Nĩkĩ Ngai Ũtasũngĩaa Mboya Syonthe?

Ĩthe witũ wa ĩtunĩ, Yeova Ngai, nĩwendaa tũmũvoye kuma ngoonĩ, na nũtanĩaa kũtwĩthukĩĩsya. Ĩndĩ ve maũndũ matonya kũtuma alea kũsũngĩa mboya sitũ. Nĩ maũndũ meva asu, na nĩ kyaũ twaĩlĩte kũlilikanaa yĩla tũũvoya? Ekai tũneenee myolooto ĩmwe yĩ Mbivilianĩ.

Andũ me kanisanĩ maivoya matũmĩĩte ĩvuku ya mboya.

“Mũkĩvoya mũikatũngĩlĩĩle ndeto o ila ila.”—Mathayo 6:⁠7.

Yeova ndendaa tũtindĩae kũtũngĩlĩĩla mboya kana kũisoma ĩvukunĩ ya mboya. Kĩvathũkanyʼo na ũu, endaa tũmũvoye kuma ngoonĩ. We ũtonya kwĩwʼa ata wĩ na mũnyanyau ũtindĩaa kũtũngĩlĩĩla ndeto o ila ila kĩla mũthenya? Vate nzika, ũndũ ũsu no ũũnosye. Anyanya ma wʼo maeaa ngewa kuma ngoonĩ na maivithanaa kĩndũ. Yĩla twavoya kuma ngoonĩ, twĩthĩawa tũyonanyʼa kana Ĩthe witũ wa ĩtunĩ nĩ mũnyanya witũ wa wʼo.

Mũndũ ũsyaĩtye ĩũlũ aendeee kũkulya kathangũ ka kũtha kyũthĩ.

“Yĩla mwavoya mũinengawe nũndũ mũvoyaa mwĩ na kĩeleelo kĩthũku.”—Yakovo 4:⁠3.

Tũyĩsa kwĩkwatya Ngai asũngĩe mboya sitũ twamũvoya syĩndũ twĩsĩ ndekwenda tũyĩthĩwa nasyo, kana twamũvoya ĩũlũ wa maũndũ ũtekwenda tũyĩka. Kwa ngelekanyʼo, we nũkwona Yeova ta wĩsa kũsũngĩa mboya ya mũndũ ũkũtha kalata, nake nũvatanĩte kwĩthĩwa na ĩtomo na kwĩkwatya ngai ya ĩvuso kana vaati? (Isaia 65:11; Luka 12:15) Tũyĩsa kwĩkwatya Yeova asũngĩe mboya ta isu. Nĩ kana Ngai asũngĩe mboya sitũ, no nginya tũĩkĩĩthye kana kĩla tũũvoya kyosanĩte na maũndũ ala ũtũtavĩtye Mbivilianĩ.

Mũtongoi wa ndĩni aendeee kũvoyea asikalĩ.

“Ũla ũthyũũaa kũtũ kwake ndakewʼe mĩao, o na mboya yake nĩ ũthatyo.”—Nthimo 28:⁠9.

Ĩvindanĩ ya tene, Ngai ndasũngĩaa mboya sya andũ ala maleaa kũkwata mĩao yake mĩlũngalu. (Isaia 1:15, 16) O na ũmũnthĩ, Ngai ndaalyũka. (Malaki 3:⁠6) Kwoou ethĩwa nĩtũkwenda asũngĩe mboya sitũ, no nginya tũkwate mĩao yake. Nao nata ethĩwa ĩvinda ĩvĩtu nĩtweekie maũndũ maleanĩte na mĩao yake? Ũu nĩ kwasya kana Yeova ndakesa kũtwĩthukĩĩsya? Aiee. Tweelila nũndũ wa maũndũ asu mathũku tweekie na tweekĩa kĩthito tũmwendeesye, kwa wʼo Ngai nũtũekeaa.—Meko ma Atũmwa 3:⁠19.

“Mũndũ o na wĩva ũla ũmũthengeeaa Ngai no nginya aĩkĩĩe kana e kwʼo na nũmanengae ĩtuvi ala mamũmanthaa na kĩthito.”—Aevelania 11:⁠6.

Tũivoyaa nĩ kana o twĩwʼe kavaa yĩla twĩ na maũndũ meũtũthĩnyʼa. Ĩndĩ twĩkaa ũu nĩ kana tũĩkĩĩthye Ngai kana nĩtũmũĩkĩĩte, nĩtũmũnengete ndaĩa, na nĩtũmwendete. Mũmanyĩwʼa Yakovo aĩtye kana twaĩle ‘kũvoya twĩ na mũĩkĩĩo,’ nũndũ twaema kwĩka ũu, ‘tũyaĩle kũsũanĩa kana nĩtũtonya kũkwata kĩndũ o na kĩmwe kuma kwa Yeova.’ (Yakovo 1:6, 7) Nĩ kana tũmũĩkĩĩe Ngai mũnango, no nginya twĩkie kĩthito tũmanthe ĩvinda ya kũsoma Mbivilia nĩ kana tũmũmanye. Kwĩka ũu kũkatũtetheeasya tũmanye kwenda kwake, na kũituma tũĩkĩĩa vyũ kana nũtwĩthukĩĩasya.