MWĨKALĨLE WA AKLĨSTO
Tetea Myolooto ya Yeova ya Mwĩkalĩle
Yeova Ngai nĩwe ũtusaa nĩ mwĩkalĩle wĩva waĩle, na nĩ wĩva ũtaĩle. Kwa ngelekanyʼo, nĩwaĩtye kana mũtwaano ti ngwatanĩo ya kavinda, ĩndĩ ala matwaana maĩle kwĩkalanyʼa nginya kĩkwʼũ. (Mt 19:4-6, 9) Nũleanĩte na mĩkalĩle yonthe ĩkonanĩtye na ũlaalai. (1Ako 6:9, 10) O na nũnengete andũ make myolooto ya kũmatongoesya nthĩnĩ wa mĩkĩĩle na kwĩyanakavya ĩla ĩmavathũkanasya na andũ aangĩ.—Kũt 22:5; 1Tim 2:9, 10.
Ũmũnthĩ andũ aingĩ nĩmaleanĩte na myolooto ya Yeova. (Alo 1:18-32) Monaa maĩle kũatĩĩa kĩla kyendetwe nĩ andũ aingĩ maũndũnĩ ta mĩkĩĩle na kwĩyanakavya na mwĩkalĩle. Aingĩ makumasya mĩkalĩle yoo mĩvuku na matindĩaa kumanyʼa ala mate mĩtuo mĩthũku tamo.—1Vet 4:3, 4.
Ithyĩ, twĩ Ngũsĩ sya Yeova, nĩtwaĩle kũtetea na ũkũmbaũ myolooto ya Yeova ya mwĩkalĩle. (Alo 12:9) Twaĩle kwĩka ũu ata? Nĩ kwa kũtũmĩa ũĩ tũtavye angĩ kĩla Yeova wĩtĩkĩlĩtye. O na twĩkĩte ũu, no twaĩle kũatĩĩa vyũ myolooto ĩsu thayũnĩ witũ. Kwa ngelekanyʼo, ĩla tũũnyuva kĩla tũkwĩkĩa na ũndũ tũkwĩyanakavya, no twĩkũlye atĩĩ: ‘Motwi ala ngwĩka maũndũnĩ asu meonanyʼa nĩatĩĩaa myolooto ya Yeova-ĩ, kana nĩ ĩla ya nthĩ ĩno? Andũ masisya mwĩkĩĩle wakwa na ũndũ ngwĩyanakavya, nĩmambonaa ta nĩ Mũklĩsto ũmũkĩaa Ngai?’ Kana ĩla tũũnyuva ivĩndĩ kana sinema sya kwĩloela, no twĩkũlye atĩĩ: ‘We Yeova no etĩkĩlane na kĩndũ kĩĩ ngwenda kwĩloela? Nĩ mwĩkalĩle ũilyĩ ata ũũkumwʼa kĩvĩndĩnĩ kana sinemanĩ ĩla ngwĩloela? Kĩla ngũnyuva kwĩtanĩthya nakyo nĩkĩtonya kũtuma wĩthĩwa wĩ ũndũ wĩ vinya kũleana na mwĩkalĩle mũthũku? (Sav 101:3) No kĩluluutĩkye andũ ma mũsyĩ kana o angĩ?’—1Ako 10:31-33.
Nĩkĩ nĩ ũndũ wa vata mũno tũtetee myolooto ya Yeova ya mwĩkalĩle? Nũndũ o mĩtũkĩ Klĩsto Yesũ nũkwananga mbaĩ na aiveta ũthũku wʼonthe vyũ. (Esek 9:4-7) No ala mekaa kwenda kwa Ngai makatiwa. (1Yoa 2:15-17) Kwoou ekai tũtetee myolooto ya Yeova ya mwĩkalĩle nĩ kana ala mekwona mwĩkalĩle witũ mũseo mamũkumye Ngai.—1Vet 2:11, 12.
Mwĩkĩĩle wakwa wa ngũa na kwĩyanakavya kwakwa syonanasya nĩatĩĩaa myolooto yaũ?
SISYAI VITIO, ĨTHĨWA WĨ MŨNYANYA WA YEOVA—MŨNDŨŨME NA MŨNDŨ MŨKA NĨMO MAĨLE KŨTWAANA, NA ĨNDĨ MŨINEENEA MAKŨLYO AA MAATĨĨE:
Nĩkĩ nĩ ũndũ wa ũĩ kũatĩĩa myolooto ya Yeova thayũnĩ witũ?
Nĩkĩ asyai maĩle kwambĩĩa kũmanyĩsya syana syoo myolooto ya Yeova ya mwĩkalĩle kuma syĩ nini?
Nĩ kwa nzĩa yĩva amũika na ala akũũ matonya kũtetheesya andũ aangĩ matetheke nĩ wĩkwatyo ũla Ngai ũtũnengete?