Yosua

6 Yu ĩndĩ, mũomo wa ndũa ya Yeliko nĩwavingĩtwe vyũ nũndũ wa Aisilaeli; vai mũndũ o na ũmwe waumalaa kana akalika.

2 Na Yeova eea Yosua atĩĩ: “Sisya, nĩnĩnenganĩte mokonĩ maku ndũa ya Yeliko na mũsumbĩ wayo na ngũmbaũ syayo syĩ vinya. 3 Endai mũthyũlũlũke ndũa, we na aũme onthe ma kaũ, na mwĩmĩthyũlũlũka o ĩvinda yĩmwe. Ũu nĩwʼo mũkekaa kwa ĩvinda ya mĩthenya thanthatũ. 4 Ĩaĩe athembi mũonza makue mbya mũonza sya ndũũme na maithi me mbee wa yĩla Ĩsandũkũ. Ĩndĩ mũthenyanĩ wa mũonza, mũkathyũlũlũka ndũa mavinda mũonza na athembi makavuva mbya isu. 5 Yĩla mbya isu sya ndũũme ikavuvwa, mweewʼa wasya wasyo* oou, andũ onthe meũkĩlya wasya mũnene wa kaũ. Na ũkũta wa ndũa ũkavalũka nthĩ, na no nginya kĩla mũndũ elika ndũanĩ ĩsu ateũtindĩa.”

6 Na kwoou Yosua mwana wa Nuni eeta athembi vamwe, na amea atĩĩ: “Osai ĩsandũkũ ya ũtianĩo, na athembi mũonza nĩmakue mbya mũonza sya ndũũme me mbee wa Ĩsandũkũ ya Yeova.” 7 Na eea andũ: “Endai mũthyũlũlũke ndũa, na nguthu sya aũme ala me na mĩio ya kaũ syaĩlĩte kũthi syĩ mbee wa Ĩsandũkũ ya Yeova.” 8 Na o tondũ Yosua watavisye andũ, athembi mũonza makuĩte mbya mũonza sya ndũũme mbee wa Yeova nĩmavĩtie mbee na mavuva mbya isu, na ĩsandũkũ ya ũtianĩo wa Yeova yaĩ ĩtina woo. 9 Na nguthu sya aũme ala maĩ na mĩio ya kaũ syathi mbee wa athembi ala mavuvaa mbya, na nguthu ĩla yamaseseee ĩtina yaatĩĩa Ĩsandũkũ yĩu o athembi maendeee kũvuva mbya isu mate kũeka.

10 Yu ĩndĩ, Yosua aĩ anameaĩa andũ akamea atĩĩ: “Mũikalonzanyʼe, na mawasya menyu maikatate kwĩwʼĩka. Mũikaneene ndeto o na ĩmwe nginya mũthenya ũla ngamwĩa, ‘Lonzanyʼai!’ Nĩvo ĩndĩ mũkalonzanyʼa.” 11 Na eeĩaa Ĩsandũkũ ya Yeova yĩthyũlũlũkwʼe ndũa ĩsu, ĩthyũlũlũka o yĩmwe. Ĩtina wa ũu, nĩmasyokie kambinĩ na makomela vau ũtukũ ũsu.

12 Ũnĩ wake Yosua nĩwaamũkie kwakya tene, na athembi moosa Ĩsandũkũ ya Yeova, 13 na athembi mũonza makuĩte mbya mũonza sya ndũũme matambya me mbee wa Ĩsandũkũ ya Yeova, na nĩmavuvaa mbya isu mate kũeka. Na nguthu sya aũme me na mĩio ya kaũ syaĩ mbee woo, nayo nguthu ĩla yamasesee ĩtina yaatĩĩe Ĩsandũkũ ya Yeova, o athembi maendeee kũvuva mbya mate kũeka. 14 Mũthenyanĩ wa kelĩ nĩmathyũlũlũkile ndũa ĩsu o ĩthyũlũlũka yĩmwe, na ĩtina wa ũu, masyoka kambinĩ. Ũu nĩwʼo meekie kwa ĩvinda ya mĩthenya thanthatũ.

15 Na mũthenyanĩ wa mũonza kwakya oou, mookĩla tene na mathi mathyũlũlũkĩte ndũa mavinda mũonza o ũndũ mathyũlũlũkaa mĩthenya ĩla ĩngĩ. No mũthenya ũsu wĩ wʼoka mathyũlũlũkile ndũa mavinda mũonza. 16 Na ĩvindanĩ ya mũonza, athembi mavuva mbya, na Yosua eea andũ atĩĩ: “Lonzanyʼai, nũndũ Yeova nũmũnengete ndũa ĩno! 17 Ndũa ĩno na kyonthe kĩla kĩ nthĩnĩ wayo syaĩlĩte kwanangwa vyũ; syonthe nĩ sya Yeova. No Laavi, ũla mũndũ mũka ĩlwaya, waĩlĩte kwĩkala thayũ, we na onthe ala me nake nyũmba, nũndũ nĩwavithie ala aũme twatũmie. 18 Ĩndĩ mũikathengeee syĩndũ ila syaĩlĩte kwanangwa vyũ, nĩ kana mũikende kĩndũ kyaĩlĩte kwanangwa vyũ na mũikyosa, na nũndũ wa ũu, mũietee kambi ya Isilaeli mũisyo* na mũituma ĩtwʼĩka kĩndũ kyaĩlĩte kwanangwa vyũ. 19 Ĩndĩ vetha wʼonthe na thaavu wʼonthe na syĩndũ syonthe sya ũthuku na kyũma* nitheetwʼe kwondũ wa Yeova. Syaĩlĩte kũtwawa vala vaiawa ũthwii wa Yeova.”

20 Na yĩla mbya syavuviwe, andũ malonzanyʼa. Makililye meewʼa wasya wa mbya isu oou mookĩlya wasya mũnene wa kaũ, na ũkũta wavalũka nthĩ. Ĩtina wa ũu, kĩla ũmwe woo nĩwalikile ndũanĩ ateũtindĩa, na mamĩkwata. 21 Nĩmatemangie vyũ na ũvyũ kyonthe kĩla kyaĩ ndũanĩ, aũme na aka, anini na akũũ, nzaũ syonthe, malondu, na mangʼoi.

22 Na Yosua eea ala aũme elĩ mathianĩte nthĩ ĩsu atĩĩ: “Endai nyũmbanĩ ya ũla mũndũ mũka ĩlwaya na mũimumaalya vamwe na andũ make onthe, o tondũ mwamwĩvĩtĩie.” 23 Na anake asu athiani mathi na maumaalya Laavi, vamwe na ĩthe wake, na inyia wake, ana-a-ĩthe, na andũ make onthe; maumaalilye mũsyĩ wake wʼonthe, na mamavikya nza wa kambi ya Isilaeli me asũvĩĩku.

24 Na ĩndĩ mavĩvya ndũa ĩsu na mwaki na kyonthe kĩla kyaĩ nthĩnĩ wayo. Ĩndĩ vetha, thaavu, na syĩndũ sya ũthuku na kyũma,* mainengane iiwe vala vaiawa ũthwii wa nyũmba ya Yeova. 25 No Laavi, ũla waĩ ĩlwaya, na nyũmba ya ĩthe wake na andũ make onthe mavonokiwʼe nĩ Yosua; na kũvika ũmũnthĩ ekalaa Isilaeli, nũndũ nĩwavithie ala aũme Yosua watũmie mathiane Yeliko.

26 Ĩvindanĩ yĩu, Yosua nĩwaneenie na andũ na amatavya wĩvĩto ũũ:* “Naumanĩwe mbee wa Yeova mũndũ ũla ũkatwʼa kũtũngĩĩa ndũa ĩno ya Yeliko. Eekĩa mũsingi wayo akakwʼĩĩwa nĩ mwana wake ũla mũkũũ, na aũngamya mĩomo yayo akakwʼĩĩwa nĩ mwana wake ũla mũnini.”

27 Na Yeova aĩ vamwe na Yosua, na nguma yake nĩyanyaĩĩkie nthĩ yonthe.