No Nginya Mũndũ Ethĩwe E wa Ndĩni Na?

Ũndũ Mbivilia ĩsũngĩĩte

Ĩĩ, nũndũ Ngai endaa andũ mombane vamwe yĩla meũthaitha. Mbivilia yaĩtye atĩĩ: “Ekai tũendeee kũthĩnĩkĩa ala angĩ nĩ kana tũmathuthye methĩwe na wendo na meko maseo, tũte kũeka kũmbana vamwe.”—Aevelania 10:24, 25.

Yesũ oonanisye kana amanyĩwʼa make maĩ methĩwe me kĩkundi kĩ ngwatanĩo yĩla waisye: “Nũndũ mweeka ũu andũ onthe makamanya kana mwĩ amanyĩwʼa makwa—ethĩwa mũkeethĩwa na wendo katĩ wenyu.” (Yoana 13:35) Nĩ kana monanyʼe wendo ũsu, amanyĩwʼa ma Klĩsto maaĩlĩte kũvulanaa vamwe na athaithi ala angĩ. O na ĩngĩ maaĩlĩte kwĩthĩwa mavangĩtwe ta ikundi na mayũmbanaa vamwe kwondũ wa ũthaithi. (1 Akolintho 16:19) Na ĩndĩ onthe me vamwe, mayĩthĩwa ngwatanĩo ya ana-a-asa ĩũlũ wa nthĩ yonthe.—1 Vetelo 2:17.

Ve maũndũ maingĩ mendekaa eka o kwĩthĩwa wĩ wa ndĩni na

O na kau Mbivilia nĩyonanĩtye kana andũ nĩmaĩle kũmbana vamwe maimũthaitha Ngai, ndyonanĩtye kana mũndũ no amwendeesye Ngai aĩ nũndũ nĩ wa ndĩni na. Nĩ kana mũndũ etĩkĩlwe nĩ Ngai, no nginya ndĩni ĩla ũendaa yĩthĩwe ĩtonya kũmũtetheesya ethĩwe na meko maseo. Kwa ngelekanyʼo, Mbivilia yaĩtye: “Ũthaithi ũla mũtheu na ũte mũvuku methonĩ ma Ngai waitũ na Asa waitũ nĩwʼo ũũ: kũsũvĩa syana ndiwa na aka ndiwa thĩnanĩ woo, na mũndũ kwĩsũvĩa mwene ndakavukwʼe nĩ maũndũ ma nthĩ ĩno.”—Yakovo 1:27.