Yesũ Nĩwatavanisye Kalilii na Amanyĩsya Atũmwa Make Wĩa wa Kũtavanyʼa

Yesũ nĩweethĩĩtwe aitavanyʼa na kĩthito kingĩ vandũ va myaka ĩlĩ. Ĩndĩ ĩkũlyo nĩ, Yo ĩvinda yaĩ yĩnavika ya kũola kĩthito kyake wĩanĩ ũsu? Aiee, vandũ va ũu, Yesũ nĩwongelile kĩthito wĩanĩ wa kũtavanyʼa kwa kũlika “ndũanĩ syonthe na motũinĩ [ma Kalilii], aimanyĩsya masinakokenĩ na kũtavanyʼa ũvoo mũseo wa Ũsumbĩ, o vamwe na kũvosya mĩthemba yonthe ya ũwau na mĩthemba yonthe ya mawonzu.” (Mathayo 9:35) Maũndũ ala weeyoneie aitavanyʼa nĩmatumie ona vata wa kwongela kĩthito wĩanĩ wa kũtavanyʼa. Ĩndĩ esaa kwĩanĩsya wĩa ũsu ata?

Yesũ e nzĩanĩ, nĩwoonie andũ mendaa kũtetheewʼa kĩ-veva o vamwe na kũkiakiwʼa. Andũ asu Yesũ woonie mailyĩ ta malondu mate na mũĩthi, manyamaĩtwʼe na makekwʼa kũũ na kũũ. Nĩwamewʼĩie tei na kwoou eea amanyĩwʼa make atĩĩ: “Ngetha nĩ nene, ĩndĩ atethya ma wĩa nĩ anini. Kwoou, voyai Mũnene wa ngetha atũme atethya ma wĩa ngethanĩ yake.”—Mathayo 9:37, 38.

Yesũ nĩweesĩ kĩla kĩtonya kũtetheesya andũ asu. Nũndũ wa ũu, nĩwoombanisye atũmwa make 12 na amaanyʼa ikundi thanthatũ sya atavanyʼa, kĩla kĩkundi kĩ na andũ elĩ. Ĩtina wa ũu, nĩwameyĩaĩe ũndũ mekwĩka kwa kũmea atĩĩ: “Mũikathi kwa andũ ma mbaĩ ingĩ, na mũikalike ndũanĩ o na yĩva ya Asamalia; vandũ va ũu, endai o kwa malondu ala mau ma nyũmba ya Isilaeli. Na mũendete tavanyʼai, mũkyasya: ‘Ũsumbĩ wa ĩtu nĩ mũthengeeu.’”—Mathayo 10:5-7.

Ũsumbĩ ũla amanyĩwʼa maĩ matavanyʼe ĩũlũ wawʼo nĩ ũla Yesũ wawetie mboyanĩ ĩla ya ngelekanyʼo. Ndeto ‘Ũsumbĩ wa ĩtu nĩ mũthengeeu’ syoonanasya kana ũla Ngai wanyuvĩte eĩthĩwa Mũsumbĩ, nake nĩ Yesũ Klĩsto, e vo. Ĩndĩ nĩ kyaũ kyesaa kũĩkĩĩthya kana amanyĩwʼa nĩmo matũmĩtwe matavanasye ĩũlũ wa Ũsumbĩ ũsu? Yesũ nĩwamanengie vinya wa kũvosya awau na kũthayũũkya akwʼũ, na maaĩle kwĩka ũu mate kũĩvĩthya kĩndũ. Ĩndĩ mo atũmwa mesaa kwĩka ata nĩ kana meanĩsye mavata moo, ta kũkwata lĩu wa kĩla mũthenya?

Yesũ nĩwatavisye amanyĩwʼa make maikamanthe syĩndũ sya kĩ-mwĩĩ ila makatũmĩaa me wĩanĩ ũsu wa kũtavanyʼa. Mayaaĩle kũkua syĩndũ ta thaavu, vetha, kana ũthuku mĩvukonĩ yoo. O na mayaaĩle kwĩthĩwa na mĩvuko ya lĩu kwondũ wa savalĩ ĩsu, kana ngũa ilĩ kana iatũ. Nĩkĩ mataaĩle kũkua syĩndũ isu? Yesũ amaĩkĩĩthisye kana “mũtethya wa wĩa nĩwaĩle kũnengwa lĩu.” (Mathayo 10:10) Andũ ala amanyĩwʼa mesaa kwĩthĩa na mayĩtĩkĩla ũvoo ũla meũtavwʼa nĩmo mesaa kũmeanĩsya mavata moo ma lasima. Yesũ ameie atĩĩ: “Mũsyĩ o na wĩva ũla mwĩlika, ĩkalai vau nginya yĩla mwĩuma kũu.”—Maliko 6:10.

Yesũ nĩwasyokie kũtavya amanyĩwʼa ũndũ makekaa yĩla meũtavanyʼa ũvoo wa Ũsumbĩ, ameie: “Mwalika nyũmba, kethyai andũ ma nyũmba ĩsu. Ethĩwa nyũmba ĩsu nĩyaĩle, mũuo wenyu nĩwĩthĩwe ĩũlũ wayo; ĩndĩ ethĩwa ndyaĩle, mũuo wenyu nũmũsyokee. Na vandũ o na va vala mũtethokwʼa nĩ mũndũ kana ndeto syenyu kwĩthukĩĩwʼa, mumĩte vo tuangai kĩtoo maaũnĩ menyu.”—Mathayo 10:12-14.

Ndũa nima kana ũtũi wʼonthe waĩ ũtonya kũlea kwĩthukĩĩsya ũvoo ũla amanyĩwʼa matavanasya. Ndũa ya mũthemba ũsu yesaa kũkwatwa nĩ kyaũ? Yesũ nĩwaeleisye kana andũ asu makakwata ũsilĩlo mũnene. Aielesya aisye atĩĩ: “Nĩ wʼo nĩngũmwĩa, kũkeethĩwa kavaa kwa nthĩ ya Sotomo na Ngomola Mũthenya wa Sila, kwĩ ndũa ĩsu.”—Mathayo 10:15.