2 | “Ũkiakisyo Ũla wĩ Maandĩkonĩ”

MBIVILIA YAĨTYE: “Maũndũ onthe ala maandĩkiwe tene maandĩkiwe kwondũ wa kũtũmanyĩsya, nĩ kana kwĩsĩla wũmĩĩsyo witũ na ũkiakisyo ũla wĩ Maandĩkonĩ tũtonye kwĩthĩwa na wĩkwatyo.”—ALOMI 15:4.

Ũndũ Kĩu Kyonanasya

Mbivilianĩ ve maũndũ ma kũkiakisya matonya kũtũnenga vinya na makatũtetheesya kũmĩĩsya yĩla twambĩĩa kwĩthĩwa na mesilya mathũku. O na ĩngĩ, ũvoo ũla wĩ Mbivilianĩ nũtũnengae wĩkwatyo kana o mĩtũkĩ, woo ũla twĩ nawʼo ngoonĩ ũkathela vyũ.

Ũndũ Kĩu Kĩtonya Kũtethya

Ithyonthe nĩtũtũlĩkaa ngoo mavinda amwe, ĩndĩ ala methĩawa na ũwau wa kũkwʼa ngoo mũno kana kĩũũyũ nĩmatonya kwĩthĩwa mangʼangʼanaa na maũndũ asu kĩla mũthenya. Mbivilia ĩtonya kũtethya andũ ta asu ata?

Mbivilianĩ ve maũndũ maingĩ maseo matonya kũtuma tũvetanga mosũanĩo mathũku ala twĩ namo. (Avilivi 4:8) Kwa wʼo, no yusũsye ilĩko sitũ mosũanĩo ma kũkiakisya ala matonya kũtũtetheesya tũkewʼa kavaa.—Savuli 94:18, 19.
Mbivilia no ĩtũtetheesye tũkaeka kũsũanĩa kana tũi ma vata.—Luka 12:6, 7.
Mĩsoa mingĩ Mbivilianĩ ĩtũĩkĩĩthĩtye kana tũi ithyoka na kana Ngai, Mũmbi witũ, nũeleawa vyũ ũndũ tũkwĩwʼa.—Savuli 34:18; 1 Yoana 3:19, 20.
Mbivilia ĩtwathĩte kana Ngai akavetanga mosũanĩo mathũku ala me ililikanonĩ sitũ. (Isaia 65:17; Ũvuanyʼo 21:4) Yĩla tũũthĩnĩka kĩlĩkonĩ na ngoonĩ, watho ũsu no ũtũnenge vinya wa kũmĩĩsya.

Ũndũ Mbivilia Ĩtetheesye Jessica

Ũndũ Ũwau wa Kũkwʼa Ngoo Mũno Ũtumaa Nĩwʼa

“Yĩla naĩ na myaka 25, neewie naitavĩwa mũno nĩ maũndũ onthe ala neekaa kĩla mũthenya, na ĩtina, neethĩwa na ũwau wa kũkwʼa ngoo mũno. Naĩ na mesilya maingĩ ma maũndũ mathũku mangwatie tene ala mambũkĩaa ndataĩĩe na ũkethĩa nditonya kũmasiĩĩa. Ndakĩtalĩ nĩsyandetheeisye kũelewa kana ũwau ũsu waetiwe nĩ mesilya mathũku, ala mangwataa nalilikana maũndũ mathũku mũno ala mangwatĩte ĩvinda ĩvĩtu. Eka ndawa ila nanengetwe, nĩnendaa ũtao wa matakĩtalĩ nĩ kana nĩmanye na ndilũnga mosũanĩo mathũku ala nakothaa kwĩthĩwa namo.”

Ũndũ Mbivilia Ĩndethasya

“Mavinda ala naemeewa vyũ nĩ ũwau wa kũkwʼa ngoo mũno, nĩnatelemangaa, ngethĩwa na kĩũũyũ kingĩ, o na ngaĩwa nĩ too. Mavinda maingĩ ũtukũ nĩnaitavĩawa nĩ mosũanĩo maingĩ ũkethĩa o na nditonya kũmasiĩĩa. O tondũ ĩandĩko ya Savuli 94:19 yĩeleetye, Ngai no atũkiakisye yĩla tũkwĩwʼa tũitavĩwe nĩ mosũanĩo. Nũndũ wa ũu, nĩnaiie Mbivilia na kavuku nĩandĩkĩte mĩsoa ya kwĩkĩa vinya vakuvĩ na kĩtanda kyakwa. Yĩla naaĩwa nĩ too, nĩnasomaa mĩsoa ĩmwe Mbivilianĩ, na nũndũ wa ũu, ndieka mosũanĩo ma Ngai mangiakisye.

“Mbivilia ĩtwĩkĩĩte vinya tũomboe mosũanĩo ala maleanĩte na kĩla twĩsĩ ĩũlũ wa Ngai. Navu tene, noonaa nde wa vata, ndendeka, na nĩ vathei. Ĩndĩ yu nĩnĩmanyĩte kana mawoni ta asu nĩmaleanĩte na Mbivilia nũndũ ĩmanyĩasya kana Ngai nĩ Ĩthe witũ ũtwendete na ũthĩnĩkĩaa kĩla ũmwe witũ. O kavola kwa kavola nĩnambĩĩie kũtongoeasya mosũanĩo makwa vandũ va kũmaeka mandongoesye. O na nĩnĩmanyĩĩtye kwĩyonaa ũndũ Ngai ũmbonaa. Yĩu nĩ ĩtambya ya vata mũno yĩndetheesye ngaeka kwĩyonaa nde wa vata.

“Neteele na mea ĩvinda yĩla mosũanĩo onthe mathũku matakethĩwa vo. Kũmanya kana mathĩna ma kĩlĩko makavetangwa vyũ kũnengae vinya wa kũmĩanĩsya na mathĩna ala nĩ namo ũmũnthĩ, na kũkatuma neteela na mea ĩvinda yũkĩte vala ndakethĩwa na ũwau wa kũkwʼa ngoo mũno.”