Nũũ Wamũnengete Yesũ Vinya wa Kwĩka Syama?

Ĩvinda ĩnini ĩtina wa Yesũ kũmanyĩsya ĩũlũ wa kũekea e mũsyĩ kwa Mũvalisi weetawa Simoni, nĩwasyokie ĩngĩ kĩsionĩ kya Kalilii akatavanyʼe. Ũsu waĩ mwaka wake wa kelĩ aitavanyʼa, na ndaendete e weka. Aendanĩtye na atũmwa make 12 vamwe na aka ala ‘waumĩtye ndaimoni na akamavosya mowau.’ (Luka 8:2) Aka amwe maendanĩtye na Yesũ nĩ Meli ũla weetawa Makatalene, Susana, na Yoena, ũla mũũme wathũkũmaa kwa Mũsumbĩ Elote Andiva.

O ũndũ andũ aingĩ maendeeie kũmũmanya Yesũ, nowʼo andũ amwe maendeeie kũvĩnga wĩa ũla watethasya. Ũndũ ũsu nĩwoonekie nesa ĩvinda yĩla mũndũũme ũmwe waĩ na ndaimoni, waĩ kĩlalinda, na ũtaneenaa wavoiwʼe nĩ Yesũ. Ĩtina wa ndaimoni kuma mũndũnĩ ũsu, nĩweethĩiwe atonya kwona na kũneena. Yĩla andũ moonie ũu nĩmasengʼie mũno na makũlanyʼa: “Nĩvatonyeka ũkethĩa ũũ nĩwe Mwana wa Ndaviti?”—Mathayo 12:23.

Andũ ala moombanĩte mũsyĩ vala Yesũ wekalaa maĩ aingĩ ũkethĩa e na amanyĩwʼa make maitonya kũya. Ĩndĩ o na ũu wĩ o vo, ti andũ onthe masũanĩaa kana Yesũ nĩ “Mwana wa Ndaviti” ũla wathanĩtwe. Aandĩki na Avalisi amwe nĩmookĩte kuma Yelusaleme, ĩndĩ mayookĩte kũmanyĩwʼa nĩ Yesũ kana kũmũtetheesya. Vandũ va ũu, matavasya andũ atĩĩ: “E na Veelisevuli” na ekaa maũndũ manene aitũmĩa vinya wa “mũnene wa ndaimoni.” (Maliko 3:22) Yĩla andũ ma mũsyĩ wa Yesũ meewie ndeto isu, nĩmookie kũmũkwata. Ĩndĩ nĩkĩ mookĩte kũmũkwata?

Ĩvindanĩ yĩu, ana-a-inyia ma Yesũ mayaĩkĩĩaa kana Yesũ nĩ Mwana wa Ngai. (Yoana 7:5) Mo ene masũanĩa moonaa kana Yesũ ũla meesĩ ĩvinda yĩla maendeee kwĩana me Nasaleti, ti we Yesũ ũla ĩvindanĩ yĩĩ ũkũneenewa naĩ nĩ andũ. Na nũndũ wa ũu matwʼa kana no nginya Yesũ ethĩwe e na thĩna wa kĩlĩko. Maisye: “E na ndũũka.”—Maliko 3:21.

Ĩndĩ mo maũndũ ala Yesũ weekĩte maĩkĩĩthasya kyaũ? Yesũ aĩ anavosya mũndũ waĩ na ndaimoni na akethĩwa atonya kwona na kũneena. Vai mũndũ waĩ atonya kũleana na ũndũ ũsu. Kwoou, aandĩki na Avalisi mendaa kũmwanangĩa Yesũ ĩsyĩtwa kwa kũmũneenea maũndũ ma ũvũngũ. Maisye atĩĩ: “Mũndũ ũũ aumasya ndaimoni atũmĩĩte vinya wa Veelisevuli, mũnene wa ndaimoni.”—Mathayo 12:24.

Yesũ nĩwamanyie maũndũ ala aandĩki na Avalisi masũanĩaa na amea atĩĩ: “Kĩla ũsumbĩ ũaanĩkĩte nĩwanangĩkaa, na ndũa kana nyũmba ĩla ĩaanĩkĩte ndĩsa kũũngama. O ta ũu, Satani akalũngya Satani ethĩwa e mũaanĩku, na ũu ũkethĩwa, ũsumbĩ wake nĩwũũngama?”—Mathayo 12:25, 26.

Ndeto isu Yesũ waneenie syaĩ sya wʼo vyũ na kwoou andũ asu mayaĩ matonya kũivĩnga. Avalisi nĩmeesĩ kana Ayuti amwe nĩmaumasya ndaimoni. (Meko ma Atũmwa 19:13) Kwoou Yesũ amakũlya-ĩ, “Ethĩwa numasya ndaimoni na vinya wa Veelisevuli, syo syana syenyu syumasya ndaimoni na vinya waũ?” Kwa ndeto ingĩ no twasye Yesũ amatavasya kana ethĩwa aumasya ndaimoni na vinya wa Veelisevuli, o namo matũmĩaa vinya wa Veelisevuli kwĩka ũu. Yesũ aendeeie kũmea: “Ĩndĩ ethĩwa numasya ndaimoni nĩtũmĩĩte veva wa Ngai, Ũsumbĩ wa Ngai nĩwamũvĩtũkie mũtesĩ.”—Mathayo 12:27, 28.

Nĩ kana Yesũ amaelesye kana yĩla umasya ndaimoni ethĩawa ayonanyʼa kana e na ũtonyi kwĩ Satani, amakũlilye-ĩ: “Vatonyeka ata mũndũ akavithũkĩa nyũmba ya mũndũ wĩ vinya na kũmũvena malĩ yake atambĩte kũmwova? No ekie ũu nĩ kana amũvene malĩ ĩla yĩ nyũmbanĩ yake. Mũndũ o na wĩva ũla ũte ngalĩko ĩla yakwa ethĩawa aileana nakwa, na mũndũ o na wĩva ũla ũtombanasya vamwe nakwa ethĩawa ainyaĩĩkya.” (Mathayo 12:29, 30) Kwa wʼo, aandĩki na Avalisi makwetye kũmũvĩnga Yesũ, na kwoou moonanyʼa kana mo nĩ athũkũmi ma Satani. Vandũ va kũtetheesya andũ mamũatĩĩe Yesũ, aandĩki na Avalisi matumaa andũ mamũlea Mwana wa Ngai, ũla weekaa maũndũ atũmĩĩte vinya wa Yeova.

Yesũ nĩwakanisye andũ asu mamũvĩngaa kwa kũmea atĩĩ: “Ana ma andũ makaekewa maũndũ onthe, o na ethĩwa mekĩte naĩ syĩva kana maneenete ndeto syĩva sya kũumana. Ĩndĩ mũndũ o na wĩva ũla ũumaa veva mũtheu ndakaaekewa o na ĩndĩĩ, ĩndĩ akeethĩawa e na naĩ ya tene na tene.” (Maliko 3:28, 29) Kwasũanĩa kĩla kyesaa kũkwata andũ asu maasya Yesũ ekaa maũndũ manene atũmĩĩte vinya wa Satani, o na kau vate nzika atũmĩaa vinya wa Ngai!