Nĩmeeyoneie Wendo Kwĩsĩla Meko

YOMARA na ainae, Marcelo na Hiver, mekalaa ũtũinĩ mũnini nthĩ ya Guatemala. Yomara nĩwambĩĩie kwĩmanyĩsya Mbivilia na Ngũsĩ, na ĩtina, ainae o namo mambĩĩa kwĩmanyĩsya. Ĩndĩ vaĩ na thĩna. Me atatũ mayonaa, na mayaĩ matonya kũsoma mũandĩko wa ala matonaa. Kwoou mwana-a-asa ũla wamamanyĩasya nĩwamasomeaa tũlungu na mĩsoa ya Mbivilia ĩla yĩ ĩsomonĩ.

O na kwʼo kũthi maũmbanonĩ kũyaĩ laisi. Mayaĩ matonya kũthi me oka Nyũmbanĩ ya Ũsumbĩ, ĩla yaĩ mũendo wa ndatĩka 40 kuma vala mekalaa. Ĩndĩ ana-a-asa nĩmeekie mĩvango nĩ kana mamatetheeasye kũvika maũmbanonĩ onthe. Na yĩla mambĩĩie kũnengwa ilungu ũmbanonĩ wa katĩkatĩ wa kyumwa, ana-a-asa nĩmamatetheeasya kwĩkĩa kĩlĩkonĩ ilungu syoo.

Twĩ Mwei wa 5, 2019, maũmbano ma kĩkundi nĩmambĩĩie kwĩkĩwa ũtũinĩ kwoo. Ĩvindanĩ yĩu mwana-a-asa ũmwe na mũka, ala maĩ mavainia ma kĩla ĩvinda, nĩmathamĩĩie ũtũinĩ ũsu. Nĩmatwie kũmamanyĩsya kũsoma na kũandĩka mũandĩko wa ala matonaa, o na kau mo ene mayeesĩ kwĩka ũu. Nũndũ wa ũu, nĩmaendie nyũmbanĩ ya mavuku na makwata mavuku ma mũandĩko wa ala matonaa nĩ kana mamatetheesye kũmanya ũndũ matonya kũmanyĩsya angĩ kũsoma mũandĩko ũsu.

Ĩtina wa myei mĩvũthũ, Yomara na ainae maĩ matonya kũsoma nesa mũandĩko wa ala matonaa, na kĩu nĩkyamatetheeisye maendeea kwĩka maendeeo ma kĩ-veva.a Yu tũĩ, Yomara, Marcelo, na Hiver nĩ mavainia ma kĩla ĩvinda. Eka ũu, Marcelo nĩ mũtetheesya wa kĩkundi. Methĩawa na maũndũ maingĩ ma kwĩka ũthũkũminĩ wa Yeova kyumwa kyonthe. Kĩthito kyoo nĩkĩtumĩte angĩ methĩwa na kĩthito o tamo.

Yomara na ainae nĩmatũngaa mũvea nũndũ wa wendo mwingĩ ũla monawʼa kĩkundinĩ. Yomara aĩtye: “Kuma yĩla twakomanie na Ngũsĩ ya mbee, nĩtwonete wendo wa wʼo wa Kĩklĩsto.” Nake Marcelo ongelete kwasya: “Twĩ na anyanya aseo kĩkundinĩ, na twĩ ma mũsyĩ wa ana-a-asa maumĩte isionĩ syĩ kĩvathũkanyʼo ĩũlũ wa nthĩ, ĩndĩ mendanĩte na me ngwatanĩo.” Yomara na ainae meteele na mea kwona nthĩ ĩno yĩitwʼĩkĩthwʼa nzaũ.—Sav. 37:10, 11; Isa. 35:5.