Makũlyo Kuma Kwa Asomi Maitũ
Yesũ oonanasya ata yĩla waisye: “Mũikasũanĩe kana nookie kũete mũuo”?
Yesũ amanyĩisye andũ kwĩkalanasya na mũuo. Ĩndĩ ĩvinda yĩmwe atavisye atũmwa make atĩĩ: “Mũikasũanĩe kana nookie kũete mũuo kũũ nthĩ; ndyaaũka kũete mũuo ĩndĩ nĩ ũvyũ. Nookie kũete mũaanĩko: mũndũ akookĩlĩla ĩthe, mwĩĩtu akookĩlĩla inyia, na kĩveti kĩkookĩlĩla inyia wa mũũme.” (Mt. 10:34, 35) We oonanasya ata?
Yesũ ndeendaa kũaanyʼa mĩsyĩ, ĩndĩ nĩweesĩ kana momanyĩsyo make makaete mũaanĩko mĩsyĩnĩ ĩmwe. Kwoou ala mekwenda kũtwʼĩka amanyĩwʼa ma Klĩsto na maivatiswa, no nginya maelewe kana mavinda amwe andũ moo ma mũsyĩ maikendeeawʼa nĩ ũtwi woo. Mavinda amwe, ala matwaanĩte namo kana andũ angĩ ma mũsyĩ nĩmatonya kũmavĩnga, na kĩu no kĩtume mona ve vinya kũendeea kũlũmanyʼa na momanyĩsyo ma Klĩsto.
Mbivilia yĩkĩĩte vinya Aklĩsto ‘methĩawe na mũuo na andũ onthe.’ (Alo. 12:18) Ĩndĩ momanyĩsyo ma Yesũ no methĩwe ta “ũvyũ” mĩsyĩnĩ ĩmwe. Ũu wĩthĩawa yĩla ũmwe weetĩkĩla momanyĩsyo ma Yesũ, ĩndĩ ala angĩ maileana namo. Vekala ũu, andũ ma mũsyĩ metwʼĩkĩthasya “amaitha” ma ũla ũendeee kwĩmanyĩsya ũwʼo.—Mt. 10:36.
Mavinda amwe, amanyĩwʼa ma Klĩsto ala mekalaa mĩsyĩnĩ ĩaanĩkĩte kĩ-ndĩni nĩmethĩawa maĩle kũtwʼa memũtanĩthya Yeova na Yesũ kana nĩ andũ moo ma mũsyĩ. Kwa ngelekanyʼo, andũ ma mũsyĩ mate Ngũsĩ no mamathingʼĩĩsye matanĩe sikũkũ ya kĩ-ndĩni. Yĩla vathi ũu, no nginya matwʼe memwendeesya ũũ. Yesũ aisye: “Mũndũ o na wĩva ũla wendaa ĩthe kana inyia kwĩ nyie ndambaĩle.” (Mt. 10:37) Nĩ wʼo kana Yesũ ndoonanasya ethĩwa mũndũ nũkwenda kũtalwa ta ũmwaĩle no nginya aeke kwenda asyai make mũno. Ĩndĩ oonanasya kana no nginya mũndũ atwʼe nĩ maũndũ meva ũkwona me ma vata thayũnĩ wake. Kwoou ethĩwa andũ ma mũsyĩ nĩmeũtũvĩnga, nĩtũendeeaa kũmenda, o twĩsĩ kana Ngai nĩwe twaĩle kũmwenda mũnango.
Vate nzika, nĩtũũmĩaa mũno yĩla twavĩngwa nĩ andũ ma mũsyĩ. Ĩndĩ amanyĩwʼa ma Yesũ nĩmalilikanaa ndeto ii wawetie: “Mũndũ o na wĩva ũla ũtetĩkĩlaa kũkua mũtĩ wake wa mathĩna na kũngatĩĩa, ndambaĩle.” (Mt. 10:38) Kwa ndeto ingĩ, Aklĩsto monaa mathĩna amwe, ta kũvĩngwa nĩ andũ ma mũsyĩ, ne maũndũ maĩlĩte kwĩthĩwa meyũmbanĩtye kũmĩĩsya. Ĩndĩ o na vailye ũu, mekwatasya kana mwĩkalĩle woo mũseo nũũtuma andũ moo ma mũsyĩ mavĩndũa woni woo na mayenda kwĩmanyĩsya ũvoo ũla wĩ Mbivilianĩ.—1 Vet. 3:1, 2.