Kwĩthĩawa Ata Yĩla Mũndũ Wakwʼa?

Ũndũ Mbivilia yaasya

Mbivilia yaĩtye: “Ala me thayũ mesĩ makakwʼa; ĩndĩ ala akwʼũ matyĩsĩ ũndũ o na wĩva.” (Mũtavanʼya 9:5; Savuli 146:4) Kwoou, ĩla twakwʼa tũyĩthĩawa vo ĩngĩ. Ala akwʼũ mayĩsa kũsũanĩa, kwĩka, kana kwĩwʼa ũndũ o na wĩva.

‘Ũkasyoka kĩtoonĩ’

Ĩla Ngai waneenie na mũndũ wa mbee Atamu, nĩwaeleisye ũndũ vethĩawa yĩla mũndũ wakwʼa. Nũndũ Atamu ndaatĩĩa mwĩao ũla wanengetwe, Ngai amwĩie atĩĩ: “Wĩ kĩtoo, na nũkasyoka kĩtoonĩ.” (Mwambĩlĩlyo 3:19) Yeova atanamba kũmũmba Atamu “na kĩtoo kya nthĩ,” Atamu ndaĩ vo. (Mwambĩlĩlyo 2:7) O ta ũu, ĩla Atamu wakwie, asyokie kĩtoonĩ na aeka kwĩthĩwa vo.

Ũu nowʼo vekĩkaa kwa ala makusaa ũmũnthĩ. Mbivilia ĩineena ĩũlũ wa nyamũ na andũ, yaĩtye ũũ: “Onthe nĩ ma kĩtoo, na onthe masyokaa ĩngĩ kĩtoonĩ.”​—Mũtavanʼya 3:19, 20.

Kĩkwʼũ ti kyo mũminũkĩlyo wa andũ

Mavinda maingĩ Mbivilia ĩelekanasya kĩkwʼũ na too. (Savuli 13:3; Yoana 11:11-14; Meko ma Atũmwa 7:60) Mũndũ ũkomete vyũ ndethĩawa esĩ kĩla kĩendeee. No ta ũu, akwʼũ mayĩthĩawa mesĩ ũndũ o na wĩva. Ĩndĩ, Mbivilia ĩmanyĩĩtye kana Ngai no aamũkye ala akwʼũ, o ũndũ mũndũ ũkomete ũamũkawʼa, na aimanenga thayũ ĩngĩ. (Yovu 14:13-15) Kwa ala Ngai ũkathayũũkya, kĩkwʼũ ti mũminũkĩlyo woo.