Nĩ Maũndũ Meva Ndonya Kũvoya?

Ũndũ Mbivilia yaasya

Nũtonya kũvoya kĩndũ o na kĩva kĩla kyosanĩte na kwenda kwa Ngai o tondũ kũeleetwʼe Mbivilianĩ. “Ethĩwa tũkavoya ũndũ kwĩanana na kwenda kwa [Ngai] nũtwĩwʼaa.” (1 Yoana 5:14) No ũwete maũndũ ala meũkũthĩnyʼa? Ĩĩ. Mbivilia yaĩtye: “Mũtulũĩlei [Ngai] ngoo syenyu.”—Savuli 62:8.

Maũndũ amwe ala tũtonya kũvoya

• Twĩthĩwe na mũĩkĩĩo nthĩnĩ wa Ngai.—Luka 17:5.

• Veva mũtheu, kana vinya wa Ngai wa wĩki, ũtũtetheesye kwĩka ũla waĩle.—Luka 11:13.

• Vinya wa kũkitana na mathĩna na wa kũkĩlya vinya matatwa.—Avilivi 4:13.

• Twĩthĩwe na mũuo ngoonĩ.—Avilivi 4:6, 7.

• Ũĩ wa kwĩka motwi maĩle.—Yakovo 1:5.

• Tũkwate kyaũya kya kĩla mũthenya.—Mathayo 6:11.

• Tũekewe naĩ sitũ.—Mathayo 6:12.