbaĩ syĩ kĩvathũkanyʼo ala menyivĩasya silikalĩ nzaũ ya ĩtunĩ

Nĩ kwa nzĩa yĩva maũndũ ma tene matakalilikanwa?

• Maũndũ onthe ala matũũmĩasya ta mathĩna ma mwĩĩ, mawĩmakĩo, na mathĩna ma ngoonĩ maikethĩwa vo ĩngĩ

• Andũ ala aĩkĩĩku makatanĩa thayũ vyũ na makalilikanaa maũndũ maseo kĩla mũthenya