ĨSOMO YA 25
Nĩkĩ Ngai Watũmbie?
Mbivilia yaĩtye kana mũndũ “nĩ wa mĩthenya mĩvũthũ, na ausũĩte thĩna.” (Yovu 14:1) Yo ũu nĩwʼo Ngai wendaa twĩkalae? Ethĩwa ũu tiwʼo wendaa, kĩeleelo kyake kwelekela andũ nĩ kĩva? Akeanĩsya kĩeleelo kĩu? Sisya wone ũndũ Mbivilia ĩsũngĩĩte makũlyo asu kwa nzĩa ya kwendeesya.
1. Yeova endaa twĩkale ata?
Yeova endaa twĩkale nesa ũndũ vatonyeka. Yĩla woombie andũ ma mbee, Atamu na Eva, amaiie mũũndanĩ waĩ mwanake mũno weetawa Eteni. Na ĩndĩ “Ngai amaathima: na Ngai amea, Ongelekai, mwingĩve, musũsye nthĩ, na kũmĩkĩlya vinya.” (Mwambĩlĩlyo 1:28) Yeova endaa masyae syana, matwʼĩkĩthye nthĩ yonthe valatiso, na maisũvĩa nyamũ. Endaa andũ onthe mekale tene na tene me atanu na me na ũima wa mwĩĩ.
O na kau maũndũ mayaathi ũndũ Ngai wavangĩte,a kĩeleelo kyake kĩyaavĩndũka. (Isaia 46:10, 11) Endaa andũ ala mamwĩwʼaa meĩkala tene na tene na mate kũthĩna.—Soma Ũvuanyʼo 21:3, 4.
2. Tũtonya kwĩka ata twĩkale twĩ atanu ũmũnthĩ?
Yeova atũmbie twĩ na “nzaa ya kĩ-veva,” ĩla nĩ wendi wa kũmũmanya na kũmũthaitha. (Soma Mathayo 5:3-6.) Endaa twĩthĩwe na ngwatanĩo ya vakuvĩ nake, “na kũendaa nzĩanĩ syake syonthe, na kũmwendaa,” na kũmũthũkũmaa “na ngoo [yitũ] yonthe.” (Kũtũngĩlĩlwa Kwa Mĩao 10:12; Nthimo 3:32) Yĩla tweeka ũu, tũkekalaa twĩ atanu o na ethĩwa twĩ na mathĩna. Kũmũthaitha Yeova nĩkũtumaa twĩkala twĩ eanĩe, nũndũ nĩtwĩsĩ twĩkalĩte kwosana na ũndũ wendaa.
ĨMANYĨSYE MŨNANGO
Ĩmanyĩsye wone ũndũ Yeova woonanisye kana nũtwendete mũno yĩla woombaa nthĩ, na ũndũ Ndeto yake ĩmanyĩasya ĩũlũ wa kĩeleelo kyake kwelekela andũ.
3. Yeova endaa andũ mekale mate kũthĩna
Ĩloelei VITIO, na ĩndĩ mũineenea ĩkũlyo yĩĩ yĩatĩĩe:
Nĩkĩ Ngai watũmbĩie nthĩ yanakavĩte ũu?
Mbivilia yaĩtye kana Yeova “nĩwiĩte ĩvinda ya tene na tene ngoonĩ” sitũ. (Mũtavanyʼa 3:11, NWT) Neeneai ĩkũlyo yĩĩ:
Kwosana na ĩandĩko yĩu, kĩeleelo kya Yeova kwelekela andũ nĩ kyaũ?
4. Kĩeleelo kya Yeova kĩyaalyũka
Somai Savuli 37:11, 29 na Isaia 55:11, na ĩndĩ mũineenea ĩkũlyo yĩĩ:
Twĩsĩ ata kana kĩeleelo kya Yeova kwelekela andũ kĩyaalyũka?
Nyũmba yaekiwe yaanangĩka no ĩtũngĩĩwe ĩkaseũva ĩngĩ. O ta ũu, nũndũ andũ nĩmalekeleelye nthĩ ĩkanangĩka, Ngai akamĩtũngĩĩa yĩthĩwe yĩ nzeo, na ĩitũa ala mamwendete
5. Yĩla twamũthaitha Yeova nĩtwĩkalaa twĩ atanu
Kũmanya kĩeleelo kya kwĩthĩwa thayũ no kũtũetee ũtanu. Ĩloelei VITIO, na ĩndĩ mũineenea ĩkũlyo yĩĩ:
Terumi atethekie ata amanya kĩeleelo kya kwĩthĩwa thayũ?
Somai Mũtavanʼya 12:13, na ĩndĩ mũineenea ĩkũlyo yĩĩ:
Nũndũ Yeova nũtwĩkĩte maũndũ maingĩ, twaĩle kwĩka ata twonanyʼe kana nĩtũũmũtũngĩa mũvea?
ANDŨ AMWE NO MAKŨLYE: “Kyo kĩeleelo kya kwĩthĩwa thayũ nĩ kyaũ?”
We ũtonya kũsũngĩa ata?
KĨLA TWEEMANYĨSYA
Yeova endaa twĩkale thayũ tene na tene vaa ĩũlũ wa nthĩ tũte kũthĩna. Yĩla twamũthaitha na ngoo yonthe tũkekalaa twĩ atanu mavinda onthe.
Makũlyo ma Kũsyokeleela
Yĩla Yeova woombie Atamu na Eva, aĩ na kĩeleelo kĩva?
Twĩsĩ ata kana kĩeleelo kya Ngai kwelekela andũ kĩyaalyũka?
Ũtonya kwĩka ata nĩ kana wĩkalae wĩ mũtanu?
MAŨNDŨ ANGĨ MA KWĨMANYĨSYA
Soma wone nĩkĩ tũte na nzika kana mũũnda wa Eteni waĩ kwʼo.
“Ngewa ya Mũũnda wa Eteni Nĩ ya Wʼo Kana No Wano?” (Mũsyaĩĩsya, Ĩtukũ 1, Mwei wa 1, 2011)
Soma wone nĩkĩ tũte na nzika kana nthĩ ĩkekala tene na tene.
Soma wone kĩla Mbivilia yaĩtye waĩle kwĩka nĩ kana wĩkale na ũtanu.
Ĩloele vitio wone ũndũ mũndũũme ũmwe wasũanĩaa ta wĩ na kĩla kĩndũ wesie kwĩthĩa ve kĩndũ wakosete thayũnĩ.
a Ĩsomonĩ yĩla yĩatĩĩe, nũkwĩmanyĩsya kĩla kyaendeeie.