Nĩkĩ Amanyĩwʼa ma Yesũ Matatĩĩaa Kũya?

Ĩvinda ĩnini ĩtina wa Yesũ kũtanĩa Vasaka ya mwaka wa 30, Yoana Mũvatisi nĩwooviwe. Yoana nĩwendaa amanyĩwʼa make matwʼĩke aatĩĩi ma Yesũ, ĩndĩ ti onthe meekĩte ũu myei yĩana ũna kuma Yoana oovwa.

Vasaka ya mwaka wa 31 ĩthengeee, amanyĩwʼa amwe ma Yoana nĩmaendie vala ve Yesũ na mamũkũlya atĩĩ: “Nĩkĩ ithyĩ na Avalisi tũtĩĩaa kũya ĩndĩ amanyĩwʼa maku maitĩĩaa kũya?” (Mathayo 9:14) Avalisi maĩ na kĩthĩo kya kĩndĩni kya kũtĩĩa kũya. O na ĩvinda yĩmwe Yesũ nĩwanenganie ngelekanyʼo ya Mũvalisi ũmwe woonaa e mũlũngalu ũla wavoyie asya atĩĩ: “Ame Ngai, nĩngũũtũngĩa mũvea nũndũ nyie ndiilye andũ ala angĩ . . . Nĩndĩĩaa kũya kelĩ kwa kyumwa.” (Luka 18:11, 12) Nĩvatonyeka ũkethĩa o namo amanyĩwʼa ma Yoana maĩ na kĩthĩo kya kũtĩĩa kũya. Ethĩwa ti ũu, no kwĩthĩwa matĩĩa kũya nũndũ wa kyeva kingĩ kĩla maĩ nakyo ĩtina wa Yoana kwovwa. Nũndũ wa ũu, amanyĩwʼa ma Yoana nĩmasengʼaa nĩkĩ amanyĩwʼa ma Yesũ matatĩĩaa kũya o na ethĩwa meĩka ũu monanyʼe ũndũ mekwĩwʼa nũndũ wa kwovwa kwa Yoana.

Yesũ amasũngĩie atũmĩĩte ngelekanyʼo. Amakũlilye-ĩ, “Anyanyae ma mũtwaani nĩmethĩawa na kĩtumi kya kwĩthĩwa na kyeva yĩla mũtwaani wĩ namo? Ĩndĩ mĩthenya nĩyũkĩte yĩla mũtwaani ũkavetwa vala maĩ, na ĩvinda yĩu makatĩĩa kũya.”—Mathayo 9:15.

Ĩvinda yĩmwe Yoana aelekanilye Yesũ na mũtwaani. (Yoana 3:28, 29) Kwondũ wa ũu, yĩla Yesũ waĩ vamwe na amanyĩwʼa make, mayaĩ na vata wa kũtĩĩa kũya. Ĩtina, yĩla Yesũ wakwie amanyĩwʼa make nĩmakwatiwe nĩ kĩmako na kyeva, na ũu watuma matĩĩa kũya. Ĩndĩ yĩla Yesũ wathayũũkie mayaĩ na vata wa kwĩthĩwa na kĩmako na kũtĩĩa kũya, vandũ va ũu mesaa kwĩthĩwa na ũtanu mwingĩ.

Ĩtina wa ũu, Yesũ nĩwanenganie ngelekanyʼo ingĩ ilĩ asya atĩĩ: “Vaiĩ mũndũ ũtumĩĩaa kĩlaka kya ngũa nzaũ ngũanĩ ngũũ ya ĩũlũ, nũndũ kĩlaka kĩu kyeũ nĩkĩkusasya ngũa ĩsu na ũtembũku wayo ũineneveea. O na andũ mayĩkĩaa mbinyu nzaũ ithumanĩ ngũũ sya mbinyu. Nũndũ meeka ũu, ithuma isu sya mbinyu nitembũkaa na mbinyu ĩyĩtĩka, nasyo ithuma isu sya mbinyu iyanangĩka. Ĩndĩ andũ mekĩaa mbinyu nzaũ ithumanĩ nzaũ sya mbinyu.” (Mathayo 9:16, 17) Yesũ endaa kũmanyĩsya ũndũ wĩva kwa kũtũmĩa ngelekanyʼo isu?

Yesũ atetheeasya amanyĩwʼa ma Yoana Mũvatisi mamanye kana vayaĩ kĩtumi kya kwenda aatĩĩi ma Yesũ maatĩĩe kĩthĩo kya tene kya Ayuti, ta kĩla kya kũtĩĩa kũya. Yesũ ndookĩte kũendeesya ũthaithi wa tene ũla weekawa kwosana na syĩthĩo sya Kĩyuti na waĩ vakuvĩ kũvetangwa. Ũthaithi ũla Yesũ weekĩaa andũ vinya maatĩĩe ndwoosanĩte na syĩthĩo sya andũ ila Ayuti ma ĩvinda yĩu maatĩĩaa. Kwoou, no twasye kana Yesũ ndatumĩĩaa kĩlaka kya ngũa nzaũ ngũanĩ ngũũ kana kwĩkĩa mbinyu nzaũ kĩthumanĩ kĩkũũ.