15, 16. (a) Veethĩiwe ata ĩtina wa Aana kũmũtulũĩla Yeova ngoo yake na kũmũthaitha ĩkalũnĩ? (b) Ngelekanyʼo ya Aana ĩtonya kũtũtethya ata yĩla twĩ na ũndũ ũũtũthĩnyʼa ngoonĩ?

¹⁵ Veethĩiwe ata ĩtina wa Aana kũmũtulũĩla Yeova kyonthe kĩla kyaĩ ngoonĩ yake na kũmũthaitha ĩkalũnĩ? Mbivilia ĩendeee kwasya atĩĩ: “Kwondũ wa ũu kĩveti [kĩu] kyathi, na kyaya; na ũthyũ wakyo ndwaatuka ĩngĩ.” (1 Sam. 1:18) Aana nĩweewie ausya. Eewie ta waaũa mũio ũsu wakuĩte na aũilĩĩla ituonĩ sya Ĩthe wake wa ĩtunĩ, ũla wĩ vinya kwĩ we. (Soma Savuli 55:22.) Vo ve thĩna ũtonya kũmũema Yeova? Aiee, Yeova ndaaemwa, na ndakaemwa o na ĩndĩĩ nĩ kũtetheesya andũ make!

¹⁶ Yĩla tũitavĩwe nĩ maũndũ, kana twĩmakĩĩte, nũseo tũkaatĩĩa ngelekanyʼo ya Aana kwa kũneena na Yeova mboyanĩ tũteũmũvitha kĩndũ, nũndũ Mbivilia yaasya kana “we [nĩ] ũla wĩwʼaa mboya.” (Sav. 65:2) Tweeka ũu, o naitũ tũkewʼaa kwĩmakĩa kwitũ kwathela na tũyusũwa nĩ “mũuo wa Ngai ũla ũvĩtũkĩte ũmanyi wʼonthe.”—Avi. 4:6, 7.

¹⁸ We Venina esie kũmanya ĩndĩĩ kana maũndũ ala weekaa Aana yu maiũmũthatya? Mbivilia ndĩwetete, ĩndĩ yaĩtye kana ‘ũthyũ wake ndwaatuka ĩngĩ,’ kwonanyʼa kana Aana nĩwasyokeiwe nĩ ũtanu wake na aeka kũmakwʼa nĩ mathĩna make kuma vau na kũendeea. O na kau tũimanya nesa Venina amanyie ũu ĩndĩĩ, veonekana vayaavĩta ĩvinda yĩasa atamanyĩte kana maũndũ ala weekaa Aana nĩmaekete kũmũthatya. O na kuma vau Mbivilia ndĩwetete ĩsyĩtwa yake ĩngĩ.