Waĩle Kũvoya Ata Nĩ Kana Wĩwʼĩke Nĩ Ngai?

MŨVOYE YEOVA KWĨSĨLA ĨSYĨTWA YA YESŨ

“Kĩndũ o na kĩva kĩla mwĩvoya Asa ĩsyĩtwanĩ yakwa, akamũnenga.”​—Yoana 16:⁠23.

Ndeto sya Yesũ syonanĩtye ũtheinĩ kana Yeova ndendaa tũmũvoye kwĩsĩla mĩvwʼanano, atheu, alaĩka, kana aa-ũmae maitũ ala makwie. Vandũ va ũu, twaĩle kũmũvoya ĩsyĩtwanĩ ya Yesũ Klĩsto. Yĩla twamũvoya Ngai ĩsyĩtwanĩ ya Yesũ, twĩthĩawa tũyonanyʼa nĩtũkũelewa kana ethukĩĩasya mboya sitũ nũndũ wa kĩla Yesũ watwĩkie. Nĩkyo kĩtumi Yesũ waisye atĩĩ: “Vaiĩ mũndũ wũkaa kwa Asa atesĩle kwakwa.”​—Yoana 14:⁠6.

MŨVOYE KUMA NGOONĨ

‘Mũtulũĩlei ngoo syenyu.’​—Savuli 62:⁠8.

Yĩla tũũmũvoya Yeova, twaĩle kũneena nake o ũndũ tũtonya kũneena na mũsyai ũtwendete. Vandũ va kũsoma mboya ĩvukunĩ kana kwinĩlĩĩla o mboya ila ila, twaĩle kũneenaa nake kuma ngoonĩ na twĩ na ndaĩa.

VOYA KWOSANA NA KWENDA KWA NGAI

“Twavoya kĩndũ o na kĩva kwosana na kwenda kwake, nũtwĩthukĩĩasya.”​—1 Yoana 5:​14.

Yeova Ngai nũtũtavĩtye Mbivilianĩ maũndũ ala ũtwĩkaa na ala wendaa twĩke. Kwa ngelekanyʼo, nĩ kana ethukĩĩsye mboya sitũ, endaa tũmũvoye “kwosana na kwenda kwake.” Kwoou nĩtwaĩle kwĩmanyĩsya Mbivilia nĩ kana tũmũmanye nesa. Tweeka ũu, nowʼo tũkavoyaa kwa nzĩa ĩtonya kũmwendeesya.

TŨTONYA KŨVOYA ĨŨLŨ WA KYAŨ?

Voya Ĩũlũ wa Mavata Maku. No tũmũvoye Ngai atwĩanĩĩsye mavata maitũ ma kĩla mũthenya, ta lĩu, ngũa, na ũkomo. O na no tũmũvoye atũnenge ũĩ wa kwĩka motwi maseo, na ũkũmbaũ wa kũmĩanĩsya na mathĩna. O na ĩngĩ, no tũmũvoye nĩ kana atũtetheesye twĩthĩwe na mũĩkĩĩo, atũekee, na aitũtwʼĩĩka.​—​Luka 11:​3, 4, 13; Yakovo 1:​5, 17.

Voyeaa Ala Angĩ. Asyai nĩmatanaa mũno yĩla moona syana syoo syendanĩte. O ta ũu, Yeova nĩwendaa syana syake ila syĩ ĩũlũ wa nthĩ ithĩnĩkĩanĩe. Kwoou, nĩtwaĩle kũvoyaa kwondũ wa ũla tũtwaanĩte nake, syana sitũ, andũ ma mũsyĩ, na anyanya maitũ. Mũmanyĩwʼa Yakovo atwĩĩte ‘tũvoyeanĩe.’​—Yakovo 5:​16.

Tũngaa Mũvea. Mbivilia yaĩtye atĩĩ ĩũlũ wa Mũmbi witũ: “[Nĩwamwĩkie] maũndũ maseo ta kũmũnenga mbua kuma ĩtunĩ na mavinda ma ngetha mbingĩ, na kũmũnenga lĩu ũmwĩanĩe, na atuma mwĩthĩwa na ũtanu mwingĩ ngoonĩ syenyu.” (Meko ma Atũmwa 14:17) Yĩla twasũanĩa ĩũlũ wa maũndũ onthe ala Ngai ũtwĩkĩte, nĩtwĩwʼaa twaĩle kũmũvoya tũmũtũngĩe mũvea. O na ĩngĩ, maũndũ ala twĩkaa nĩmaĩle kwonanyʼa kana nĩtũmũtũngĩaa mũvea.​—Akolosai 3:​15.

ĨTHĨWA NA WŨMĨĨSYO NA ŨIENDEEA KŨVOYA

Mavinda amwe no tũtũlĩke ngoo yĩla twoona mboya sitũ iteũsũngĩwa na mĩtũkĩ, o na kau twavoya kuma ngoonĩ. Ũu nĩ kwonanyʼa kana Ngai ndatũthĩnĩkĩaa? Aiee. Kwasũanĩa ngelekanyʼo ii iatĩĩe ikwonanyʼa kana kĩla twaĩlĩte kwĩka no kũendeea kũvoya.

Steve, ũla tũwetie mwambĩĩonĩ, aĩtye, “Keka ti mboya, nĩthĩwa neeyĩtũkie myaka mingĩ mĩvĩtu.” Nĩ kyaũ kyamũtetheeisye? Nĩwambĩĩe kwĩmanyĩsya Mbivilia na oona vata wa kũendeea kũvoya na kĩthingʼĩĩsyo. Aĩtye atĩĩ: “Nĩnĩmũvoyaa Ngai ngamũtũngĩa mũvea nũndũ wa ũtethyo mũnene ũla nĩkwatĩte kuma kwa anyanyawa. Yu nĩwʼaa nĩ mũtanu kwĩ ĩvinda yĩngĩ o na yĩva.”

Nao nata Jenny, ũla weewʼaa ataĩlĩte kwĩthukĩĩwʼa nĩ Ngai? Aĩtye, “Yĩla naemeeiwe vyũ, namũvoyie Ngai andetheesye nĩelewe nĩkĩ neewʼaa nde wa vata.” Kwĩka ũu kwamũtethisye ata? Aendeee kwasya: “Kũneena na Ngai nĩkũndethetye kwĩyonaa ũndũ we ũmbonaa, na kũmanya kana o na ethĩwa nĩngwĩsilĩla nũndũ wa maũndũ mathũku ala neekie, we ndanzilĩlaa. O na ĩngĩ, kũvoya nĩkũndethetye ndikakwʼe ngoo.” Yu maũndũ mailye ata? Easya, “Mboya nĩndetheetye kũĩkĩĩa kana Yeova e kwʼo, nũmbendete, nũnthĩnĩkĩaa, na ĩtumĩte nĩmwona ta Ĩthe wakwa na Mũnyanyawa, ũla ũndetheeasya mavinda onthe neeka kwenda kwake.”

O na ĩngĩ, kwasũanĩa ngelekanyʼo ya Isabel. Yĩla waitavie, ndakĩtalĩ syamwĩie akasyaa mwana wĩ na wonzu mũnene wa mwĩĩ. Ũndũ ũsu wamũtũlile ngoo mũno. O na andũ amwe mamwĩaa aumye ĩvu yĩu. Isabel aĩtye, “Neewʼaa ta ngũkwʼa nũndũ wa woo ũla waĩ ngoonĩ yakwa.” Nĩ kyaũ kyamũtetheeisye? Aĩtye, “Namũvoyie Ngai mũno nĩ kana andetheesye.” Ĩtina wa ĩvinda nĩwesie kũsyaa kamwana na aketa Gerard. Kana kau kaĩ na thĩna wa mwĩĩ o tondũ ndakĩtalĩ syamũtavĩtye. Ĩndĩ we Isabel nĩwĩwʼaa Ngai ta wasũngĩie mboya syake? Ĩĩ, nĩwĩwʼaa ũu! Nĩkĩ tũkwasya ũu? Aĩtye, “Nĩmanyaa mboya syakwa nĩsyasũngĩiwe yĩla noona kĩmwana kyakwa, kĩla yu kĩ na myaka 14, kĩitanĩa thayũ o na kau kĩ na mathĩna, na ũsu nĩwʼo ũathimo ũla mũnene vyũ Yeova Ngai ũnengete.”

Kwĩwʼa angĩ maielesya maũndũ ta asu kuma ngoonĩ, kũtumaa tũsũanĩa ndeto sya mũandĩki wa Savuli, ũla waisye: “Yeova, nĩwĩwʼĩte kwenda kwa ala auu: ũkamaseũvya ngoo syoo, ũkatuma kũtũ kwaku kwĩwʼa.” (Savuli 10:17) Isu nĩ itumi nzeo mũno sya kũendeea kũvoya na kĩthingʼĩĩsyo!

Mbivilianĩ nĩtũkwataa mboya mbingĩ sya Yesũ. Mboya ĩmwe yĩsĩkĩe mũno nĩ ĩla wamanyĩisye amanyĩwʼa make. Tũtonya kwĩmanyĩsya kyaũ mboyanĩ ĩsu?