Nthũ ya Klĩsto Nũũ?

Ũndũ Mbivilia ĩsũngĩĩte

Nthũ ya Klĩsto ti o mũndũ ũmwe kana ũseũvyo mũna, nũndũ Mbivilia yaasya kana “kwĩ nthũ mbingĩ sya Klĩsto.” (1 Yoana 2:18) Kĩvathũkanyʼo na ũu, ndeto “nthũ ya Klĩsto,” ĩla yumanĩte na ndeto ya Kĩkiliki ĩla yonanasya “kũleana na (kana vandũ va) Klĩsto,” yonanasya andũ ala mekaa maũndũ aa maatĩĩe:

• Nĩmakaĩaa kana Yesũ nĩwe Klĩsto (Masia) kana makakaĩa nĩwe Mwana wa Ngai.—1 Yoana 2:22.

• Nĩmamũvĩngaa Klĩsto, Mwĩtĩkĩwʼa Mauta wa Ngai.—Savuli 2:1, 2; Lũka 11:23.

• Nĩmetwʼĩkĩthasya Klĩsto.—Mathayo 24:24.

• Nĩmathĩnasya aatĩĩi ma Klĩsto, na Yesũ onaa kĩla mekawa ta we wĩthĩawa ekĩtwe.—Meko ma Atũmwa 9:5.

• Maasya nĩ Aklĩsto ĩndĩ mekaa maũndũ mekwonanyʼa nĩmeũtũla mĩao kana me na ũkengani.—Mathayo 7:22, 23; 2 Akolintho 11:13.

O vamwe na Mbivilia kũweta ĩũlũ wa andũ ala mekaa syĩko isu ta nthũ sya Klĩsto, nĩmawetaa onthe me vamwe ta “nthũ ya Klĩsto.” (2 Yoana 7) Nthũ ya Klĩsto yaumĩlile ya mbee ĩvindanĩ ya atũmwa na yĩthĩĩtwe yĩendeee kwĩthĩwa vo nginya yu. Wathani wa Mbivilia nĩwawetie ĩũlũ wa ũndũ ũsu.—1 Yoana 4:3.

Ũndũ ũtonya kũmanya nthũ sya Klĩsto

• Nĩmamanyĩasya momanyĩsyo ma ũvũngũ ĩũlũ wa Yesũ. (Mathayo 24:9, 11) Kwa ngelekanyʼo, ala mamanyĩasya ĩũlũ wa Ũtatũ, kana Yesũ nĩ Ngai Mwene Vinya Wʼonthe methĩawa maivĩnga momanyĩsyo ma Yesũ ũla waisye: “Asa nĩ mũnene kwĩ nyie.”—Yoana 14:28.

• Nthũ sya Klĩsto nileanaa na kĩla Yesũ waisye ĩũlũ wa ũndũ Ũsumbĩ wa Ngai wĩkaa maũndũ. Kwa ngelekanyʼo, atongoi amwe ma ndĩni maasya kana Klĩsto athũkũmaa kwĩsĩla silikalĩ sya andũ. Ĩndĩ, ũmanyĩsyo ũũ nũvĩnganaa na ndeto sya Yesũ ũla waisye: “Ũsumbĩ wakwa ti wa nthĩ ĩno.”—Yoana 18:36.

• Maasya Yesũ nĩwe Mwĩai woo, ĩndĩ maiatĩĩaa mĩao yake, ta kwa ngelekanyʼo, mwĩao wa kũtavanyʼa ũvoo mũseo wa Ũsumbĩ.—Mathayo 28:19, 20; Lũka 6:46; Meko ma Atũmwa 10:42.