7. (a) Aana eevĩtie ata, na nĩ kyaũ kyatumie evĩta? Mboya yake yasũngĩiwe ata? (b) Kwosana na wĩvĩto wa Aana, Samueli esaa kũtwʼĩka ũũ? (Sisya maelesyo ma kwongeleela.)

⁷ Aana o nake nĩweanĩisye wĩvĩto ũla wamwĩvĩtĩie Yeova. Amwĩvĩtĩie Yeova wĩvĩto wake ĩvinda waĩ na kĩmako na kyeva kingĩ ngoonĩ nũndũ wa kwĩthĩwa mbee aĩ ngũngũ, na kelĩ atindĩaa kũvũthwʼa nũndũ wa ũndũ ũsu. (1 Sam. 1:4-7, 10, 16) Aana amũtulũĩle Ngai ngoo yake na eevĩta atĩĩ: “Ame Yeova wa nguthu, ethĩwa wʼo ũkasisya thĩna wa mũthũkũmi waku mwĩĩtu, na ũindilikana nyie, na ũilea kũlwa nĩ mũthũkũmi waku mwĩĩtu, ĩndĩ ũkanenga mũthũkũmi waku mwĩĩtu, mwana mũũme, nĩvo ĩndĩ nĩmũnengane kwa Yeova mĩthenya yonthe ya thayũ wake, na vati wenzi ũkavika mũtwe wake.”a (1 Sam. 1:11) Mboya ya Aana nĩyasũngĩiwe ĩla wasyaie ĩkithathi yake ya kĩmwana. Ũndũ ũsu wamũtanĩthisye mũno! Ĩndĩ ndaatana nginya akolwa nĩ ũndũ wamwathĩte Ngai. Twĩsĩ ũu nũndũ ĩla wasyaie mwana wake aisye atĩĩ: “Nĩkwĩthĩwa nĩnamwĩtisye kwa Yeova.”—1 Sam. 1:20.