9, 10. (a) Nĩ mawetu meva Ndaviti na aũme make makomanaa namo kĩsionĩ kĩla maĩ? (b) Nĩkĩ Navali waaĩlĩte kũtũnga mũvea nũndũ wa kĩla Ndaviti na aũme make mamwĩkĩte? (O na ĩngĩ, sisya maelesyo ma kwongeleela ma kalungu ka 10.)

⁹ Navali ekalaa taoni yeetawa Maoni, ĩndĩ veonekana athũkũmaa vakuvĩ na taoni ĩngĩ yeetawa Kalimeli, na aĩ na mũũnda kwʼo.a Taoni isu syaĩ vandũ vokĩlĩĩle na vaĩ na nyeki nzeo ya kũĩthya malondu, na ũ Navali mwene aĩ na malondu 3,000. Ĩndĩ kĩsio kĩla kyathyũlũlũkĩte kyaĩ kĩtheka kĩthei. Ngalĩko ya ĩtheo nĩvo vaĩ na weũ wa Valani. Nayo ngalĩko ya wumĩlonĩ wa syũa nĩvo vaĩ Ũkanga wa Mũnyũ. Ũivika ũkanganĩ ũsu wesĩlaa yalatanĩ yeethĩawa na matwʼĩku na ngunga mbingĩ. Isionĩ isu nĩvo Ndaviti na aũme make meevithĩte. Me kũu nĩmathĩnaa na makomĩanĩsya na mawetu maingĩ nũndũ ti laisi kwĩkala weũnĩ. Na vate nzika, yaĩ no nginya masyĩme nĩ kana makwate kyaũya. Kũu nĩkwʼo makomanĩaa na ala aũme maĩ aĩthi ma Navali.