Ngai Nĩwĩsĩ Mathĩna Ala wĩ Namo?

MAŨNDŨ ALA WŨMBI ŨTŨMANYĨASYA

Nthĩnĩ wa ĩsaa ya mbee kuma kana kasyawa, nĩ ũndũ wa vata mũno inyia akethĩwa vakuvĩ nako. Nĩkĩ? Nũndũ kwĩthĩwa vakuvĩ na kana ĩsaa ya mbee kuma kasyawa no kũtume keana nesa na kaendeea nesa.a

Nĩ kyaũ kĩtumaa kĩveti kĩsũvĩa nesa kana kakyo kala kĩsyaie? Mũsomi wĩtawa Jeannette Crenshaw awetie ndeto ii nthĩnĩ wa The Journal of Perinatal Education. Yĩla hormone oxytocin yambĩĩa kũthũkũma mũno ĩtina wa kĩveti kũsyaa, nĩtumaa “inyia wa kana akenda mũno nũndũ wa kũkakwata, kũkasisya, na kũkongya.” Asyokete kũelesya kana ve hormone ĩngĩ mwĩĩ umasya ĩvindanĩ yĩu “ĩtetheeasya inyia wa kana enda kũkasũvĩa” na ĩkatuma enda kũtindanyʼa mũno nako. Nĩkĩ ũndũ ũsu nĩ wa vata mũno?

Ngwatanĩo ya vakuvĩ katĩ wa inyia na kana yeekĩiwe vo nĩ Mũmbi witũ ũla ũtwendete, Yeova Ngai.b Mũsumbĩ Ndaviti nĩwamũkumisye Ngai nũndũ wa ‘kũmumya ĩvunĩ’ na kũtuma ewʼa e ũsũvĩonĩ e kĩthũinĩ kya inyia wake. Avoyie asya atĩĩ: “Nĩnekiwʼe kwaku o kuma ĩvunĩ; nue Ngai wakwa ĩvinda yonthe kuma mwaitũ anzyaa.”—Savuli 22:9, 10.

KWASŨANĨA ŨNDŨ ŨŨ: Ethĩwa Ngai ombĩte mũndũ kwa nzĩa ya mwanya ũu ũkethĩa kĩveti no kĩthĩwe na ngwatanĩo mũno na kana kakyo nũndũ wa kũkakwata, kũkasisya, na kũkongya, no twasye kana Ngai ndendeeawʼa nithyĩ, ‘twĩ ũsyao wake’?—Meko ma Atũmwa 17:29.

MAŨNDŨ ALA MBIVILIA ĨTŨMANYĨASYA MONANASYA KANA NGAI NŨTŨSŨVĨAA

Yesũ Klĩsto, ũla wĩsĩ Mũmbi nesa mũno kwĩ mũndũ ũngĩ o na wĩva, amanyĩisye atĩĩ: “Tũsũni twĩlĩ tũitewa ĩsendi yĩmwe? Na vai kamwe katwʼo kakavalũka nthĩ Ĩthe wenyu atekwenda: ĩndĩ o na nzwĩĩ syonthe sya mĩtwe yenyu nĩ ndale. Mũikakĩe ĩndĩ; inywʼĩ mwĩ vata kwĩ tũsũni twingĩ.”—Mathayo 10:29-31.

Nĩ andũ anini mũno masũanĩaa ĩũlũ wa tũsũni tũnini tũla monaa, na ũu wĩonanyʼa kana o na mayĩsa kũmanya kamwe katwʼo kavalũka nthĩ. Ĩndĩ Ĩthe witũ wa ĩtunĩ nĩwĩsĩ kĩla kamwe katwʼo! Ĩndĩ o na tũsũni twingĩvĩte ata tũyĩsa kwĩthĩwa twĩ vata mũno kwake kwĩ mũndũ. Kwoou twĩĩmanyĩsya kana tũyaĩle ‘kũkĩa’ tũyona kana Ngai ndatwĩsĩ. Kĩvathũkanyʼo na ũu, nĩwendeeawʼa mũno nithyĩ!

Maandĩko nĩmatũĩkĩĩthasya ũndũ ũsu

• “Metho ma Yeova me kĩla vandũ, makĩsyaĩĩsya ũthũku na ũseo.”—NTHIMO 15:3.

• “Metho ma Yeova melekele alũngalu, na matũ make nũteete ewʼe kĩĩo kyoo.”—SAVULI 34:15.

• “Ngatana na kwĩwʼa mũyo ũseonĩ waku wĩ wendo; nĩkwĩthĩwa nĩwoonie thĩna wakwa: nĩwamanyie mathĩna ma ngoo yakwa.”—SAVULI 31:7.

“NOONAA YEOVA TA ŨTAMBENDETE”

No tũtetheke twamanya kana Ngai nĩwendeeawʼa nithyĩ vyũ na nũtũsũvĩaa? Ĩĩ, no tũtetheke o tondũ Hannah,c kuma England, ũeleetye:

“Mavinda maingĩ mũno noonaa Yeova ta ũtambendete na ta ũtasũngĩaa mboya syakwa. Nasũanĩaa aleaa kũsũngĩa mboya syakwa nĩkwĩthĩwa ndyaĩ na mũĩkĩĩo. Noonaa ta nĩmũvĩtĩsye Yeova na kana ndendaa kũmbĩthukĩĩsya nũndũ ndyaĩ wa vata. Ndyoonaa Ngai ta ũthĩnĩkĩaa andũ.”

Ĩndĩ, Hannah nĩwaekie kwĩthĩwa na nzika kana Yeova nũsũvĩaa andũ na nũmendete. Nĩ kyaũ kyavĩndũie mawoni ma Hannah? Aeleetye atĩĩ: “Neekie moalyũku o kavola kwa kavola. Nĩngũlilikana ũvoo ũmwe kuma Mbivilianĩ waumiwʼe myaka mingĩ mĩvĩtu ĩũlũ wa nthembo ya Yesũ ya wovosyo, na ũvoo ũsu nĩwangiitie mũno na wandetheesya kwĩthĩwa na mũĩkĩĩo kana Yeova nũmbendete. Na yĩla mboya syakwa syasũngĩwa, nĩnaĩaa namanya kana Yeova nũmbendete. O na kwĩmanyĩsya Mbivilia na kũthi maũmbanonĩ ma Kĩklĩsto nĩkũmanyĩĩtye maũndũ maingĩ ĩũlũ wa Yeova, ndaĩa syake, na ũndũ wĩwʼaa ĩũlũ witũ. Yu nĩnĩmanyĩte nesa kana Yeova nũtwendete ithyonthe, na e na mea ma kwĩanĩsya mavata ma kĩla ũmwe.”

Ndeto sya Hannah nĩ sya kũtwĩkĩa vinya. Ĩndĩ ũtonya kwĩthĩwa na mũĩkĩĩo ata kana Ngai nũkũeleawa na nĩwĩsĩ ũndũ ũkwĩwʼa? Kĩlungu kĩla kĩatĩĩe nĩkĩũneenea ĩkũlyo yĩu.