Motalo
24 Yĩla Mbalaamu woonie kana Yeova endaa* kũathima Isilaeli, ndaathi ĩngĩ kũmanthĩthya kana ve maũndũ mathũku mameteele, ĩndĩ athyũũie ũthyũ wake asisye weũnĩ. 2 Na yĩla Mbalaamu wookĩlilye metho na oona Aisilaeli mambĩte maeema kwosana na mbaĩ syoo, veva wa Ngai wooka ĩũlũ wake. 3 Na ĩndĩ aneena na nthimo, ayasya:
“Ii nĩ ndeto sya Mbalaamu mwana wa Mbeoli,
Na ndeto sya mũndũ ũsalukĩtwʼe metho,
4 Ndeto sya mũndũ wĩwʼĩte ndeto ya Ngai,
Ũla wonetwʼe woni nĩ Mwene Vinya W’onthe,
Ũla ũkumanĩte asalukĩtye metho make:
5 Maeema maku ko nĩ manake, we Yakovo,
Mawĩkalo maku, we Isilaeli!
6 Nĩmanyaĩĩkĩte nginya kũasa o ta syanda,
O ta mĩũnda yĩ ũtee wa ũsĩ,
O ta mĩtĩ yĩ mũuke mũseo ĩvandĩtwe nĩ Yeova,
O ta mĩtalakwe* yĩ ũtee wa kĩw’ũ.
7 Kĩw’ũ nĩkĩnyũlũlũkaa kuma ndoonĩ syake ilĩ sya kĩthuma,
Na mbeũ yake ĩvandĩtwe* ũtee wa kĩwʼũ kingĩ.
Mũsumbĩ wake o nake akeethĩwa e mũnene kwĩ Akaki,
Na ũsumbĩ wake ũkataĩwa mũno.
8 Ngai nũmaumĩtye Misili;
Ailye ta mbya sya nzaũ ya kĩthekanĩ sya kũmaseseea.
Akamina i mbaĩ, o ala mamũthĩnasya,
Na mavĩndĩ moo akatanyukanga, na akamavevenza na maangi make.
9 Nũkomete nthĩ, nũthũmũĩte o ta mũnyambũ,
Na o ta mũnyambũ, nũũ ũtata kũmũamũkya?
Ala makũathimaa nĩ aathime,
Na ala makũumanĩaa nĩ aumanĩe.”
10 Nĩvo ĩndĩ Mbalaki wathilĩkĩile Mbalaamu. Na Mbalaki akũnanyʼa moko make na kĩvũthya na amwĩa Mbalaamu: “Nĩnakwĩtie nĩ kana ũumanĩe amaitha makwa, ĩndĩ vandũ va ũu, mavindanĩ aa atatũ wĩkĩte o kũmaathima. 11 Yu syoka kwaku na mĩtũkĩ. Nĩnavangĩte ũkũtaĩa mũno, ĩndĩ sisya! Yeova nĩwaũvata ndaĩa ĩsu.”
12 Na Mbalaamu amũsũngĩa Mbalaki amwĩa: “Nyie ndyaatavya aũme ala watũmĩte atĩĩ: 13 ‘O na Mbalaki akanenga nyũmba yake yusĩe vetha na thaavu, ndyĩsa kwĩka na ngenda* ũndũ o na ũmwe ũũvĩtũũkana na mwĩao wa Yeova, wĩthĩwe nĩ mũseo kana nĩ mũthũku, na kana nganeena o kĩla Yeova ũkũndavya’? 14 Na yu nĩngũsyoka kwa andũ makwa. Ũka ngũtavye maũndũ ala andũ aa makeka andũ maku ĩvinda yũkĩte.”* 15 Na kwoou aneena na nthimo, ayasya:
“Ii nĩ ndeto sya Mbalaamu mwana wa Mbeoli,
Na ndeto sya mũndũ ũsalukĩtwʼe metho,
16 Ndeto sya mũndũ wĩwʼĩte ndeto ya Ngai,
Na ũla wĩ na ũmanyi wa Ũla wĩ Ĩũlũ wa Onthe,
Nake nĩwooniwʼe woni nĩ Mwene Vinya W’onthe
Yĩla wakumanĩte asalukĩtye metho make:
17 Ngamwona, ĩndĩ ti oyu;
Ngamũketeea, ĩndĩ ti mĩtũkĩ.
Ndata ĩkauma kwa Yakovo,
Na ndata ya ũsumbĩ ĩkookĩla kuma Isilaeli.
Na vate ndĩi akaatũa kĩtulya kya Moavi*
Na kĩngʼala kya ana onthe ma kĩthokoo.
18 Na Etomu ĩkatw’ĩka yeene,
Ĩĩ, Seili ĩkatw’ĩka ya amaitha mayo,
Nayo Isilaeli ĩkoonanyʼa ũkũmbaũ wayo.
19 Na ũmwe kuma kwa Yakovo akathi asindĩte,
Na akaananga ũla wavonoka kuma ndũanĩ.”
20 Na yĩla woonie Amaleki, aendeea kũneena na nthimo, ayasya:
“Amaleki nĩwe waĩ wa mbee katĩ wa i mbaĩ,
Ĩndĩ mũthya akathela.”
21 Na yĩla woonie Akeni, aendeea kũneena na nthimo, ayasya:
“Wĩkalo waku nĩ mũsũvĩĩku, na ũtũo waku wĩ ĩvianĩ ĩũlũ.
22 Ĩndĩ mũndũ akavĩvya Akeni.*
Vevĩta ĩvinda yĩana ata Aasuli mataũtavĩte?”
23 Na aendeea kũneena na nthimo, ayasya:
“Nĩ kyeva ta kĩ! Nũũ ũkavonoka yĩla Ngai ũkeka ũu?
24 Meli ikauma ũtee wa ũkanga kũu Kitimu,
Na makathĩny’a Asuli,
Na makathĩny’a Eveli.
Ĩndĩ o nake akathela vyũ.”
25 Na ĩndĩ Mbalaamu ookĩla na athi na asyoka kwake. Na Mbalaki o nake akwata nzĩa ĩ yake athi.