No Umye Ĩvinda Kana Vinya Waku Kũmũthũkũma Yeova?

O tondũ mwathani Isaia wathanie, ĩvindanĩ yĩĩ nĩtũendeee kwona wongeleku mũnene mũno kĩlungunĩ kya ũseũvyo wa Yeova kya kũũ nthĩ. (Isa 54:⁠2) Na nũndũ wa wongeleku ũsu, ve na vata wa Nyũmba nzaũ sya Ũsumbĩ, Nyũmba sya Maũmbano Manene, na movisi ma ũvonge. Nyũmba isu syamina kwakwa, nĩsyaĩle kwĩkalaa iisũvĩwa, na ĩtina wa ĩvinda ingĩ nĩsyaĩle kũtũngĩĩwa. Kwoou, tũtonya kwĩka ata tũtũmĩe ĩvinda yitũ na vinya witũ kũmũthũkũma Yeova?

• No tũtetheesye yĩla kĩkundi kitũ kya ũtavanyʼa kĩvangĩĩwe kũthesya Nyũmba ya Ũsumbĩ

• No twĩyumye tũmanyĩwʼe ũndũ tũtonya kũsũvĩa Nyũmba yitũ ya Ũsumbĩ

• No tusũsye vomu yĩtawa, Ombi la Kujitolea Katika Kazi ya Usanifu na Ujenzi (DC-50), nĩ kana mavinda kwa mavinda tũkatetheeasya kwaka na kũsũvĩa myako ya Ũsumbĩ ĩla yĩ vakuvĩ na mũsyĩ kwitũ

• No tusũsye vomu yĩtawa, Ombi la Kuwa Mjitoleaji (A-19), na tũyĩyumya kũtetheesya kyumwa kĩmwe kana o mbingangĩ Mbetheli, kana o mwako ũngĩ wĩ kĩsionĩ kya ovisi witũ wa ũvonge

ĨLOELEI VITIO YĨ NA KYONGO, MŨVANGO ŨENDEEE KWĨKWA WA KWAKA MWAKO MWEŨ​—⁠KALUNGU KA VITIO, NA ĨNDĨ MŨISŨNGĨA MAKŨLYO AA:

• Kuma mwaka wa 2014, kwĩthĩĩtwe na wongeleku mwaũ ĩũlũ wa kũtũmĩa vitio maũmbanonĩ?

• Nĩ kana vitio iendeee kũseũvwʼa kwondũ wa ũthaithi, nĩ mũvango wĩva ũendeee kwĩkwa, na mwako ũsu ũvangĩĩwe kũkua ĩvinda yĩana ata?

• Andũ matonya kũtetheesya ata mwakonĩ ũsu?

• Ethĩwa nĩtũkwenda kũtetheesya mwako ũsu ũkakwa kĩsionĩ kya Ramapo, nĩkĩ twaĩlĩte kusũsya vomu (DC-50), na tũitetheesya wĩanĩ ũla Mũvĩa wa Kũvangĩthya na Kwaka Myako ya Ũsumbĩ ũendeesye kĩsionĩ kitũ?

• Nĩ kyaũ kĩkũĩkĩĩthya kana Yeova nũtongoesye mũvango ũsu?

• Tũtonya kwĩka ata tũtetheesye mũvango ũsu o na ethĩwa ithyĩ ene tũitonya kũthi ku tũkake?