KĨLUNGU KYA KWĨMANYĨSYA 4
Nĩkĩ Tũendaa Ũmbanonĩ wa Kũlilikana Kĩkwʼũ kya Yesũ?
“Ĩkaai ũu kwondũ wa kũndilikana.”—LUKA 22:19.
WATHI 20 Nĩwanenganie Mwana Waku Mwendwa
KWA ŨKUVĨa
1-2. (a) Tũkothaa kũlilikana mwendwa witũ wakwie ĩndĩĩ? (b) Nĩ ũndũ wĩva Yesũ wambĩĩisye ũtukũ wa mũthya atanamba kũkwʼa?
O NA ethĩwa vavĩtĩte ĩvinda yĩasavĩte ata kuma endwa maitũ makwʼa, mayĩsaa kũla. Nĩtũsũanĩaa ĩũlũ woo, na mũno mũno matukũ ala makwie mavika.
2 Kĩla mwaka, twĩthĩawa katĩ wa andũ milioni mbingĩ nthĩ yonthe, ala mombanaa nĩ kana malilikane kĩkwʼũ kya mũndũ mendete mũno, nake nĩ Yesũ Klĩsto. (1 Vet. 1:8) Tũmbanaa vamwe tũmũlilikane nũndũ aumisye thayũ wake ta nthembo ya wovosyo nĩ kana tũvonokwʼe kuma naĩnĩ na kĩkwʼũnĩ. (Mt. 20:28) Eka ũu, Yesũ nĩweaĩe aatĩĩi make malilikanae kĩkwʼũ kyake. Ũtukũ wa mũthya atanakwʼa ambĩĩisye kyaũya kya mwanya kya wĩoo, na eeaĩa amanyĩwʼa make ũũ: “Ĩkaai ũu kwondũ wa kũndilikana.”—Luka 22:19.
3. Twĩneenea kyaũ ĩsomonĩ yĩĩ?
3 Amwe maendaa ũmbanonĩ wa kũlilikana kĩkwʼũ kya Klĩsto methĩawa na wĩkwatyo wa kũthi ĩtunĩ. Ĩndĩ andũ milioni mbingĩ ala me na wĩkwatyo wa kwĩkala ĩũlũ wa nthĩ o namo nĩmethĩawa vo. Ĩsomonĩ yĩĩ nĩtũkwona nĩkĩ onthe methĩawa na mea ma kũthi ũmbanonĩ ũsu kĩla mwaka. O na nĩtũkwona ũndũ tũtethekaa twathi ũmbanonĩ ũsu. Ekai twambe kwona maũndũ amwe matumaa etĩkĩwʼa mauta methĩwa vo.
NĨKĨ ETĨKĨWʼA MAUTA METHĨAWA VO?
4. Nĩkĩ etĩkĩwʼa mauta maĩsaa mũkate na kũnywʼa mbinyu ũmbanonĩ wa kũlilikana kĩkwʼũ kya Yesũ?
4 Kĩla mwaka, etĩkĩwʼa mauta nĩmaĩsaa mũkate na kũnywʼa mbinyu ũmbanonĩ wa kũlilikana kĩkwʼũ kya Yesũ. Nĩkĩ? Nĩ kana tũsũngĩe ĩkũlyo yĩu, kwasũanĩa kĩla kyeekĩkie ũtukũ wa mũthya Yesũ e kũũ nthĩ. Nĩwambĩĩisye Kyaũya kya Wĩoo kya Mwĩaĩi ĩtina wa kũya Vasaka e na atũmwa make. Anengie atũmwa make aĩkĩĩku 11 mũkate na mbinyu na amea nĩmaye na mainywʼa. O na nĩwamatavisye ĩũlũ wa motianĩo, kana mawĩwʼano, elĩ; ũtianĩo mweũ na ũtianĩo kwondũ wa Ũsumbĩ.b (Luka 22:19, 20, 28-30) Motianĩo asu nĩmavingũĩe atũmwa asu na angĩ avũthũ mwanya wa kũtwʼĩka asumbĩ na athembi ĩtunĩ. (Ũvu. 5:10; 14:1) Nũndũ etĩkĩwʼa mauta nĩmo me nthĩnĩ wa motianĩo asu elĩ, nĩmo maĩle kũya mũkate na kũnywʼa mbinyu ũmbanonĩ wa kũlilikana kĩkwʼũ kya Yesũ.
5. Nĩ kyaũ etĩkĩwʼa mauta mesĩ ĩũlũ wa wĩkwatyo ũla manengetwe?
5 Ve ũndũ ũngĩ ũtumaa etĩkĩwʼa mauta methĩwa na mea ma kũthi ũmbanonĩ wa kũlilikana kĩkwʼũ kya Yesũ. Kwĩka ũu nĩkũmanengae mwanya wa kũsũanĩa ĩũlũ wa wĩkwatyo woo. Yeova amanengete wĩkwatyo mũseo wa kũtanĩa thayũ ũtesa kũkwʼa kana kwanangĩka ĩtunĩ, na kũsumbĩka na Yesũ Klĩsto vamwe na ala angĩ me ũtalonĩ wa 144,000. Na ũndũ ũla mũnene vyũ meteele nĩ kũmwona Yeova mwene! (1 Ako. 15:51-53; 1 Yoa. 3:2) Etĩkĩwʼa mauta nĩmethĩawa mesĩ mekĩte kũthokwʼa metanĩa maũndũ asu. Kwoou nĩ kana metĩkĩlwʼe kũthi ĩtunĩ, no nginya mekale me aĩkĩĩku nginya kĩkwʼũ. (2 Tim. 4:7, 8) Vate nzika, etĩkĩwʼa mauta nĩmatanĩaa kũsũanĩa ĩũlũ wa wĩkwatyo woo wa kũthi ĩtunĩ. (Tito 2:13) Nao nata “malondu angĩ”? (Yoa. 10:16) Nĩ maũndũ ta meva matumaa mathi ũmbanonĩ wa kũlilikana kĩkwʼũ kya Yesũ?
NĨKĨ MALONDU ANGĨ METHĨAWA VO?
6. Nĩkĩ malondu angĩ maendaa ũmbanonĩ wa kũlilikana kĩkwʼũ kya Yesũ?
6 Ũmbanonĩ wa kũlilikana kĩkwʼũ kya Yesũ, malondu angĩ maiĩsaa mũkate kana kũnywʼa mbinyu. Mwakanĩ wa 1938 nĩwʼo ala me na wĩkwatyo wa kwĩkala ĩũlũ wa nthĩ mathokiwʼe ya mbee ũmbanonĩ ũsu. Ĩkaseti ya Mũsyaĩĩsya ya 01/03/1938 yaĩtye: “Wĩthĩwa wĩ ũndũ waĩle vyũ kwa [malondu angĩ] kwĩthĩwa vo ũmbanonĩ ũsu na mayona kĩla kĩendeeaa. . . . O namo nĩmaĩlĩte kũtanĩa ĩvinda yĩu.” O tondũ ala mathokwʼa alũsinĩ matanĩaa kwĩthĩwa vo, malondu angĩ nĩmatanĩaa kwĩthĩwa vo ũmbanonĩ ũsu, o na kau maiĩsaa mũkate kana kũnywʼa mbinyu.
7. Nĩkĩ malondu angĩ methĩawa na mea ma kwĩthukĩĩsya ũvoo ũla wumawʼa ũmbanonĩ wa kũlilikana kĩkwʼũ kya Yesũ?
7 Malondu angĩ o namo nĩmasũanĩaa ĩũlũ wa wĩkwatyo woo. Methĩawa na mea ma kwĩthukĩĩsya ũvoo ũla wumawʼa ũmbanonĩ ũsu nũndũ kĩlungu kĩnene kyawʼo kĩneeneaa kĩla Klĩsto na ala makasumbĩka nake, 144,000, makeka kwondũ wa andũ aĩkĩĩku ĩvindanĩ ya Ũsumbĩ wa Myaka Ngili. Mũsumbĩ Yesũ Klĩsto akatongoesya asu makasumbĩka nake yĩla makethĩwa maitetheesya kũalyũla nthĩ yĩthĩwe yĩ nzaũ, na maitetheesya andũ ala ewi mavetewe naĩ. Andũ milioni mbingĩ ala mathi ũmbanonĩ ũsu nĩmatanĩaa mũno kũsũanĩa ũndũ mawathani ma Mbivilia makeanĩwʼa, ta ala me nthĩnĩ wa Isaia 35:5, 6; 65:21-23; na Ũvuanyʼo 21:3, 4. Kũkũna visa me nthĩ nzaũ vamwe na endwa moo nĩkũmatetheeasya kũlũlũmĩĩlya wĩkwatyo woo wa ĩvinda yũkĩte, na kũituma matwʼa vyũ kũendeea kũmũthũkũma Yeova.—Mt. 24:13; Aka. 6:9.
8. Nĩ ũndũ ũngĩ wĩva ũtumaa malondu angĩ mathi ũmbanonĩ wa kũlilikana kĩkwʼũ kya Yesũ?
8 Kwasũanĩa ũndũ ũngĩ ũtumaa malondu angĩ mathi ũmbanonĩ wa kũlilikana kĩkwʼũ kya Yesũ. Methĩawa mayenda kwonanyʼa kana nĩmendete etĩkĩwʼa mauta na nĩmamakwatĩte mbau. Ndeto ya Ngai nĩyathanie kana etĩkĩwʼa mauta makeethĩwa na ngwatanĩo ndũmu na ala me na wĩkwatyo wa kwĩkala ĩũlũ nthĩ. Yeekie ũu ata? Ekai twone ngelekanyʼo o mbũthũ.
9. Kwosana na wathani ũla wĩ nthĩnĩ wa Nzekalia 8:23, malondu angĩ monaa ata etĩkĩwʼa mauta?
9 Soma Nzekalia 8:23. Wathani ũsu nũtũtetheeasya kũkũna visa mũseo wa ũndũ malondu angĩ monaa ana-a-asa na eĩtu-a-asa moo etĩkĩwʼa mauta. Ndeto “Mũyuti” na ndeto “nenyu” ineeneete etĩkĩwʼa mauta. (Alo. 2:28, 29) Namo “andũ ĩkũmi, kuma ithyomonĩ syonthe sya i mbaĩ” nĩ malondu angĩ. Mathaniwe kana “makakwata” etĩkĩwʼa mauta, kana kwa ndeto ingĩ, makalũmanyʼa namo ũthaithinĩ wa wʼo. Kwoou malondu angĩ monanasya kana nĩmalũmanĩtye na etĩkĩwʼa mauta kwa kwĩthĩwa namo ũmbanonĩ ũsu.
10. Yeova ekĩte ata nĩ kana wathani ũla wĩ Esekieli 37:15-19, 24, 25 wĩanĩe?
10 Soma Esekieli 37:15-19, 24, 25. Yeova nĩwĩanĩĩtye wathani ũsu kwa kũtuma etĩkĩwʼa mauta na malondu angĩ mathũkũma me ngwatanĩo vyũ. Wathani ũsu ũwetete mĩtĩ ĩlĩ. Ala me na wĩkwatyo wa kũthi ĩtunĩ maelekanĩtwʼe na mũtĩ ũla ũandĩkĩtwe “Kwa Yuta,” na asumbĩ ma Isilaeli maumaa mbaĩnĩ ĩsu. Namo ala me na wĩkwatyo wa kwĩkala kũũ nthĩ maelekanĩtwʼe na mũtĩ “wa Evalaimu.”c Yeova athanie kana akakwatanyʼa ikundi isu syelĩ itwʼĩke “mũtĩ ũmwe.” Ũu nĩ kwonanyʼa kana onthe mathũkũmaa me ngwatanĩo matongoewʼe nĩ Mũsumbĩ ũmwe, Klĩsto Yesũ. Kĩla mwaka, etĩkĩwʼa mauta na malondu angĩ maendaa ũmbanonĩ wa kũlilikana kĩkwʼũ kya Yesũ me “ĩĩthya yĩmwe yĩ na mũĩthi ũmwe,” ĩndĩ ti ta ikundi ilĩ syĩ kĩvathũkanyʼo.—Yoa. 10:16.
11. “Malondu” ala mawetetwe nthĩnĩ wa Mathayo 25:31-36, 40 mekaa ũndũ wĩva mũnene wonanasya nĩmakwete mbau ana-a-asa ma Klĩsto?
11 Soma Mathayo 25:31-36, 40. “Malondu” ala Yesũ wawetie ngelekanyʼonĩ ĩsu nĩ andũ ala alũngalu ĩvindanĩ yĩĩ ya mũminũkĩlyo me na wĩkwatyo wa kwĩkala kũũ nthĩ, namo nĩmo metĩtwe malondu angĩ. Methĩawa makwete mbau vyũ ana-a-asa ma Klĩsto etĩkĩwʼa mauta. Ũndũ ũla mũnene mekaa nĩ kũmatetheesya kwĩanĩsya kĩanda kĩnene kĩla manengetwe kya kũtavanyʼa na kũtwʼĩkĩthya andũ amanyĩwʼa nthĩ yonthe.—Mt. 24:14; 28:19, 20.
12-13. Nĩ maũndũ angĩ meva malondu angĩ mekaa monanyʼe nĩmakwete mbau ana-a-asa ma Klĩsto?
12 Syumwa mbũthũ ũmbano wa kũlilikana kĩkwʼũ kya Yesũ ũtanavika, malondu angĩ nĩmonanasya kana nĩmakwete mbau vyũ ana-a-asa ma Klĩsto kwa kwĩyumya na ngoo yonthe kambeininĩ ya kũthokya ala mekwendeewʼa ũmbanonĩ ũsu. (Sisya ĩsandũkũ “We Nĩwĩyũmbanĩsye Ĩvinda ya Kũlilikana Kĩkwʼũ kya Yesũ?”) O na ĩngĩ, nĩmekaa mĩvango yonthe ĩla ĩkwendeka nĩ kana ikundi syonthe ĩũlũ wa nthĩ syĩke ũmbano ũsu, o na kau ikundi mbingĩ iyĩthĩawa na andũ meũya mũkate kana kũnywʼa mbinyu. Malondu angĩ nĩmatanĩaa mũno kũkwata mbau ana-a-asa ma Klĩsto maũndũnĩ asu. Nĩmesĩ kana Yesũ onaa maũndũ ala mekwĩka ana-a-asa make tawe meũmwĩka.—Mt. 25:37-40.
13 Nĩ maũndũ angĩ meva matumaa ithyonthe, o na twĩthĩwe twĩ na wĩkwatyo wĩva, tũthi ũmbanonĩ wa kũlilikana kĩkwʼũ kya Yesũ?
NĨKĨ ITHYONTHE TWĨTHĨAWA VO?
14. Yeova na Yesũ monanĩtye ata kana nĩmatwendete mũno?
14 Nĩtũtũngaa mũvea nũndũ Yeova na Yesũ nĩmonanĩtye kana nĩmatwendete mũno. Ve maũndũ maingĩ Yeova wĩkĩte akonanyʼa kana nũtwendete mũno, ĩndĩ ve ũndũ ũmwe mũnene vyũ kwĩ onthe. Ngai witũ oonanisye nũtwendete mũno vyũ kwa kũtũma Mwana wake mwendwa athĩne na aikwʼa kwondũ witũ. (Yoa. 3:16) Na nĩtwĩsĩ kana o nake Yesũ nũtwendete mũno nũndũ aumisye thayũ wake na ngenda kwondũ witũ. (Yoa. 15:13) Vai kĩndũ twĩka tũkaĩva Yeova na Yesũ nũndũ wa wendo ũsu mwingĩ matwonisye. Ĩndĩ no twonanyʼe nĩtũtũngaa mũvea kwĩsĩla mwĩkalĩle witũ kĩla mũthenya. (Ako. 3:15) O na ĩngĩ, tũendaa ũmbanonĩ wa kũlilikana kĩwʼũ kya Yesũ nĩ kana tũlilikane wendo ũsu matwonisye, na tũyonanyʼa kana o naitũ nĩtũmendete.
15. Nĩkĩ etĩkĩwʼa mauta na malondu angĩ monaa nthembo ya wovosyo yĩ mũthĩnzĩo wa vata vyũ?
15 Twonaa nthembo ya wovosyo yĩ mũthĩnzĩo wa vata vyũ. (Mt. 20:28) Etĩkĩwʼa mauta monaa nthembo ya wovosyo yĩ ya vata vyũ nũndũ nĩyo ĩtumaa wĩkwatyo woo wĩanĩa. Nũndũ nĩmaĩkĩĩe nthembo ya Klĩsto, Yeova nũmatalĩle kwĩthĩwa me alũngalu na akamatwʼa ana make. (Alo. 5:1; 8:15-17, 23) O namo malondu angĩ nĩmatũngaa mũvea nũndũ wa nthembo ya wovosyo. Nũndũ nĩmaĩkĩĩe nthembo ya Klĩsto, me na wasya mũtheu wa ngoo mbee wa Ngai, nĩmamũthũkũmaa ũthũkũmi mũtheu, na me na wĩkwatyo wa kuma “ũla thĩnanĩ mũnene.” (Ũvu. 7:13-15) Ũndũ ũmwe etĩkĩwʼa mauta na malondu angĩ mekaa monanyʼe nĩmeũtũnga mũvea nũndũ wa nthembo ya wovosyo nĩ kwĩthĩwa vo ũmbanonĩ wa kũlilikana kĩkwʼũ kya Yesũ kĩla mwaka.
16. Nĩ ũndũ ũngĩ wĩva ũtumaa tũthi ũmbanonĩ wa kũlilikana kĩkwʼũ kya Yesũ?
16 O na ĩngĩ, tũendaa ũmbanonĩ wa kũlilikana kĩkwʼũ kya Yesũ nũndũ twĩthĩawa tũyenda kũmwĩwʼa. O na twĩthĩwe twĩ na wĩkwatyo wĩva, kĩla ũmwe witũ nĩwendaa kũatĩĩa mwĩao ũũ Yesũ wanenganie ũtukũ ũla wambĩĩisye mũvango wa kũlilikana kĩkwʼũ kyake: “Ĩkaai ũu kwondũ wa kũndilikana.”—1 Ako. 11:23, 24.
ŨNDŨ ITHYONTHE TŨTETHEKAA
17. Ũmbano wa kũlilikana kĩkwʼũ kya Yesũ ũtũtetheeasya ata kũmũthengeea Yeova?
17 Nĩtũmũthengeeaa Yeova. (Yak. 4:8) O tondũ tweemanyĩsya, ũmbano wa kũlilikana kĩkwʼũ kya Yesũ nũtũnengae mwanya wa kũsũanĩa ĩũlũ wa wĩkwatyo ũla Yeova ũtũnengete na wa kũvindĩĩsya wendo mwingĩ ũla watwonisye. (Yel. 29:11; 1 Yoa. 4:8-10) Yĩla twavindĩĩsya maũndũ asu, nĩtũmwendaa mũno na tũkalũlũmĩĩlya ngwatanĩo yitũ nake.—Alo. 8:38, 39.
18. Kũvindĩĩsya ngelekanyʼo ya Yesũ kũtũthangaasya twĩke ata?
18 Nĩtũthangaawʼa tũatĩĩe ngelekanyʼo ya Yesũ. (1 Vet. 2:21) Vatiele mĩthenya mĩnini ũmbano wa kũlilikana kĩkwʼũ kya Yesũ ũvike, nĩtũsomaa Mbivilianĩ maũndũ ala meekĩkie kyumwanĩ kyake kya mũthya kũũ nthĩ, na tũkasoma ĩũlũ wa kĩkwʼũ kyake na kũthaayũkwʼa kwake. Na ĩndĩ wĩoonĩ wa mũthenya ũsu, nĩtwĩthukĩĩasya ũvoo wa Mbivilia ũtũlilikanasya ũndũ Yesũ ũtwendete. (Aev. 5:2; 1 Yoa. 3:16) Yĩla twasoma na twavindĩĩsya ũndũ weeyumisye na ngenda, nĩtũthangaawʼa ‘tũendae o ũndũ [we] waendaa.’—1 Yoa. 2:6.
19. Tũtonya kwĩyĩkalya wendonĩ wa Ngai ata?
19 Nĩtũthangaawʼa tũendeee kwĩyĩkalya wendonĩ wa Ngai. (Yuta 20, 21) Twĩyĩkalasya wendonĩ wa Ngai kwa kwĩka kyonthe kĩla tũtonya tũkwate mĩao yake, tũtaĩe ĩsyĩtwa yake, na tũitanĩthya ngoo yake. (Nth. 27:11; Mt. 6:9; 1 Yoa. 5:3) Kũthi ũmbanonĩ wa kũlilikana kĩkwʼũ kya Yesũ kũtũthuthasya tũendeee kwĩkala kĩla mũthenya ta tũũmwĩa Yeova ũũ: ‘Nyie nĩngwenda kwĩkala wendonĩ waku tene na tene!’
20. Twĩ na itumi syĩva nzeo sya kũthi ũmbanonĩ wa kũlilikana kĩkwʼũ kya Yesũ?
20 Twĩthĩwe twĩ na wĩkwatyo wa kwĩkala tene na tene ĩtunĩ kana nĩ kũũ nthĩ, twĩ na itumi nzeo sya kũthi ũmbanonĩ wa kũlilikana kĩkwʼũ kya Yesũ. Yĩla twoombana mũthenya ũsu kĩla mwaka, nĩtũlilikanaa kĩkwʼũ kya mũndũ twendete, nake nĩ Yesũ Klĩsto. Na ũndũ ũla wa vata vyũ nĩ kana, nĩtũlilikanaa ũndũ ũla mũnene vyũ Yeova weekie oonanyʼa nũtwendete, nawʼo nĩ kũnengane Mwana wake ethĩwe nthembo ya wovosyo. Mwaka ũũ, ũmbano ũsu ũkeekwa wĩoo wa Wakatano, Matukũ 15, Mwei wa 4, 2022. Nĩtũmwendete Yeova na Mwanae. Kwoou matukũ ma mũthenya ũla Yesũ wakwie mavika, vai kĩndũ kĩngĩ twonaa kĩ kya vata ta kwĩthĩwa vo ũmbanonĩ ũsu.
WATHI 16 Taĩa Yeova Nũndũ wa Mwana Wake Mwĩtĩkĩwʼa Mauta
a Twĩthĩwe twĩ na wĩkwatyo wa kwĩkala ĩtunĩ kana nĩ kũũ nthĩ yĩ nzaũ, nĩtwĩthĩawa na mea ma kũthi ũmbanonĩ wa kũlilikana kĩkwʼũ kya Yesũ kĩla mwaka. Ĩsomonĩ yĩĩ nĩtũũneenea itumi nzeo ila Maandĩko manenganĩte sya kũthi ũmbanonĩ ũsu na ũndũ tũtethekaa tweeka ũu.
b Nĩ kana ũkwate ũvoo mwingangĩ ĩũlũ wa ũtianĩo mweũ na ũtianĩo kwondũ wa Ũsumbĩ, sisya kĩlungu kĩ na kyongo, “Mũkeethĩwa ‘Ũsumbĩ wa Athembi,’” ĩkasetinĩ ya Mũsyaĩĩsya ya 01/10/2014, ĩth. 16-20.
c Nĩ kana ũkwate ũvoo mwingangĩ ĩũlũ wa wathani ũsu wa mĩtĩ ĩlĩ wĩ nthĩnĩ wa Esekieli kĩlungu kya 37, sisya kĩlungu kya “Makũlyo Kuma kwa Asomi Maitũ,” ĩkasetinĩ ya Mũsyaĩĩsya ya Mwei wa 7, 2016.