Anyanyau Naaũ Isesenĩ sya Kũea Ngewa?

Mũnyanya aeleetwʼe ta “mũndũ ũlũmanĩtye na ũngĩ nũndũ nũmwendete, kana nũmũnengete ndaĩa.” Kwa ngelekanyʼo, ĩtina wa Ndaviti kũaa Ngoliathu, Yonathani na Ndaviti nĩmatumie ndũũ ngamu. (1Sa 18:1) Kĩla ũmwe aĩ na nguma syendeeasya ũla ũngĩ. Kwoou, nĩ kana mũndũ atwʼĩke mũnyanya wa ũngĩ no nginya amũmanye nesa. Kũmanya mũndũ nesa nĩkwendaa kĩthito na ĩvinda. Ĩndĩ, isesenĩ sya kũea ngewa nĩ laisi andũ kũkwata “anyanya”. Nũndũ nthĩnĩ wa isese isu andũ methĩawa mavangĩte kĩla matonya kũneena, na maeleasya o maũndũ ala mekwenda andũ ala angĩ mamanye ĩũlũ woo, wĩthĩaa nĩ laisi kwoo kũvitha ũndũ mo mailyĩ. Kwoou, nũseo ũkasũanĩa kwa ũito naaũ ũũmetĩkĩlya matwʼĩke anyanyau. Wakũlwʼa nĩ mũndũ ũtamwĩsĩ nesa mũtume ndũũ nthĩnĩ wa isese sya kũea ngewa, ndũkewʼe wĩa kũlea o na ethĩwa mũndũ ũsu nũkũũmĩa. Andũ amwe nĩmaekete kũtũmĩa isese sya kũea ngewa vyũ nũndũ wa mĩisyo ĩla ĩtonya kumĩla. O na ũu wĩ o vo, nĩ kyaũ waĩle kũlilikana yĩla watwʼa kũtũmĩa isese sya kũea ngewa?

ĨLOELEI VITIO, TŨMĨA NA ŨĨ ISESE SYA KŨEA NGEWA INDANETINĨ, NA ĨNDĨ MŨISŨNGĨA MAKŨLYO AA MAATĨĨE:

• 

  Nĩ maũndũ meva waĩle kwamba kũsũanĩa, ũtanamba kũandĩka kĩndũ kana kwĩkĩa visa isesenĩ sya kũea ngewa?

• 

  Nĩkĩ waĩle kwĩthĩwa wĩ metho yĩla ũũnyuva anyanyau nthĩnĩ wa isese sya kũea ngewa?

• 

  Nĩkĩ waĩle kwĩyĩkĩĩa mĩvaka ĩũlũ wa ĩvinda yĩla ũũtũmĩa nthĩnĩ wa isese sya kũea ngewa?—Aev 5:15, 16