Ũvainia

Twĩthĩawa tũitũmĩa vinya witũ nesa yĩla tweeyĩkĩĩa mĩvango ya kĩ-veva. (1Ko 9:26) Mĩvango ya kĩ-veva nĩtũtetheeasya kũtũmĩa ĩvinda yitũ nesa ĩvindanĩ yĩla yĩtiele mũminũkĩlyo ũtanavika. (Aev 5:15, 16) Ũthaithinĩ wenyu wa mũsyĩ, no mũneenee mĩvango ĩmwe ya kĩ-veva mũtonya kwĩyĩkĩĩa mwakanĩ wa ũthũkũmi ũla ũkĩte? Kavuku kaa ka kwĩmanyĩsya ka ũmbano ke na ilungu syonanĩtye mĩvango mĩna ya kĩ-veva ũtonya kwĩyĩkĩĩa, no ũmĩvindĩĩsye na ũivoya ĩũlũ wa ũndũ ũsu.—Yak 1:5.

Kwa ngelekanyʼo, mũsyĩ wenyu no wĩke mũvango nĩ kana ũmwe wenyu atwʼĩke vainia wa kĩla ĩvinda? Ethĩwa nũona ndũtonya kwĩanĩsya masaa ma vainia, no ũneene na mavainia ala maũndũ moo mavwʼanene na maku. (Nth 15:22) No ũthokye vainia ũmwe ũthaithinĩ wenyu wa mũsyĩ, na mũimũkũlya ũndũ wĩanĩasya ũthũkũmi wake. Na ĩndĩ ũiandĩka mĩvango yaku nesa. Ethĩwa waatwʼĩka vainia ĩvinda ĩvĩtu, sũanĩa kana maũndũ maku yu no makwĩtĩkĩlye kũtwʼĩka vainia ĩngĩ.

Nĩvethĩwa amwe nthĩnĩ wa mũsyĩ wenyu matonya kusũsya ũvainia mũtetheesya mwei ũmwe kana o mingangĩ? Ethĩwa ndwĩ na vinya mwingĩ, no ũtwʼĩke vainia mũtetheesya na ũitũmĩaa o ĩvinda ĩnini kĩla mũthenya kũtavanyʼa. Na ethĩwa wĩthĩawa na ĩvinda ĩnini ya kũthi ũtavanyʼa katĩ katĩ wa kyumwa nũndũ ũthũkũmaa kĩla mũthenya kana wĩthĩawa sukulu, no ũsisye mwei ũla wĩ na mĩthenya mũtaendaa wĩanĩ kana sukulu, kana ũkasisya mwei ũla wĩ na wikendi itano na ũyusũsya ũvainia. Kalendanĩ, andĩka nĩ ĩndĩĩ ũkenda kũtwʼĩka vainia mũtetheesya, na ũiandĩka ũndũ ũkeanĩsya ũthũkũmi waku.—Nth 21:5.

ĨLOELEI VITIO, ĨTHĨWA NA ŨKŨMBAŨ WĨ . . . VAINIA, NA ĨNDĨ MŨISŨNGĨA ĨKŨLYO YĨĨ:

• Yeova athĩnĩkĩie ata mwĩĩtu-a-asa Aamand, na kĩu kĩtũmanyĩsya kyaũ?