Ve Mũndũ Ũtonya Kũmanya Ũla Waandĩkie Mbivilia?

Ũndũ Mbivilia Yaasya

Andũ aingĩ meĩtwe kana tũitonya kũmanya nesa vyũ ala maandĩkie Mbivilia. Ĩndĩ Mbivilia nĩwetaa nesa andũ ala mamĩandĩkie. Mavuku amwe mambĩĩaa na ndeto ta “ndeto sya Neemia,” “woni wa Isaia,” na “ndeto ya Yeova ĩla yamũkĩe Yoeli.”—Neemia 1:1; Isaia 1:1; Yoeli 1:1.

Aandĩki aingĩ ma Mbivilia nĩmawetaa kana maandĩkaa maũndũ ala matavĩtwʼe nĩ Ngai ũla wa wʼo, Yeova, na kana nĩwe wamatongoesye. Athani ala maandĩkie Maandĩko ma Kĩevelania nĩmawetete ũũ mbee wa mavinda 300: “Ũũ nĩwʼo Yeova ũnũkwasya.” (Amosi 1:3; Mika 2:3; Naumu 1:12) Ngai nĩwatũmĩie alaĩka kũneena na aandĩki amwe ma Mbivilia.—Nzekalia 1:7, 9.

Mbivilia yaandĩkiwe nĩ andũ 40 ũu kwa ĩvinda ya myaka mbee wa 1,600. Andũ amwe nĩmaandĩkie mbee wa ĩvuku yĩmwe ya Mbivilia. Mbivilia nĩ ĩvuku yĩ mavuku manini 66. Yĩthĩawa na mavuku 39 ma Maandĩko ma Kĩevelania, ala mesĩkĩe ta Ũtianĩo Mũkũũ, na mavuku 27 ma Maandĩko ma Kĩkiliki ma Kĩklĩsto, ala mesĩkĩe ta Ũtianĩo Mweũ.