No Wĩkale Ĩũlũ wa Nthĩ Tene na Tene

ŨSU NĨ WĨKWATYO MŨSEO MŨNO! Mũmbi witũ nũtwathĩte kũtũnenga thayũ ũtathela vaa ĩũlũ wa nthĩ. Ĩndĩ, andũ aingĩ nĩmewʼaa vinya kũĩkĩĩa ũndũ ũsu. Maasya kana, ‘kĩla mũndũ no nginya akwʼe. Angĩ monaa nĩ ũndũ ũtonyeka kwĩkala tene na tene, ĩndĩ ti ĩũlũ wa nthĩ. Maasya kana mũndũ atonya kũkwata thayũ ũtathela akwʼa na athi ĩtunĩ. Wĩ na woni mwaũ?

Ũtanamba kũamũa, kwavindĩĩsya mosũngĩo ma Mbivilia ma makũlyo aa atatũ: Ũndũ mũndũ ũmbĩtwe ũtũtetheeasya ata kũmanya ĩvinda yĩla woombĩtwe ekale? Nĩ kyaũ kyaĩ kĩeleelo kya mbee kya Ngai ĩũlũ wa nthĩ na andũ? Kweethĩiwe ata nĩ kana andũ mambĩĩe kũkwʼa?

MŨNDŨ OMBĨTWE KWA NZĨA YA MWANYA VYŨ

Katĩ wa syĩndũ syonthe ila Ngai woombie ĩũlũ wa nthĩ, andũ mombĩtwe kwa nzĩa ya mwanya vyũ. Ũu weethĩiwe ata? Mbivilia yonanasya kana andũ oka mombĩtwe na “mũvwʼano” na “kĩtutya” kya Ngai. (Mwambĩlĩlyo 1:26, 27) Ũu nĩ kwonanyʼa ata? Nĩ kwonanyʼa kana andũ me na ndaĩa ta sya Ngai. Ndaĩa isu nĩ ta wendo na ũsili wa katĩ.

O na ĩngĩ, andũ mombĩtwe me na ũtonyi wa kũmanya ũseo na ũthũku, na me na wendi wa kwĩthĩwa na ngwatanĩo nzeo na Ngai. Kĩu nĩkyo kĩtumi twendeeawʼa nĩ ũnene wa nthĩ na syĩndũ sya ũsengyʼa ila Ngai woombie, vamwe na ũtonyi wa kũsola mavisa, na kwina mbathi. Na ũndũ ũla mũnene vyũ nĩ kana, mũndũ ombĩtwe e na ũtonyi wa mwanya wa kũmũthaitha Mũmbi. Ndaĩa isu nitumaa andũ methĩwa me kĩvathũkanyʼo vyũ na syũmbe ila ingĩ syĩ ĩũlũ wa nthĩ.

Kwasũanĩa ũndũ ũũ: Ngai ethĩwa anengie andũ ndaĩa isu iseũvĩte ũu na sya mwanya, vamwe na ũtonyi mũnene wa kũiseũvĩĩsya, ethĩwa endaa twĩkale o myaka 70 kana 80? Ũwʼo nĩ kana Ngai atũnengie ndaĩa isu sya mwanya na ũtonyi wa mwanya nĩ kana twĩthĩwe tũtonya kũtanĩa thayũ vaa ĩũlũ wa nthĩ tene na tene.

KĨELEELO KYA MBEE KYA NGAI

Andũ amwe maasya kana Ngai ndavangĩte andũ mekale ĩũlũ wa nthĩ tene na tene. Maasya kana nthĩ nĩ wĩkalo wa kavinda o kanini, vala Ngai ũtataa andũ nĩ kana amanye kana nĩmaĩle kũthi ĩtunĩ makekalae nake tene na tene. Ĩndĩ keka ũu nĩ wʼo, ũu wĩthĩwa ũyonanyʼa kana mothũku onthe ala mausĩe ĩũlũ wa nthĩ maumanĩte na Ngai. Ũndũ ũsu wĩthĩwa ũivĩngana vyũ na ũndũ Ngai ũilyĩ. Mbivilia yaĩtye ũũ ĩũlũ wake: “Nũndũ nzĩa syake syonthe nĩ ndũngalu: Ngai wa kĩthito na ũte na naĩ, Nake nĩ wa wʼo na mũlũngalu.”—Kũtũngĩlĩlwa Kwa Mĩao 32:4.

Mbivilia yĩeleasya nesa kĩeleelo kya mbee kya Ngai kwa nthĩ. Yaasya atĩĩ: “Matu nĩ matu ma Yeova; Ĩndĩ nthĩ nũnengete ana ma andũ.” (Savuli 115:16) Kwoou, Ngai oombie nthĩ yĩ mbanake, mũsyĩ wa kwĩkala andũ tene na tene, na amyusũsya kyonthe kĩla andũ mendaa nĩ kana matanĩe thayũ tene na tene.—Mwambĩlĩlyo 2:8, 9.

“Matu nĩ matu ma Yeova; Ĩndĩ nthĩ nũnengete ana ma andũ.”—Savuli 115:16

O na ĩngĩ, Mbivilia nĩyĩeleetye nesa kĩeleelo kya Ngai kwa andũ. Ngai aathimie andũ elĩ ma mbee na amea ‘usũsyai nthĩ, na kũmĩkĩlya vinya; na ĩthĩwai na ũsumbĩko, ĩũlũ wa kĩla kĩndũ kĩ thayũ kĩendaa ĩũlũ wa nthĩ.’ (Mwambĩlĩlyo 1:28) Kyaĩ kĩanda kya mwanya kwoo kũsũvĩa na kũthanthasya mũsyĩ woo ũvike nthĩ yonthe! Kwa wʼo, wĩkwatyo wa Atamu na Eva na nzyawa syoo waĩ kwĩkala thayũ ĩũlũ wa nthĩ tene na tene, ĩndĩ ti kũthi kwĩkala ĩtunĩ.

NĨKĨ TŨKUSAA?

Ĩndĩ, nĩkĩ tũkusaa? Mbivilia yonanasya kana kyũmbe kĩmwe kya veva kĩla kyoombiwe nĩ Ngai, kĩtawa Satani na Ndevili, nĩkyatatie kwananga mĩvango ya Ngai ĩla wambĩĩisye mũũndanĩ wa Eteni. Kyũmbe kĩu kyeekie ũu ata?

Satani amasesengie asyai maitũ ma mbee Atamu na Eva, maleane na Ngai o take. Ĩla Satani wawetie kana ve kĩndũ kĩseo Ngai wamavatĩte, kĩla nĩ ũtonyi wa kũmanya ũseo na ũthũku, nĩmanyuvie kwĩkwatanyʼa na Satani na maleana na Ngai. Nĩ kyaũ kyeethĩiwe ĩtina wa ũu? Ĩtina wa ĩvinda, nĩmakwie, o tondũ Ngai waĩtye. Nĩmaaisye wĩkwatyo wa kwĩkala tene na tene ĩũlũ wa Nthĩ Nzaũ.—Mwambĩlĩlyo 2:17; 3:1-6; 5:5.

Ũlei wa Atamu na Eva nĩwatumie andũ onthe makwatwa nĩ mathĩna. Ndeto ya Ngai yaĩtye atĩĩ: “Nũndũ wa mũndũ ũmwe [Atamu] naĩ yalikile kũũ nthĩ, na kĩkwʼũ kwondũ wa naĩ; na kwa ũu kĩkwʼũ kyavikĩa andũ onthe.” (Alomi 5:12) Tũkusaa nĩkwĩthĩwa nĩtwatiĩwe naĩ na kĩkwʼũ nĩ asyai maitũ ma mbee, ĩndĩ ti ũndũ wa ‘mũvango’ wa Ngai ũtaeleeka.

NO WĨKALE ĨŨLŨ WA NTHĨ TENE NA TENE

Ũlei ũla weethĩiwe Eteni ndwaasiĩĩa kĩeleelo kya mbee kya Ngai kwa andũ na nthĩ. Wendo wa Ngai vamwe na ũsili wake wa katĩ nĩwatumie aumĩlya nzĩa ya kũtũthasya kuma ũkombonĩ wa naĩ na kĩkwʼũ ila twatiĩwe nĩ asyai maitũ ma mbee. Mũtũmwa Vaulo aeleisye atĩĩ: “Ĩtuvi ya naĩ nĩ kĩkwʼũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.” (Alomi 6:23) Nũndũ nũtwendete, Ngai “nĩwanenganie Mwana wake e ũmwe [Yesũ Klĩsto], nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.” (Yoana 3:16) Kwa kwĩyumya na ngenda ethĩwe nthembo ya wovosyo, Yesũ nĩwatangĩĩie kyonthe kĩla kyaaiwʼe nĩ Atamu.a

O mĩtũkĩ, watho wa Ngai wa kũtwʼĩkĩthya nthĩ nzaũ ũkilyĩ ũneanĩa. Ũkatanĩa watho ũsu wa ĩvinda yũkĩte ethĩwa nũũkwata ndeto ii sya Yesũ. Aisye atĩĩ: “Votai inywʼĩ nthĩnĩ wa mbingĩlo ĩla ntheke: nũndũ mbingĩlo nĩ nthanthau, na nzĩa nĩ mbaamu, ĩla ĩelete wanangĩkonĩ, nao nĩ aingĩ ala mavotelaa mbingĩlonĩ ĩsu. Nũndũ mbingĩlo nĩ ntheke, na nzĩa nĩ nziĩĩe, ĩla ĩelete thayũnĩ, nao nĩ avũthũ ala mamyonaa.” (Mathayo 7:13, 14) Maũndũ ala ũũnyuva kwĩka ĩvindanĩ yĩĩ nĩmo mekwonanyʼa ũndũ ĩvinda yaku yũkĩte yĩkethĩwa yĩilyĩ. Wĩnyuva kwĩka ata?