Tanĩa Ũseo Wĩanĩ Waku Mũmũ

1-3. (a) Andũ aingĩ mewʼaa ata ĩũlũ wa wĩa woo? (b) Mbivilia yĩkĩaa andũ vinya methĩwe na woni mwaũ ĩũlũ wa wĩa, na nĩ makũlyo meva tũũkunĩkĩla kĩlungunĩ kĩĩ?

ANDŨ aingĩ ũmũnthĩ maitanĩaa wĩa. Kũthũkũma masaa maingĩ mate kũtanĩa wĩa ũla meũtethya nĩkũtumaa mewʼa mateenda kũthi wĩanĩ ũsu kĩla mũthenya. Kwoou no twĩkũlye atĩĩ, Andũ ta asu matonya kwĩkĩwa vinya ata mende wĩa woo na mayĩwʼa me eanĩe?

² Mbivilia nĩmekĩaa andũ vinya methĩwe na woni mũseo ĩũlũ wa wĩa mũmũ. Yaasya kana wĩa na mosyao ala maumanaa nawʼo nĩ ũathimo. Solomoni aisye ũũ: “Nĩ mũthĩnzĩo wa Ngai kana kĩla mũndũ aye na kũnywʼa, na kũtanĩa ũseo wĩanĩ wake wʼonthe [mũmũ].” (Mũtavanʼya 3:13) Yeova nũtwendete na kwondũ wa ũu nũtwendeaa ũseo ĩvinda yonthe, na nĩwendaa twĩwʼe twĩ eanĩe wĩanĩ witũ na tũitanĩa mosyao mawʼo. Nĩ kana twĩkale wendonĩ wake, nĩtwaĩle kũatĩĩa myolooto yake na tũyĩthĩwa na woni ta wake ĩũlũ wa wĩa.—Soma Mũtavanʼya 2:24; 5:18.

³ Kĩlungunĩ kĩĩ nĩtũũsisya makũlyo aa ana: Tũtonya ata kũtanĩa ũseo wa wĩa witũ mũmũ? Nĩ mawĩa ma mũthemba wĩva ala Aklĩsto ma wʼo mataĩle kũthũkũma? Tũtonya kwĩka ata nĩ kana tũikavĩtye wĩa ũla tũthũkũmaa mbee wa maũndũ ma kĩ-veva? Na nĩ wĩa wĩva wa vata vyũ ũla tũtonya kũtethya? Ekai twambe kũkunĩkĩla ngelekanyʼo ya atethya elĩ ma wĩa ala anene vyũ ĩũlũ wa nthĩ yonthe, namo nĩ Yeova Ngai na Yesũ Klĩsto.

MŨTETHYA WA WĨA ŨLA MŨNENE VYŨ, NA MŨTHŨKŨMI MŨNENE

4, 5. Mbivilia yonanasya ata kana Yeova nĩ mũtethya wa wĩa wĩ kĩthito?

⁴ Yeova nĩwe mũtethya wa wĩa ũla mũnene vyũ. Ĩandĩko ya Mwambĩlĩlyo 1:1 yaĩtye: “Mwambĩlĩlyonĩ Ngai nĩwatwʼĩkĩthisye matu na nthĩ.” Ĩla Ngai waminie wĩa wake wa kũmba nthĩ na syĩndũ ila syĩ nthĩnĩ wayo, aisye kana wũmbi wake ‘waĩ mũseo mũno.’ (Mwambĩlĩlyo 1:31) Ũu nĩ kwasya kana nĩwatanĩthiwʼe vyũ nĩ wĩa wake wa kũmba nthĩ na syĩndũ ila syĩ nthĩnĩ wayo. Vate nzika Yeova ũla nĩ “Ngai mũtanu,” nĩwatanĩie mũno kwĩthĩwa e mũtethya wa wĩa wĩ kĩthito.—1 Timotheo 1:11, NWT.

⁵ Ngai witũ wĩ kĩthito no ũendeee kũtethya wĩa. Ĩvinda ĩasa ĩtina wa kũmbwa kwa nthĩ na syĩndũ ila syĩ vo, Yesũ aisye atĩĩ: “Kũvika na yu Asa wakwa nũtethasya wĩa.” (Yoana 5:17) Asa ethĩĩtwe ayĩka ata? Vai nzika kana ethĩĩtwe aimatongoesya andũ na kũmasũvĩa, e o wĩkalonĩ wake wa ĩtunĩ. Nĩwumĩlĩtye “kyũmbe kyeũ,” nakyo nĩ Aklĩsto masyaĩtwe kwa veva, ala mesumbĩka vamwe na Yesũ ĩtunĩ. (2 Akolintho 5:17) O na ĩngĩ, Yeova nĩwĩthĩĩtwe aianĩsya kĩeleelo kyake kwelekela andũ, nakyo nĩ kũmanenga ala mamwendete thayũ ũtathela nthĩnĩ wa nthĩ nzaũ. (Alomi 6:23) No nginya ethĩwe atanĩthawʼa mũno nĩ maũndũ maseo ala maumanĩte na wĩa ũsu wake. Andũ milioni mbingĩ nĩmetĩkĩlĩte ũvoo wa Ũsumbĩ nũndũ Ngai nũmakusĩtye na makaalyũla mĩendele yoo nĩ kana mekale wendonĩ wake.—Yoana 6:44.

6, 7. Nĩ kyaũ kĩkwonanyʼa kana Yesũ ethĩĩtwe e mũthũkũmi wĩ kĩthito kwa ĩvinda ĩasa?

⁶ Yesũ o nake ethĩĩtwe e mũthũkũmi wĩ kĩthito kwa ĩvinda ĩasa. Atanamba kũka kũũ nthĩ, aĩ “mũthũkũmi mũnene” wa Ngai nthĩnĩ wa wũmbi wa syĩndũ syonthe, “sya ĩtunĩ na sya kũũ nthĩ.” (Nthimo 8:22-31; Akolosai 1:15-17) Ĩla Yesũ waĩ kũũ nthĩ, nĩwaendeeie kwĩthĩwa e mũthũkũmi wĩ kĩthito. E mũnini, nĩweemanyĩisye wĩa wa kũseũvya syĩndũ sya mwako, na nĩkyo kĩtumi weetawa “mũseũvya wa mbwaũ.”a (Maliko 6:3) Ũsu waĩ wĩa wĩ vinya mũno na wendaa ũmanyi wa maũndũ me kĩvathũkanyʼo, mũno mũno ĩvinda ya tene ĩla kũtaĩ masinĩ sya kwatũa mbwaũ, nduka sya kũta mbwaũ, kana tũmasinĩ twa sitima. Kwasũanĩa Yesũ aendete kwĩmanthĩa mbwaũ. Kwa ngelekanyʼo, sũanĩa aitema mĩtĩ na aimĩkusya nginya vala ũkũtethesya wĩa. Kwakũna visa kĩlĩkonĩ Yesũ ayaka nyũmba kwa kũseũvya na kũathĩĩa mĩtĩ ya kĩala, kũseũvya mĩomo, o na aiseũvya ĩmwe ya mĩio ya nyũmba, ta ivĩla na mesa. Vai nzika kana Yesũ nĩwakwatie ũtanu ũla wumanaa na kũtethya wĩa mũmũ kwa ũtũĩka.

⁷ Yesũ aĩ na kĩthito kingĩ mũno nthĩnĩ wa wĩa wake wa kũtavanyʼa. Atethisye na kĩthito wĩa ũsu wa vata mũno myaka ĩtatũ na nusu. Nĩwatũmĩaa mĩthenya yake nesa kwa kũamũka kwakya tene na kũtavanyʼa nginya ũtukũ, nũndũ endaa kũneena na andũ aingĩ ũndũ vatonyeka. (Luka 21:37, 38; Yoana 3:2) Nĩwaendaa “ndũanĩ na mĩsyĩ, akĩtavanʼya na kũnyaĩĩkya ũvoo mũseo wa ũsumbĩ wa Ngai.” (Luka 8:1) Yesũ nĩwatembeie kĩlomita mbingĩ na maaũ, esĩle lelũnĩ syĩ kĩtoo nĩ kana avikĩsye andũ ũvoo mũseo.

8, 9. Yesũ atanĩie ata ũseo wĩanĩ wake mũmũ?

⁸ We Yesũ nĩwatanĩie ũseo ũla waumanie na wĩa wake mũmũ wa kũtavanyʼa? Ĩĩ! Nĩwavandie mbeũ sya wʼo ĩũlũ wa Ũsumbĩ, na atia mĩũnda yavikĩĩa ĩvinda ya ngetha. Kũtethya wĩa wa Ngai kwamwĩkĩie Yesũ vinya mwingĩ, weethĩa aĩ atonya kũlea kũya lĩu nĩ kana eanĩsye wĩa ũsu. (Yoana 4:31-38) Kwasũanĩa ũtanu ũla Yesũ waĩ nawʼo mũthyanĩ wa wĩa wake kũũ nthĩ, o na weethĩa no amũtavye Ĩthe wake ndeto ii: “Nĩnĩkũtaĩĩte kũũ nthĩ, nũndũ nĩnĩminĩte kwĩka wĩa ũla wanengie nĩke.”—Yoana 17:4.

⁹ Vate nzika, Yeova na Yesũ nĩmo ngelekanyʼo nzeo vyũ ya atethya ma wĩa ala matanĩaa ũseo wa wĩa woo mũmũ. Kũmwenda Yeova nĩkũtwĩkĩaa vinya ‘twĩyĩelekanyʼe na nake.’ (Aeveso 5:1) Nakwʼo kũmwenda Yesũ nĩkũtwĩkĩaa vinya ‘tũatĩĩe’ nyaĩĩ syake. (1 Vetelo 2:21) Kwoou, ekai twone ũndũ ithyĩ tũtonya kũtanĩa ũseo wĩanĩ witũ mũmũ.

ŨNDŨ TŨTONYA KŨTANĨA ŨSEO WĨANĨ WITŨ MŨMŨ

10, 11. Nĩ kyaũ kĩtonya kũtũtetheesya twĩthĩwe na woni mũseo kwelekela wĩa witũ?

¹⁰ O ta andũ ala angĩ, Aklĩsto ma wʼo nĩmethĩawa na wĩa wa kũthũkũma. O na ũu wĩ o vo, nĩmendaa kwĩthĩwa me atanu na me eanĩe ĩla meũthũkũma. Ĩndĩ, ũsu nũtonya kwĩthĩwa ne ũndũ wĩ vinya ethĩwa maiwendete. Tũtonya ata kũtanĩa ũseo wĩanĩ witũ ethĩwa tũiwendete?

¹¹ Ũndũ wa mbee nĩ kwĩthĩwa na woni mũseo. Ti mavinda onthe tũtonya kũalyũla wĩa ũla tũtethasya, ĩndĩ no tũalyũle woni witũ. Kũsũanĩĩa woni wa Ngai ĩũlũ wa wĩa no kũtũtetheesye o naitũ twĩthĩwe na woni mũseo. Kwa ngelekanyʼo, ethĩwa nue mwene mũsyĩ, lilikana kana wĩa waku, o na ethĩwa wĩoneka wĩ wĩa ũte vala ũĩ, nĩwʼo ũkũtetheeasya kwĩanĩsya mavata ma mũsyĩ waku. Kwoou, kwĩanĩsya mavata ma ala wendete ti ũndũ mũnini methonĩ ma Ngai. Ndeto yake yaĩtye kana ũla ũteanĩasya mavata ma andũ ma mũsyĩ wake “nĩ mũthũku mbee wa ũla ũtetĩkĩlĩte.” (1 Timotheo 5:8) Kũmanya kana wĩa waku nĩwʼo ũkũtetheeasya kwĩanĩsya kĩanda kyaku kĩla ũnengetwe nĩ Ngai, nĩkũtonya kũũtetheesya ũthũkũme wĩ na kĩeleelo, na wĩ mwĩanĩe. Na asu nĩ maũndũ athũkũmi ala angĩ matonya kwĩthĩwa makosete.

12. Nĩ kwa nzĩa syĩva tũkwataa moathimo tweethĩwa na kĩthito na ũĩkĩĩku wĩanĩ?

¹² Ũndũ wa kelĩ nĩ kwĩthĩwa na kĩthito na twĩ aĩkĩĩku. Kũtethya wĩa na kĩthito na kwĩmanyĩsya kũũtethya nesa nĩkũetae moathimo. Mavinda maingĩ, athũkũmi ala me kĩthito na ũtũĩka nĩmethĩawa mendetwe mũno nĩ anene moo. (Nthimo 12:24; 22:29) Nũndũ twĩ Aklĩsto ma wʼo, no nginya twĩthĩwe twĩ aĩkĩĩku wĩanĩ witũ—tũte kũya ĩvinda, mbesa, kana syĩndũ sya wĩanĩ. (Aeveso 4:28) O tondũ twonie kĩlungunĩ kĩla kĩthelu, ũĩkĩĩku nũetae moathimo. Mũthũkũmi mũĩkĩĩku nũtonya kwĩkwatwʼa. O na ethĩwa mũndũ ũla ũtũandĩkĩte nĩwonaa kĩthito kitũ wĩanĩ kana ndakyonaa, no tũkwate ũtanu ũla wumanaa na kwĩthĩwa na “wasya mũseo wa ngoo,” tũimanya kana kĩthito kitũ nĩkĩmũtanĩthasya Ngai ũla tũmwendete.—Aevelania 13:18; Akolosai 3:22-24.

13. Mwĩkalĩle mũseo wĩanĩ ũtonya kwĩthĩwa na mosyao maũ?

¹³ Ũndũ wa katatũ nĩ kũmanya kana mwĩkalĩle witũ nũtonya kũmũtaĩa Ngai. Tweethĩwa na mwĩkalĩle mũseo wa Kĩklĩsto wĩanĩ, vai nzika kana ala angĩ makoona ũndũ ũsu. Na ũu ũyĩthĩwa na ũsyao mwaũ? Nĩtũtonya ‘kwanakavya ũmanyĩsyo wa Ngai, Mũtangĩĩi waitũ.’ (Tito 2:9, 10) Ĩĩ, mwĩkalĩle witũ mũseo no ũtume angĩ mona kana ũthaithi witũ nĩ mũseo, na kwondũ wa ũu mayendeewʼa nĩwʼo. Kwasũanĩa ũndũ ũtonya kwĩwʼa ũkona mũndũ mũthũkũmaa ĩmwe ayĩmanyĩsya ũwʼo wa Mbivilia nũndũ wa ngelekanyʼo yaku nzeo wĩanĩ! O na ĩngĩ, kwasũanĩa ũndũ ũũ wa vata: Yo ve ũndũ ũngĩ ũetae ũtanu mwingĩ ũthonokete kũmanya kana mwĩkalĩle waku mũseo nũmũtaĩaa Yeova, na kũtanĩthya ngoo yake?—Soma Nthimo 27:11; 1 Vetelo 2:12.

KŨNYUVA WĨA KWA ŨĨ

14-16. Ĩla tũkwĩka ũtwi ĩũlũ wa wĩa wa kũandĩkwa, nĩ makũlyo meva ma vata twaĩle kwĩkũlya?

¹⁴ Mbivilia ndĩwetete ũtheinĩ mĩthemba ya wĩa ĩla twaĩle kũthũkũma, na ĩla tũtaĩle kũthũkũma. Ũu ti kwasya kana twaĩle kũthũkũma wĩa o na wĩva ũla twakwata o na ethĩwa twĩendeka twĩke ata. Maandĩko nĩmatonya kũtũtetheesya kũnyuva wĩa mũseo, waĩle, na ũũmwendeesya Ngai. O na ĩngĩ, no matũtetheesye tũlee wĩa ũla ũtonya kũmũthatya. (Nthimo 2:6) Ĩla tũkwĩka ũtwi ĩũlũ wa wĩa wa kũandĩkwa, ve makũlyo elĩ ma vata twaĩle kũsũanĩa.

¹⁵ Wĩa ũũ nũtonya kwĩthĩwa ũkonanĩtye na ũndũ mũna ũleetwe Mbivilianĩ? Ndeto ya Ngai nĩleete vyũ ũngʼei, ũvũngũ, na kũseũvya mĩvwʼanano. (Kuma 20:4; Meko ma Atũmwa 15:29; Aeveso 4:28; Ũvuanʼyo 21:8) Nĩtwaĩle kũlea wĩa o na wĩva ũla ũtonya kũtuma twĩka maũndũ ta asu. Nũndũ nĩtũmwendete Yeova, tũyĩtĩkĩla nongi kũandĩkwa wĩa ũtuma twĩka maũndũ meũleana na mĩao yake.—Soma 1 Yoana 5:3.

¹⁶ Wĩa ũũ no ũtume twĩka ũndũ ũtaĩle kana ũkatuma tũendeesya kĩmanyĩo kĩna kĩthũku? Kwasũanĩa ũndũ ũũ: Kũthũkũma wĩa wa mwako ti ũndũ ũthũku. Ĩndĩ nata Mũklĩsto akanengwa wĩa wa kwaka ĩkanisa? No kwĩthĩwa wĩa ũla ũkũtethya ũte kũendeesya ũthaithi wa ũvũngũ ĩmwe kwa ĩmwe. Ĩndĩ, kũtethya wĩa ũsu tyo yĩthĩwe ne nzĩa ya kũendeesya wĩa wa kũmanyĩsya maũndũ matosanĩte na Ndeto ya Ngai? (Ũvuanʼyo 18:4) Nũndũ nĩtũmwendete Yeova, tũikwenda kũwetanĩwʼa na maũndũ matosanĩte na Maandĩko.

17. (a) Twaĩle kũsũanĩa nesa ĩũlũ wa maũndũ meva ĩla tũkwĩka ũtwi ũkonetye wĩa wa kũandĩkwa? (Sisya ĩsandũkũ ĩthangũnĩ ya 177.) (b) Wasya witũ wa ngoo ũtonya kũtũtetheesya ata kwĩka ũtwi ũũmwendeesya Ngai?

¹⁷ Makũlyo maingĩ makonetye wĩa wa kũandĩkwa nĩmatonya kũsũngĩwa kwa kũkunĩkĩla nesa mosũngĩo ma makũlyo elĩ ma vata ala me kalungunĩ ka 15 na 16. O na ĩngĩ, ve maũndũ angĩ twaĩle kũsũanĩa nesa ĩla tũkwĩka ũtwi ĩũlũ wa wĩa wa kũandĩkwa.b Tũikasũanĩe kana ngombo yĩ na kĩthito nĩtonya kũtũnenga myolooto ĩkonetye mawĩa onthe ala tũtonya kũthũkũma. Kwoou nĩtwaĩle kũtũmĩa ũĩ ũndũnĩ ũsu. O tondũ twoonie Kĩlungunĩ kya 2, nĩtwaĩle kũmanyĩsya wasya witũ wa ngoo kwa kwĩmanyĩsya na kũatĩĩa Ndeto ya Ngai thayũnĩ witũ. Kwoou, ethĩwa nĩtũmanyĩĩtye ‘ũtonyi witũ wa kũelewa maũndũ’ kwa “kũũtũmĩa,” wasya witũ wa ngoo no ũtũtetheesye kwĩka motwi meũmwendeesya Ngai, na matonya kũtuma twĩkala wendonĩ wake.—Aevelania 5:14, NWT.

KWĨTHĨWA NA WONI WAĨLE ĨŨLŨ WA WĨA

18. Nĩkĩ ti ũndũ wĩ laisi kwĩthĩwa tũyĩka motwi mamwendeeasya Yeova?

¹⁸ Ti ũndũ wĩ laisi “mĩthenyanĩ [ĩno] ya mũminũkĩlyo” na yĩ na “mavinda ma mũisyo” kwĩthĩwa tũyĩka motwi mamwendeeasya Yeova. (2 Timotheo 3:1) O na ĩngĩ, ti ũndũ wĩ laisi kũkwata wĩa na kũũsũvĩa. Nũndũ twĩ Aklĩsto ma wʼo, nĩtwĩsĩ ve vata wa kũthũkũma kwa kĩthito nĩ kana twĩanĩsye mavata ma mũsyĩ witũ. Ĩndĩ tweethĩwa tũte metho, ũthũkũmi na ũthaithi witũ kwa Ngai nũtonya kũlikĩlĩĩlwa nĩ wendi wa kwĩka o ũndũ andũ ala angĩ wĩanĩ mekwĩka. O na no ũlikĩlĩĩlwe nĩ mawoni ala andũ ma nthĩ methĩawa namo ĩũlũ wa malĩ. (1 Timotheo 6:9, 10) Ekai twone ũndũ tũtonya kwĩka motwi maĩlu kwa kũĩkĩĩthya “maũndũ ala maseo [kana “ala ma vata,” NWT] mbee.”—Avilivi 1:10.

19. Nĩkĩ nĩ ũndũ wa vata kũmwĩkwatya Yeova na ngoo yonthe, na ũu ũtũtetheeasya kwĩvathana na kyaũ?

¹⁹ Mũĩkĩĩe, kana mwĩkwatye, Yeova na ngoo yaku yonthe. (Soma Nthimo 3:5, 6.) Ve vata wa kũmwĩkwatya Yeova, nũndũ we nũtũthĩnĩkĩaa. (1 Vetelo 5:7) Nĩwĩsĩ mavata maitũ kwĩ ũndũ ithyĩ tũmesĩ, na kwʼoko kwake ti kũkuvĩ. (Savuli 37:25) Kwoou, nũseo kwĩthukĩĩsya Ndeto yake ĩla ĩtũtavĩtye ũũ: “Mũikethĩwe na wendi wa mbesa; ĩanĩwai nĩ syĩndũ ila mwĩ nasyo: nũndũ [Ngai] mwene nĩwaisye, Ndikakũnyivĩa o na ata, na ndikakũtia o na ĩndĩĩ.” (Aevelania 13:5) Athũkũmi aingĩ ma ĩvinda yonthe nĩmeyoneete kana Ngai e ũtonyi wa kwĩanĩsya mavata moo. Ethĩwa twĩ na mũĩkĩĩo vyũ kana Yeova nũtũsũvĩaa, tũyaĩle kwĩmakĩa mũno ĩũlũ wa kwĩanĩsya mavata ma mũsyĩ witũ. (Mathayo 6:25-32) Tũyaĩle kũeka wĩa ũla tũthũkũmaa ũtũsiĩĩe kwĩka maũndũ ma kĩ-veva, ta kũtavanyʼa ũvoo mũseo na kũthi maũmbanonĩ.—Mathayo 24:14; Aevelania 10:24, 25.

20. Kwĩthĩwa na itho ĩseo kwonanasya ata, na ũtonya ata kũendeea kwĩthĩwa na itho ta yĩu?

²⁰ Kwĩthĩwa na itho ĩseo. (Soma Mathayo 6:22, 23.) Kwĩthĩwa na itho ĩseo nĩ kwĩkala ũte na maũndũ maingĩ meũkũvĩngĩĩsa. Itho ĩseo ya Mũklĩsto yĩthĩawa na kĩeleelo o kĩmwe, nakyo nĩ kwĩka kwenda kwa Ngai. Ethĩwa itho yitũ yĩ na kĩeleelo o kĩmwe, tũikethĩawa tũisembanyʼa mũno na kũmantha wĩa wĩ na mbesa mbingĩ na kwenda kwĩthĩwa twĩ ma kĩlasi kya ĩũlũ. O na tũyĩĩthĩwa tũisembanyʼa na syĩndũ sya matukũ aa ila andũ masembanasya nasyo ĩvinda yonthe, na ila andũ ala makathĩĩaa syĩndũ mendaa tũĩkĩĩe kana nĩ sya lasima nĩ kana twĩthĩwe na ũtanu. Ũtonya ata kwĩthĩwa na itho ĩseo? Ĩvathane na makoani ma mbesa mate ma lasima. Ndũkethĩwe na syĩndũ mbingĩ wĩthĩe no nginya ũtũmĩe ĩvinda yingĩ mũno kũisũvĩa. Atĩĩa ũtao wa Mbivilia wa kwĩthĩwa wĩanĩwe nĩ “kya ũya na kya kwĩvwʼĩka.” (1 Timotheo 6:8) Tata ũndũ ũtonya wĩthĩwe na syĩndũ o ila sya vata thayũnĩ waku.

21. Nĩkĩ twaĩle kũmanya maũndũ ala twaĩle kwĩanĩsya mbee, na nĩ maũndũ meva twaĩle kũvĩtya mbee thayũnĩ witũ?

²¹ Endeea kwĩanĩsya mbee maũndũ ma kĩ-veva thayũnĩ waku. Nũndũ tũyĩthĩawa na ĩvinda yingĩ, nũseo tũkethĩwa twĩsĩ maũndũ ala twaĩle kwĩanĩasya mbee thayũnĩ. Ethĩwa tũyĩĩka ũu, maũndũ ala mate ma vata no matwanangĩe ĩvinda, na maituma tũemwa nĩ kwĩanĩasya ala ma vata. Nĩ ũndũ wĩva twaĩle kwĩanĩsya mbee thayũnĩ witũ? Ũmũnthĩ andũ aingĩ ĩũlũ wa nthĩ mavĩtasya mbee kĩsomo kya ĩũlũ nĩ kana makwate wĩa wĩ na mbesa mbingĩ. Ĩndĩ, Yesũ ameie aatĩĩi make ‘maendeee kũmantha ũsumbĩ mbee.’ (Mathayo 6:33, NWT) Na nũndũ ithyĩ twĩ Aklĩsto ma wʼo, nĩtũmanthaa Ũsumbĩ wa Ngai mbee thayũnĩ witũ. Kwoou maũndũ ta motwi ala twĩkaa, ieleelo ila twĩthĩawa nasyo, na maũndũ ala angĩ twĩkaa, maĩle kwonanyʼa kana nĩtwonaa Ũsumbĩ wa Ngai na kwĩka kwenda kwake ne mo maũndũ ala ma vata kwitũ kwĩ kũsembanyʼa na malĩ.

KŨTAVANYʼA NA KĨTHITO

22, 23. (a) Nĩ wĩa wĩva ũla wa vata vyũ kwa Aklĩsto ma wʼo, na tũtonya kwonanyʼa ata kana wĩa ũsu nĩ wa vata kwitũ? (Sisya ĩsandũkũ ĩthangũnĩ ya 180.) (b) Ũtwʼĩte kwĩka ata ĩũlũ wa wĩa ũla ũthũkũmaa?

²² Kũmanya kana twĩ ĩvindanĩ ya mũminũkĩlyo nĩkũtumaa twona kũtavanyʼa na kũtwʼĩkĩthya andũ amanyĩwʼa newʼo wĩa ũla wa vata vyũ kwa Aklĩsto ma wʼo. (Mathayo 24:14; 28:19, 20) Yesũ aĩ na kĩthito kingĩ vyũ wĩanĩ wa kũtavanyʼa, kwoou o naitũ twaĩle kũatĩĩa ngelekanyʼo yake nthĩnĩ wa wĩa ũsu wa kũtangĩĩa mathayũ. Tũtonya kwonanyʼa ata kana wĩa ũsu nĩ wa vata kwitũ? Aingĩ ma andũ ma Ngai nĩmeyumasya kũtavanyʼa na ngoo yonthe me atavanyʼa ma kĩkundi. Namo angĩ nĩmavangĩte maũndũ moo nesa nĩ kana methĩwe me mavainia kana amisonalĩ. O namo asyai aingĩ ala mesĩ vata wa kwĩthĩwa na mĩvango ya maũndũ ma kĩ-veva, nĩmekĩaa syana syoo vinya syĩthĩwe syĩ athũkũmi ma ĩvinda yonthe. Mo ala matavanasya na kĩthito nĩmatanĩaa ũseo wa wĩa ũsu woo mũmũ? Ĩĩ, nĩmatanĩaa! Vate nzika, kũmũthũkũma Yeova na thayũ witũ wʼonthe nĩkũtumaa tũkwata moathimo maingĩ, na tũyĩwʼa twĩ atanu na twĩ eanĩe.—Soma Nthimo 10:22.

²³ Aingĩ maitũ nĩtũtũmĩaa ĩvinda ĩasa wĩanĩ nĩ kana twĩanĩsye mavata ma andũ ma mũsyĩ witũ. Lilikana kana Yeova endaa tũtanĩe ũseo wa wĩa witũ mũmũ. No twĩthĩwe twĩ atanu wĩanĩ witũ ethĩwa woni witũ na meko maitũ nĩmekwosana na woni Yeova na myolooto yake. Ĩndĩ, tũikaeke nongi wĩa ũla tũthũkũmaa ũtume tũekana na wĩa ũla wa vata vyũ, nawʼo nĩ kũtavanyʼa ũvoo mũseo wa Ũsumbĩ wa Ngai. Ĩla twavĩtya wĩa ũsu mbee thayũnĩ witũ, twĩthĩawa tũyonanyʼa kana nĩtũmwendete Yeova, na ũu ũituma twĩkala wendonĩ wake.