• We Nũũlulutĩka Nũndũ wa Yesũ?
    Mũsyaĩĩsya (Ĩkaseti ya Kwĩmanyĩsya)—2021 | Mwei wa 5

    • (3) YESŨ NĨWALEANILE NA SYĨTHĨO MBINGĨ SYA AYUTI

      Aingĩ nĩmalulutĩkie nũndũ Yesũ nĩwaleanile na syĩthĩo imwe syoo. Maũndũ o asu matonya ata kũlulutĩkya amwe ũmũnthĩ? (Sisya kalungu ka 13)d

      13. Nĩ kyaũ kyatumie aingĩ mamũmena Yesũ?

      13 Ĩvinda ya Yesũ, amanyĩwʼa ma Yoana Mũvatisi nĩmasengʼie moona amanyĩwʼa ma Yesũ mateũtĩĩa kũya. Yesũ amaeleisye kana mayaĩ na vata wa kũtĩĩa kũya e thayũ. (Mt. 9:14-17) O na vailye ũu, Avalisi na ala angĩ mamũvĩngaa nĩmamũmenie nũndũ ndaatĩĩaa syĩthĩo syoo. Nĩmathatie moona aivosya awau mũthenya wa Savato. (Mko. 3:1-6; Yoa. 9:16) Na o na kau maasya nĩmakwataa Savato, mayathĩnĩkaa moona andũ maikũnĩa viasala ĩkalũnĩ. Ĩndĩ nĩmathatie mũno yĩla Yesũ wamakanisye nũndũ wa ũu. (Mt. 21:12, 13, 15) Na yĩla Yesũ watavanasya ĩsinakokenĩ ya Nasaleti, andũ aingĩ nĩmathatie yĩla watũmĩie maũndũ meekĩkĩte mbaĩnĩ ya Isilaeli kũmonyʼa ũndũ meyendete na ũndũ mataĩ na mũĩkĩĩo. (Luka 4:16, 25-30) Aingĩ nĩmalulutĩkie nũndũ Yesũ ndaaĩka maũndũ ala mendaa eke.—Mt. 11:16-19.

      14. Nĩkĩ Yesũ wakanisye andũ ala maatĩĩaa syĩthĩo sya andũ itosanĩte na Maandĩko?

      14 Maandĩko maĩtye ata? Yeova atũmĩie mwathani Isaia kwasya atĩĩ: “Andũ aa nĩmanthengeeaa, na nĩmandaĩaa na kanywʼa woo na ilomo syoo, ĩndĩ nĩmavetete ngoo syoo kũasa nakwa, na kũngĩa kwoo nĩ mwĩao wa andũ ũla mamanyĩĩtwʼe.” (Isa. 29:13) Yesũ ndaavĩtya yĩla wakanisye ala maatĩĩaa syĩthĩo sya andũ itosanĩte na Maandĩko. Na kĩtumi nũndũ ala moonaa kũatĩĩa mĩao na syĩthĩo sya andũ kwĩ kwa vata kwĩ Maandĩko, moonanisye nĩmamũleete Yeova na Masia ũla wamũtũmie.

  • We Nũũlulutĩka Nũndũ wa Yesũ?
    Mũsyaĩĩsya (Ĩkaseti ya Kwĩmanyĩsya)—2021 | Mwei wa 5

    • (4) YESŨ NDAAENDA KŨVĨNDŨA SILIKALĨ

      Aingĩ nĩmalulutĩkie nũndũ Yesũ ndaaĩlikya siasanĩ. Maũndũ o asu matonya ata kũlulutĩkya amwe ũmũnthĩ? (Sisya kalungu ka 17)e

      17. Nĩ kyaũ andũ aingĩ ĩvindanĩ ya Yesũ meekwatĩtye kyatumie malulutĩka?

      17 Andũ amwe ĩvindanĩ ya Yesũ mendaa kũsumbĩkwa nĩ silikalĩ ĩngĩ vau kwa vau. Meesĩ Masia nĩwe ũkamaumya ũsumbĩnĩ wa Lomi nũndũ nĩwamathĩnasya. Ĩndĩ yĩla matatie kũmũtwʼĩkĩthya Yesũ mũsumbĩ woo, nĩwaleile. (Yoa. 6:14, 15) Kĩvathũkanyʼo na asu, athembi nĩmathĩnĩkaa mayona Yesũ nũkũvĩndũa silikalĩ ya Lomi. Masũanĩaa silikalĩ ĩsu nĩkũthata na ĩimavena ũkũmũ ũla yamanengete. Maũndũ asu nĩmatumie Ayuti aingĩ malulutĩka.

      18. Nĩ mawathani meva me Mbivilianĩ ĩũlũ wa Masia andũ aingĩ mavũthĩĩisye?

      18 Maandĩko maĩtye ata? O na kau mawathani maingĩ mathanĩte kana mũthya Masia akeethĩwa Ngũmbaũ ya kaũ, angĩ moonanĩtye kana no nginya ambe kũkwʼa kwondũ wa naĩ sitũ. (Isa. 53:9, 12) Kwoou nĩkĩ Ayuti meekwatĩtye Masia nũkũvĩndũa maũndũ? Kĩtumi nũndũ andũ aingĩ ĩvindanĩ ya Yesũ nĩmavũthĩĩasya wathani o na wĩva ũtamathĩte kũmaminĩa mathĩna moo vau kwa vau.—Yoa. 6:26, 27.