Tetheesya Amanyĩwʼa ma Mbivilia Mevathane na Itindo Nthũku

Nĩ kana amanyĩwʼa ma Mbivilia methĩwe anyanya ma Yeova, no nginya manyuve atindanyʼa moo nesa. (Sav 15:1, 4) Atindanyʼa aseo makamatetheesya mekae maũndũ ala maĩlĩte.—Nth 13:20; lff ĩsomo ya 48.

Yĩla ũendeee kũtetheesya amanyĩwʼa maku maekane na itindo nthũku, ĩthĩwa na tei. No wĩthĩe ti laisi kwoo kũeka kũtindanyʼa na anyanyae moo ma tene. Kwoou, onanyʼa kana nũkwendeewʼa nĩ amanyĩwʼa maku ma Mbivilia o na mĩthenya ĩla mũte kwĩmanyĩsya. No wĩke ũu kwa kũmaandĩkĩa mesengyi, kũmakũnĩa simũ, kana o kũmathokea. O ũndũ maendeee kwĩka maendeeo, no ũmathokye makatũmĩa ĩvinda vamwe na andũ ma Ngai. Weeka ũu, vandũ va kwĩwʼa ta mekwasya anyanya, makaendeeaa kũkwata angĩ aingĩ. (Mko 10:29, 30) O naku ũkeethĩawa na ũtanu woona ũndũ athaithi ma Yeova maendeee kwongeleka.

ĨLOELEI VITIO TETHEESYA AMANYĨWʼA MAKU MA MBIVILIA MEVATHANE NA ITINDO NTHŨKU, NA MŨISŨNGĨA MAKŨLYO AA MAATĨĨE:

• Itindo nthũku nĩ kyaũ?—1Ko 15:33

• Rose esũanĩaa yĩla ana-a-asa mekwĩtanĩthya maũndũ methĩawa mailyĩ ata?

• Neeta amũtetheesya ata Rose atie kĩtindo kĩthũku na aikwata anyanya aseo?