Syo Ngũsĩ sya Yeova Nĩsyĩthĩawa na Mĩao Ĩũlũ wa Kwĩvaanyʼa?
Ngũsĩ sya Yeova iĩkĩĩaa kana myolooto na mĩao ĩla yĩ Mbivilianĩ no ĩtũtetheesye kwĩka motwi meũmwendeesya Ngai, na matonya kũtũtethya ithyĩ ene. (Isaia 48:17, 18) Ti ithyĩ twaseũvisye mĩao na myolooto ĩno ĩndĩ nĩtwĩkalaa kwosana nayo. Kwasisya wone ũndũ mĩao na myolooto ĩmwe ĩkonanĩtye na kwĩvaanyʼa.a
Mũtwaano nĩ ngwatanĩo ya ĩvinda yonthe. (Mathayo 19:6) Nũndũ Ngũsĩ sya Yeova syonaa kwĩvaanyʼa yĩ ĩtambya ya kũlika mũtwaanonĩ, nĩsyosaa ũndũ ũsu kwa ũito.
Kwĩvaanyʼa nĩ kwa o ala me na myaka yĩanĩtye kũlika mũtwaanonĩ. Andũ ta asu ‘nĩmavĩtũkĩtye myaka ya ũika,ʼ kana nĩmavĩtũkĩte ĩvinda yĩla wendi wa kũmanyana kĩ-mwĩĩ wĩthĩawa wĩ mwingĩ.—1 Akolintho 7:36.
Ala mekwĩvaanyʼa maĩle kwĩthĩwa na ũthasyo wa kũtwaana. Ngai ndonaa andũ amwe ala mathaĩtye mũtwaano ta maĩlĩte kũtwaana ĩngĩ, nũndũ myolooto yake yonanasya kana mwĩkalĩle mũthũku wa ũlaalai wĩ wʼoka nowʼo waĩlĩte kũtuma andũ mathasya mũtwaano.—Mathayo 19:9.
Aklĩsto ala mekwenda kũtwaana meyĩaĩwe matwaane o nthĩnĩ wa Mwĩai. (1 Akolintho 7:39) Ngũsĩ sya Yeova iyonaa mwĩao ũũ ta ũũneenea o mũndũ ũla ũnengete ndaĩa kĩla tũĩkĩĩaa, ĩndĩ nĩ mũndũ ũla wĩkaa maũndũ asu e Ngũsĩ ya Yeova mbatise. (2 Akolintho 6:14) Mavinda onthe Ngai ethĩĩtwe aitavya athaithi make matwaane na o ala me na mũĩkĩĩo ũmwe. (Mwambĩlĩĩlyo 24:3; Malaki 2:11) Andũ ma ĩvinda yĩĩ ala mekaa ũkunĩkĩli nĩmamanyĩte kana mwĩao ũsu nĩwaĩlĩte.b
Syana syaĩle kũmewʼa asyai masyo. (Nthimo 1:8; Akolosai 3:20) Mwĩao ũũ nũkonetye syana ila syĩkalaa mũsyĩ nũndũ nĩsyaĩlĩte kũatĩĩa ũtwi ũla asyai masyo mekĩte ĩũlũ wa kwĩvaanyʼa. Ũu nĩ vamwe na myaka ĩla mwanake kana mwĩĩtu ũtonya kwambĩĩa kwĩvaanyʼa, na maũndũ ala asyai mamwĩtĩkĩlĩtye eke.
Ngũsĩ sya Yeova itũmĩĩte myolooto ĩla yĩ Maandĩkonĩ, nĩsyĩsakũĩaa syo mbene ethĩwa nĩsyĩkwĩvaanyʼa, na ũla syĩkwĩvaanyʼa nake. Kĩu kyosanĩte na mwolooto ũũ: “Kĩla mũndũ akakua mũio wa maũndũ ala we mwene waĩlĩte kwĩanĩsya.” (Akalatia 6:5, maelesyo ma kwongeleela) O na vailyĩ ũu, aingĩ ala mekwenda kwĩvaanyʼa nĩmamanthaa ũtao kwa mũndũ mũimu ũla ũkũmendea ũseo, na aĩle kwĩthĩwa e Ngũsĩ ya Yeova.—Nthimo 1:5.
Imanyĩo mbingĩ ila andũ mekwĩvaanyʼa makothaa kwĩka syĩthĩawa ne naĩ ngito. Ta kwa ngelekanyʼo, Mbivilia nĩtũtavĩtye twĩvathane na mwĩkalĩle mũthũku wa ũlaalai. Kĩu kĩikonetye kũmanyana kĩ-mwĩĩ kwĩ kwʼoka, ĩndĩ o na nĩkĩkonetye meko angĩ mathũku katĩ wa andũ matatwaanĩte ta kũkwatanga mamutha ma ũsyai ma mũndũ ũla ũngĩ, kana kũmanyana kĩ-mwĩĩ kwĩsĩla mũnuka kana kwĩsĩla kĩtimba. (1 Akolintho 6:9-11) O na kwĩka maũndũ mekũamũkya wendi wa kũmanyana kĩ-mwĩĩ ũla ũthelaa mũndũ eeka ũlaalai nĩ “ũvuku” ũtamwendeeasya Ngai. (Akalatia 5:19-21) O na ĩngĩ, Mbivilia nĩvatanĩte ũneeni mũvuku o vamwe na “ndeto nthũku.”—Akolosai 3:8.
Ngoo, kana mũndũ wa nthĩnĩ, nĩ ngengani. (Yelemia 17:9) No ĩtume mũndũ eka maũndũ o esĩ nĩ mathũku. Nĩ kana ala mekwĩvaanyʼa mesũvĩe maikawʼe nĩ ngoo syoo, mayaĩle kwĩthĩwa vandũ me oka vatonya kũtuma malika mũisyonĩ. No matwʼe kwosa matambya ala maĩlĩte kwa kwĩthĩwa katĩ katĩ wa kĩkundi kĩ na mwĩkalĩle mũseo kana kwĩthĩwa na mũndũ wa katatũ wa kwĩkwatwʼa. (Nthimo 28:26) Aklĩsto ala mate mũtwaanonĩ na meũmantha andũ ma kũtwaana namo nĩmesĩ mũisyo ũla mũndũ ũkwataa ambĩĩa kwĩvaanyʼa indanetinĩ, na mũno mũno mũisyo wa kũtuma ndũũ na mũndũ matamwĩsĩ nesa.—Savuli 26:4.
a Syĩthĩonĩ imwe kwĩvaanyʼa kwonekaa kwĩ kwa vata, ĩndĩ syĩthĩonĩ ingĩ kũyonekaa ũu. Mbivilia ndyaĩtye kana nĩtwaĩle kwĩvaanyʼa, kana ĩsu noyo nzĩa yoka ya kũlika mũtwaanonĩ.
b Kwa ngelekanyʼo, kĩlungu kĩ nthĩnĩ wa ĩvuku Marriage & Family Review kyaisye kana “masomo atatũ maneeneete kwĩthĩwa na mũtwaano wa ĩvinda yĩasa, moonanisye kana kwĩthĩwa ndĩninĩ ĩmwe na kwĩthĩwa na mũĩkĩĩo ũmwe nĩ katĩ wa maũndũ ala manene matonya kũtuma mũtwaano wĩkala ĩvinda yĩasa (myaka 25-50 na mbeange).”—Ĩvuku 38, Na. 1, ĩthangũ ya 88 (2005).