Kũtũngĩlĩĩlwa kwa Mĩao

14 “Mwĩ ana ma Yeova Ngai wenyu. Mũiketemange kana mwenze itulya syenyu ngunũ* kwondũ wa mũndũ mũkwʼũ. 2 Nũndũ mwĩ andũ atheu kwa Yeova Ngai wenyu, na Yeova nũmũnyuvĩte mũtwʼĩke andũ make, malĩ yake ya mwanya,* kuma ngonĩ syonthe sya andũ ila syĩ ĩũlũ wa nthĩ.

3 “Mũikaye kĩndũ o na kĩva kya kũthatya. 4 Ii nĩsyo nyamũ ila mũtonya kũya: nzaũ, ĩlondu, mbũi, 5 nthia, kĩlongʼa, nthwaia, mbũi ya kĩthekanĩ, nzwaala, ĩlondu ya kĩthekanĩ, na ĩlondu ya kĩĩmanĩ. 6 No mũye nyamũ o na yĩva yĩ na ĩvũngũ yatũku yĩaanĩkĩte kelĩ na ĩthaumasya. 7 Ĩndĩ, mũikaye nyamũ ii iatĩĩe ila ithaumasya kana syĩ na mavũngũ matũku: ngamĩle, mbũkũ, na kĩnyowe, nũndũ nithaumasya ĩndĩ iyĩthĩawa na mavũngũ matũku. Nĩ mbuku kwenyu. 8 O na ngũlũe nũndũ yĩ ĩvũngũ yatũku ĩndĩ ndĩthaumasya. Nĩ mbuku kwenyu. Mũikaye nyama syasyo kana mũkwate simba syasyo.

9 “Katĩ wa syũmbe syonthe ila syĩkalaa kĩw’ũnĩ, no mũye ii: Kyũmbe o na kĩva kĩ nthwau na makwaũ, no mũye. 10 Ĩndĩ mũikaye kyũmbe o na kĩva kĩte na nthwau na makwaũ. Nĩ kĩvuku kwenyu.

11 “No mũye nyũnyi o na yĩva ĩte mbuku. 12 Ĩndĩ mũikaye ii: ndiũ, kĩvaalala, ndei nziũ, 13 mbolosya ndune, mbolosya nziũ, kĩla mũthemba wa kĩmangaũ, 14 kĩla mũthemba wa ngũngũũ, 15 nyaa, ndunduli, ĩngwʼaa, kĩla mũthemba wa kĩlũĩ, 16 ndunduli nini, ndunduli yĩ matũ maasa, ĩvata ya kĩwʼũnĩ, 17 ngunĩ, ndei, ĩvutavutĩlya, 18 ĩsaũ, kĩla mũthemba wa ĩkũthakũthĩi, ngomakomi, na ũvuvu. 19 O nasyo syũmbe syonthe syĩ nthwau ila syĩkalaa syĩ ikundi* nĩ mbuku kwenyu. Iyaĩlĩte kũĩwa. 20 No mũye kyũmbe o na kĩva kĩte kĩvuku kĩũlũkaa.

21 “Mũikaye nyamũ o na yĩva yĩthĩiwe yĩ ngwʼũ. No mũmĩnenge mwĩkali wa ũeninĩ ũla wĩkalaa ndũanĩ syenyu,* na no amĩye, kana mũmĩthooesye mũeni. Nũndũ mwĩ andũ atheu kwa Yeova Ngai wenyu.

“Mũikatheũkĩsye katena ka mbũi ĩianĩ ya inyia wako.

22 “No nginya mũnengane kĩlungu kya ĩkũmi kya ũsyao wa mbeũ sya mĩũnda yenyu mwaka kũthi ũla ũngĩ. 23 Mũkaĩĩa kĩlungu kya ĩkũmi kya lĩu wenyu wa mbaa ngetha, mbinyu yenyu nzaũ, mauta menyu, na makithathi ma* ngʼombe syenyu na malondu na mbũi syenyu mbee wa Yeova Ngai wenyu vala ũkanyuva ĩsyĩtwa yake yĩkalae, nĩ kana mwĩmanyĩsye kũmũkĩaa Yeova Ngai wenyu mavinda onthe.

24 “Ĩndĩ ethĩwa kyalo kĩu nĩ kĩasa mũno kwenyu na mũitonya kũkua syĩndũ isu nginya vala Yeova Ngai wenyu ũnyuvĩte kwondũ wa ĩsyĩtwa yake nĩkwĩthĩwa nĩ vaasa mũno nenyu (nũndũ Yeova Ngai wenyu akamũathima), 25 no mũithoosye, na mũikua mbesa isu mokonĩ menyu, nginya vala Yeova Ngai wenyu wĩnyuva. 26 Na ĩndĩ no mũtũmĩe mbesa isu kũthooa kĩndũ o na kĩva mũkwenda.* No mũthooe ngʼombe, malondu, mbũi, mbinyu na syĩndũ ingĩ sya kũnyuwa itonya kũtuma mũmilwa, na kĩndũ o na kĩva kĩũmwendeesya;* na mũkaĩĩa vau mbee wa Yeova Ngai wenyu na mũitana, inywʼĩ na andũ ma mĩsyĩ yenyu. 27 Na mũikalekeleelye Mũlivai ũla wĩ ndũanĩ syenyu, nũndũ ndanengetwe kĩanda kana ũtiĩwa vamwe nenyu.

28 “Mũthyanĩ wa kĩla myaka ĩtatũ, mwaĩlĩte kũete kĩlungu kyonthe kya ĩkũmi kya ũsyao wenyu kwondũ wa mwaka ũsu na mũikia ndũanĩ syenyu. 29 Na ĩndĩ Mũlivai ũla ũtanengetwe kĩanda kana ũtiĩwa vamwe nenyu, mwĩkali wa ũeninĩ, mwana ũte ĩthe,* na mũndũ mũka ndiwa ũla wĩ ndũanĩ syenyu akooka na aiya avũne, nĩ kana Yeova Ngai wenyu amũathime maũndũnĩ onthe ala mũkwĩka.