Yoana 14:6—“Nyie Ninyie Nzĩa na Ninyie Wʼo na Ninyie Thayũ”

“Nake Yesũ amwĩa: ‘Nyie ninyie nzĩa na ninyie wʼo na ninyie thayũ. Vaiĩ mũndũ wũkaa kwa Asa atesĩle kwakwa.’”—Yoana 14:6, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Yesũ asũngĩa, ‘Nyie ninyie nzĩa na ninyie wʼo na ninyie thayũ. Vaiĩ mũndũ wũkaa kwa Asa atesĩle kwakwa.’”—Yoana 14:6, New International Version.

Kĩla Ĩandĩko ya Yoana 14:6 Yonanasya

Mũndũ ũla wendaa kũmũthaitha Asa, Yeovaa Ngai, no nginya amanye kĩanda kya vata kya Yesũ.

“Nyie ninyie nzĩa.” Yesũ nũnenganĩte “nzĩa” ya kũmũthengeea Ngai kwa nzĩa ĩla wĩtĩkĩlaa. Kwa ngelekanyʼo, ala meũmũvoya Ngai no nginya meke ũu ĩsyĩtwanĩ ya Yesũ. (Yoana 16:23, 24) Kĩkwʼũ kya Yesũ nĩkĩtumaa wĩthĩwa wĩ ũndũ ũtonyeka kwa andũ kwĩwʼanĩthwa na Ngai kana kwĩthĩwa na ngwatanĩo nzeo vamwe nake. (Alomi 5:8-11) O na ĩngĩ Yesũ nĩwaiie ngelekanyʼo nzeo ya mwĩkalĩle ũla ala mekwenda kũmwendeesya Ngai maĩlĩte kwĩthĩwa nawʼo.—Yoana 13:15.

“Nyie . . . ninyie wʼo.” Mavinda onthe Yesũ nĩwanenaa na kwĩkala kwosana na ũla wʼo. (1 Vetelo 2:22) Kwa kũmwĩthukĩĩsya, mũndũ aĩ atonya kwĩmanyĩsya ũla wʼo ĩũlũ wa Ngai. (Yoana 8:31, 32) O na ĩngĩ Yesũ aĩ “wʼo” nũndũ nĩweanĩisye wathani wa Mbivilia. Kwoou nĩwatumie mawatho ma Ngai meanĩa.—Yoana 1:17; 2 Akolintho 1:19, 20; Akolosai 2:16, 17.

“Nyie . . . ninyie thayũ.” Yesũ nĩwaumisye thayũ wake nĩ kana ala mamũĩkĩĩaa methĩwe matonya kũkwata thayũ wa tene na tene. (Yoana 3:16, 36) O na ĩngĩ nĩwe “thayũ” kwa ala makwie nũndũ akamathayũũkya kuma kĩkwʼũnĩ.—Yoana 5:28, 29; 11:25.

“Vaiĩ mũndũ wũkaa kwa Asa atesĩle kwakwa.” Ala mekwenda kwĩthĩwa na ngwatanĩo nzeo vamwe na Ngai no nginya metĩkĩle kĩanda kya Yesũ kya mwanya. Mekaa ũu kwa kũmũvoya Ngai ĩsyĩtwanĩ ya Yesũ, na kĩu kyonanasya kana nĩmekwĩtĩkĩlana na ũkũmũ wa Yesũ Klĩsto. (Yoana 15:16) O na ĩngĩ nĩmetĩkĩlaa kana no Yesũ ũtonya kũtuma tũkwata ũtangĩĩo.—Meko ma Atũmwa 4:12; Avilivi 2:8-11.

Mĩsoa Ĩla Ĩthyũlũlũkĩte Yoana 14:6

Yoana kĩlungu kya 13-17 syĩ na ũtao ũla Yesũ wanengie atũmwa make aĩkĩĩku 11 ũtukũ wa mũthya atanamba kũkwʼa. Kĩlungunĩ kya 14, Yesũ ekĩie amanyĩwʼa make vinya mamũĩkĩĩe, maĩkĩĩe Ĩthe wake, mamende, na maimewʼa. (Yoana 14:1, 12, 15-17, 21, 23, 24) Nĩwavuanisye ngwatanĩo ya vakuvĩ ĩla wĩthĩawa nayo vamwe na Ĩthe wake. (Yoana 14:10, 20, 28, 31) O na kau ĩtina wa kavinda kakuvĩ aĩ asyoke ĩtunĩ, Yesũ nĩwaĩkĩĩthisye amanyĩwʼa make kana ndesaa kũmatia. (Yoana 14:18) O na ĩngĩ nĩwamathie “mũtetheesya” na asya kana mũtetheesya ũsu nĩ “veva mũtheu, ũla Asa wĩtũma ĩsyĩtwanĩ yakwa.” (Yoana 14:25-27) Kwa nzĩa ĩsu na ingĩ mbingĩ, Yesũ nĩwoombanisye aatĩĩi make kwondũ wa mawetu ala maĩ mbee.