Makũlyo Kuma kwa Asomi Maitũ

“Ũsyao wa veva” no nguma ila iwetetwe nthĩnĩ wa Akalatia 5:22, 23 syĩ syoka?

Mĩsoa ĩsu ĩwetete nguma kenda sya Mũklĩsto. Yaĩtye: “Ũsyao wa veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, mũĩkĩĩo, ũuu, na kwĩsiĩĩa.” Ĩndĩ nguma isu ti syo syĩ syoka veva wa Ngai ũtũtetheeasya kwĩthĩwa nasyo.

Kwa sisya kĩĩ mũtũmwa Vaulo wawetie mĩsoanĩ ĩla yĩ ĩtina wa ĩsu: “Mawĩa ma mwĩĩ . . . nĩ ũlaalai, ũvuku, kwĩka maũndũ mavuku na ngũlũ, kũthaitha mĩvwʼanano, kũneenanyʼa na maveva, ũmaitha, ĩteta, kĩwĩu, mothilĩku, ngananĩo, mũaanĩko, mũtilĩkangano, kwĩwʼĩa angĩ woo, ũnywi, mboka itaĩle, na maũndũ angĩ ta asu.” (Aka. 5:19-21) Kwoou Vaulo aĩ atonya kwongeleela maũndũ angĩ matonya kwĩtwa “mawĩa ma mwĩĩ,” ta ala mawetetwe ĩandĩkonĩ ya Akolosai 3:5. O ta ũu, amina kũtalanyʼa nguma kenda nzeo aisye: ‘Kũi mwĩao kwa maũndũ ala mavwʼanene na asu.’ (The Bible in Kikamba, 1974) Kwoou, mĩsoanĩ ĩsu Vaulo ndaaweta nguma syonthe nzeo ila veva mũtheu ũtonya kũtũtetheesya twĩthĩwe nasyo.

Twĩelewa kĩu nesa twasianĩsya nguma isu na kĩla Vaulo waandĩkĩie kĩkundi kya Eveso. Aandĩkie: “Ũsyao wa kyeni wĩthĩawa na kĩla mũthemba wa ũseo na ũlũngalu na ũwʼo.” (Aev. 5:8, 9) Kwoou “ũseo,” vamwe na ũlũngalu na ũwʼo, nĩ kĩlungu kĩmwe kya “ũsyao wa kyeni,” na ũseo o ũsu no kĩlungu kya “ũsyao wa veva.”

O ta ũu, ĩvinda yĩmwe Vaulo eekĩie Timotheo vinya ethĩwe na nguma ii thanthatũ: “ũlũngalu, kĩkĩo kya Ngai, mũĩkĩĩo, wendo, wũmĩĩsyo, na ũuu.” (1 Tim. 6:11) Inya katĩ wa isu (mũĩkĩĩo, wendo, wũmĩĩsyo, na ũuu) no syo syĩ syoka iwetetwe ‘ũsyaonĩ wa veva.’ Ĩndĩ Timotheo nĩweesĩ kana veva o ũsu nowʼo ũtonya kũmũtetheesya akethĩwa na nguma isu ingĩ ilĩ, nasyo nĩ ũlũngalu na kĩkĩo kya Ngai.—Sianĩsya na Akolosai 3:12; 2 Vetelo 1:5-7.

Kwoou ĩandĩko ya Akalatia 5:22, 23 yĩiwetete nguma syonthe ila Mũklĩsto waĩlĩte kwĩthĩwa nasyo. Veva wa Ngai no ũtũtetheesye kwĩthĩwa na nguma isu kenda syĩtĩtwe “ũsyao wa veva.” Ĩndĩ ve nguma ingĩ twaĩlĩte kwĩthĩwa nasyo nĩ kana tũtwʼĩke Aklĩsto aima na mevwʼĩkĩte “mwĩkalĩle mweũ ũla woombiwe kwosana na kwenda kwa Ngai nthĩnĩ wa ũlũngalu wa wʼo na ũĩkĩĩku.”—Aev. 4:24.