We Nĩwonaa Ndaĩa sya Ngai Ila Itonekaa?

Yĩla wasisya ĩlaa yanake, ndata matunĩ, kana mũvaũũko wa kĩwʼũ, we nĩwonaa ũseo wa wũmbi wa Ngai? Wũmbi ũla ũtũthyũlũlũkĩte nũvuanasya nesa ndaĩa sya Yeova ila itonekaa. (Alo 1:20) Yĩla twavindĩĩsya ĩũlũ wa syĩndũ ila twene na metho maitũ, nĩtwonaa vinya wa Ngai, wendo, ũĩ, ũsili wa katĩ, na ũlau wake.—Sav 104:24.

We nĩ wũmbi wĩva wa Yeova ũwonaa kĩla mũthenya? O na ethĩwa wĩkalaa taoni, ndũlea kwĩthĩwa wonaa nyũnyi kana mĩtĩ. Yĩla twavindĩĩsya wũmbi wa Yeova nĩtũtethekaa mũno. Kwa ngelekanyʼo, ũu nũtumaa tũeka kwĩmakĩa mũno nũndũ wa mathĩna maitũ, na tũyendeewʼa nĩ kũia maũndũ ala ma vata mbee. O na ũu nũtumaa tũlũlũmĩĩlya mũĩkĩĩo witũ wa kana Yeova akatũsũvĩaa kĩla ĩvinda. (Mt 6:25-32) Ethĩwa wĩ na syana, itetheesye ivindĩĩsye mũno ĩũlũ wa ndaĩa sya Yeova. Kwĩmanyĩsya kumana na wũmbi kũkalũlũmĩĩlya ngwatanĩo yitũ na Mũmbi wa syĩndũ syonthe.—Sav 8:3, 4.

ĨLOELEI VITIO YĨ NA KYONGO, WŨMBI NŨMŨTAĨAA NGAI—KYENI NA MALANGI, NA ĨNDĨ MŨISŨNGĨA MAKŨLYO AA:

• Nĩ kyaũ kĩtũtetheeasya kwona malangi?

• Nĩ kyaũ kĩtumaa syĩndũ imwe syoneka syĩ na malangi me kĩvathũkanyʼo mũndũ aisisya kuma ngalĩko syĩ kĩvathũkanyʼo?

• Nĩkĩ twonaa malangi me kĩvathũkanyʼo matunĩ?

• Nĩ malangi meva ma wũmbi wa Yeova ũmonete vakuvĩ na mũsyĩ kwenyu?

• Nĩkĩ twaĩle kwosaa ĩvinda tũkavindĩĩsya ĩũlũ wa wũmbi ũla ũtũthyũlũlũkĩte?