Mboya Ĩtonya Ũkũtethya Ata?

Mũndũ mũka wĩtawa Pamela nĩwawaie mũno na athi kwona ndakĩtalĩ. Ĩndĩ no wamũvoyie Ngai amũnenge vinya wa kũmĩĩsya. Kũvoya nĩkwamũtethisye?

Pamela aĩtye: “Ĩvinda yĩu naiitawa kanza, neewʼaa ndikĩa mũno. Ĩndĩ yĩla namũvoya Yeova Ngai, neewʼaa nausya na ndieka kwĩmakĩa. O na ũmũnthĩ no nĩthĩawa na kyalya kingĩ, ĩndĩ mboya nĩndetheeasya kwĩthĩwa na woni ũla waĩlĩte. Yĩla andũ mangũlya ũndũ nĩendeee, nĩmeaa, ‘Ndikwĩwʼa nesa, ĩndĩ nĩ mũtanu!’ ”

Ti nginya tũkwatwe nĩ ũwau mũthũku kana thĩna mũnene nĩ kana twambĩĩe kũvoya. Ithyonthe nĩtũkomanaa na mathĩna, methĩwe nĩ manene kana nĩ manini, na kwoou nĩtwendaa kũtetheewʼa nĩ kana tũmomĩĩsye. Ĩndĩ yo mboya no ĩtũtethye?

Mbivilia yaĩtye atĩĩ: “Mwaũĩe Yeova mũio waku, nake akakũtwʼĩĩka: ndakaeka ala alũngalu mathingithangwʼe o na ĩndĩĩ.” (Savuli 55:22) Ndeto isu nitwĩkĩaa vinya mũno. Kwoou mboya ĩtonya kũũtethya ata? Yĩla wamũvoya Ngai kwosana na kwenda kwake, nũkũnengae ũtethyo ũla ũkwenda nĩ kana ũmĩanĩsye na thĩna ũla wĩ nawʼo.—Sisya ĩsandũkũ yĩ na kyongo, “Ũndũ Mboya Ĩtonya Ũkũtethya.”

Ũndũ Mboya Ĩtonya Ũkũtethya

Mũuo wa kĩlĩko

“Mavata menyu nĩmatavanwʼe kwa Ngai . . . , na mũuo wa Ngai ũla ũvĩtũkĩte ũmanyi wʼonthe ũkasũvĩaa ngoo syenyu na ilĩko syenyu nthĩnĩ wa Klĩsto Yesũ.” (Avilivi 4:6, 7) Yĩla wamũtulũĩla Ngai maũndũ ala meũkũthĩnyʼa, akaũtetheeasya wĩkale ũuĩtye na ũu ũituma wĩka maũndũ kwa ũĩ.

Ũĩ ũla wumaa kwa Ngai

“Ethĩwa mũndũ o na wĩva nde na ũĩ, nĩ aendeee kũmũvoya Ngai, nĩkwĩthĩwa anengae onthe kwa ũlau na ateũmatalĩla mavĩtyo, nake akanengwa.” (Yakovo 1:⁠5) Mavinda maingĩ yĩla twĩ na maũndũ meũtũthĩnyʼa, ndwĩthĩawa wĩ ũndũ wĩ laisi kwĩka motwi maseo. Kwoou wamũvoya Ngai aũnenge ũĩ, akaũlilikanasya myolooto ya vata ĩla yĩ Ndetonĩ yake, Mbivilia.

Vinya na ũkiakisyo

“Nĩndonya maũndũ onthe nũndũ wa vinya wa ũla ũndonyethasya.” (Avilivi 4:13) Nũndũ Yeova nĩwe Ngai mwene vinya wʼonthe, no aũnenge ũtonyi wa kũmĩanĩsya na mathĩna maku na kũsinda motato. (Isaia 40:29) O na ĩngĩ, Mbivilia ĩmwĩtĩte “Ngai wa ũkiakisyo wʼonthe.” Kwoou no atũkiakisye “matatwanĩ maitũ onthe.”—2 Akolintho 1:3, 4.