Tanĩaa Kũtavanyʼa Ũvoo Mũseo

Waaĩsa kwĩwʼa ũtavanyʼa wĩ vinya? Aingĩ maitũ tũkakũlwʼa ũu twasya ĩĩ. Nĩkĩ? No kwĩthĩwa twĩthĩaa andũ matekwendeewʼa nĩ ũvoo witũ, kana matũmenete. O na no kwĩthĩwa tũkĩaa kũneena na andũ tũtamesĩ. Vate nzika maũndũ ta asu no matume ũtanu witũ ũoleka. Ĩndĩ o na vailyĩ ũu, ithyĩ tũthaithaa ũla “Ngai mũtanu” na endaa tũmũthũkũme twĩ atanu. (1Tim 1:11, NWT; Sav 100:2) Twĩ na itumi syĩva itatũ sya kũtanĩa ũtavanyʼa?

Mbee vyũ, tũtavanasya ũvoo ũnengae andũ wĩkwatyo. O na kũtwʼĩka andũ aingĩ ũmũnthĩ nĩmaendeee kwasya wĩkwatyo, no tusũsye ngoo syoo na “ũvoo mũseo wa maũndũ maseo.” (Isa 52:7) Ĩndĩ ũvoo mũseo wa Ũsumbĩ wa Ngai no ũtũnenge ũtanu o naitũ. Kwoou ũtanamba kumaala ũkatavanyʼe, sũanĩa moathimo ala Ũsumbĩ wa Ngai ũkaete kũũ nthĩ.

Kelĩ, ũvoo ũla tũtavanasya nũtumaa andũ maendeea nesa kĩ-mwĩĩ na kĩ-veva. Nĩmemanyĩasya kũekana na imanyĩo ite nzeo, na mayĩthĩwa na wĩkwatyo wa thayũ ũtathela. (Isa 48:17, 18; Alo 1:16) Kwa tũsũanĩe tũnengetwe wĩa wa kũmantha andũ maũmĩĩte mũisyonĩ na kũmatetheesya. O na kau nĩvatonya kwĩthĩwa ve amwe matekwenda kũtetheewʼa, tũieka kũmantha ala mekwenda kũtetheewʼa.—Mt 10:11-14.

Ũndũ wa katatũ, ũla nĩwʼo wa vata vyũ, nĩ kana wĩa witũ wa kũtavanyʼa nũmũtaĩaa Yeova. Onaa wĩa ũsu tũtethasya wĩ wa vata mũno. (Isa 43:10; Aevl 6:10) O na nũtũnengae veva wake mũtheu nĩ kana twĩanĩsye wĩa ũsu. Kwoou mũvoye Yeova aũnenge ũtanu, ũla nĩ kĩlungu kĩmwe kya ũsyao wa veva mũtheu. (Aka 5:22) No tũmĩanĩsye na mathĩna ala matũkwataa twĩ ũtavanyʼa na tũitavanyʼa na ũkũmbaũ. (Meko 4:31) Na ĩndĩ tweeka ũu tũkatanĩaa vyũ wĩa witũ wa kũtavanyʼa o na andũ matwosa ata.—Esek 3:3.

SISYAI VITIO, KŨSOMA NA KŨVINDĨĨSYA KĨLA WASOMA NO KŨTŨNGE ŨTANU ŨLA WAĨ NAWʼO, NA ĨNDĨ MŨISŨNGĨA MAKŨLYO AA MAATĨĨE:

• Nĩkĩ twaĩle kwĩmanyĩasya nesa kĩla ĩvinda o na ethĩwa tũtũmĩaa masaa maingĩ ũtavanyʼa kĩla mwei?

• Tũtonya kũatĩĩa ngelekanyʼo ya Mary ata?

• We wosaa ĩvinda ya kũvindĩĩsya Ndeto ya Ngai ĩndĩĩ?

• Nĩ kyaũ kĩũtanĩthasya ĩla ũũtavanyʼa ũvoo mũseo?