Yesũ Nĩwakanisye Avalisi

Yĩla aandĩki na Avalisi maleile kana Yesũ aumasya ndaimoni kwa vinya wa Ngai, maĩ matonya kũlika naĩnĩ ya kũuma veva mũtheu. Ĩndĩ, mo mesaa kũnyuva kwĩthĩwa ngalĩko ya Ngai kana nĩ ya Satani? Yesũ ameie atĩĩ: “Vandai mũtĩ mũseo na ũsyao wawʼo ũkeethĩwa mũseo, kana mũvande mũtĩ mũthũku na ũsyao wawʼo ũkeethĩwa mũthũku, nũndũ mũtĩ ũmanyĩkaa kwĩsĩla ũsyao wawʼo.”—Mathayo 12:33.

Yĩla Yesũ waumisye ndaimoni eekie maũndũ maseo, kana kwa ndeto ingĩ, maũndũ asu weekie maĩ ũsyao mũseo. Kwoou nĩ ũndũ wa ũtumanu kwasya kana yĩla Yesũ weekie maũndũ asu amũthũkũmaa Satani. O tondũ Yesũ waeleisye nesa nthĩnĩ wa Ũtavanyʼa wa Kĩĩmanĩ, ethĩwa ũsyao nĩ mũseo, o nawʼo mũtĩ nĩ mũseo. Kwoou, ũsyao wa Avalisi, ũla nĩ ndeto nthũku ila mamũneeneaa Yesũ, woonanasya ata? Woonanasya kana nĩ athũku. Yesũ ameie atĩĩ: “Inywʼĩ ũsyao wa nzoka mbai, mũtonya ata kũneena maũndũ maseo na mwĩ athũku? Nũndũ kĩla kyusũĩte ngoonĩ nĩkyo kanywʼa ũneenaa.”—Mathayo 7:16, 17; 12:34.

Kwa wʼo, ndeto sitũ syonanasya kĩla kĩ ngoonĩ yitũ, na ndeto isu nĩsyo ikatuma Yeova na Yesũ mamanya ũndũ meũtũsilĩla. Nĩkyo kĩtumi Yesũ waisye atĩĩ: “Nĩngũmwĩa kana andũ makaumya ũtalo Mũthenya wa Sila kumana na ndeto o na yĩva ĩtatethya ĩla maneenaa; nũndũ kwa ndeto syaku ũkatalĩlwa ũlũngalu, na kwa ndeto syaku ũkasilĩlwa.”—Mathayo 12:36, 37.

O na kau Yesũ nĩweekaa syama mbingĩ, aandĩki na Avalisi mendaa eke maũndũ maingĩ kwĩ asu. Mamwĩie: “Mũmanyĩsya, twĩenda kwona kyama kuma kwaku.” Methĩwe nĩmoonete Yesũ ayĩka syama kana mayoonete, ve andũ aingĩ meeyooneete ayĩka syama na maĩ matonya kũkũsĩĩa ĩũlũ wa maũndũ ala Yesũ weekie. Kwoou, Yesũ atavisye atongoi asu Ayuti atĩĩ: “Inywʼĩ nzyawa nthũku na yusĩe ũlaalai, mũendeee kũkũlya nĩmwonyʼe kyama, ĩndĩ vaiĩ kyama mũkona ate o kĩla kya mwathani Yona.”—Mathayo 12:38, 39.

Yesũ ndaamatia matesĩ kĩla wamatavasya, ameie atĩĩ: “Nũndũ o tondũ Yona waĩ ĩvunĩ ya ĩkũyũ ĩnene mĩthenya ĩtatũ ũtukũ na mũthenya, nowʼo Mwana wa mũndũ ũkekala ngoonĩ ya nthĩ mĩthenya ĩtatũ ũtukũ na mũthenya.” Yona nĩwamelilwʼe nĩ ĩkũyũ ĩnene ĩndĩ ĩtina wa mĩthenya ĩtatũ auma ĩkũyũnĩ yĩu o ta mũndũ wathayũũkwʼa. O nake Yesũ mwene nĩwawetie kana akakwʼa na ĩtina wa mĩthenya ĩtatũ aithayũũkwʼa. Yĩla ũndũ ũsu wesie kwĩthĩwa, atongoi Ayuti nĩmaleile ‘kyama kya Yona’ kwa kũlea kwĩlila na kũalyũka. (Mathayo 27:63-66; 28:12-15) Kĩvathũkanyʼo na atongoi asu, “andũ ma Nineva” nĩmeelilile ĩtina wa Yona kũmatavya ũvoo mũseo. Kwoou, andũ ma Nineva makavuanyʼa naĩ sya atongoi asu. Yesũ asyokie aweta ĩũlũ wa ngelekanyʼo ya mũsumbĩ mũndũ mũka wa ngalĩko ya ĩtheo, kana wa Sieva, ũla kwĩsĩla maũndũ ala weekie ũkavuanyʼa naĩ sya andũ asu. Mũsumbĩ ũsu nĩwendaa kwĩwʼa mũno ĩũlũ wa ũĩ wa Solomoni, na yĩla weewie ũndũ Solomoni waĩ na ũĩ wingĩvĩte nĩwasengʼie mũno. Ĩndĩ, Yesũ aendeeie kwasya, “mũndũ mũnene kwĩ Solomoni e vaa.”—Mathayo 12:40-42.

Yesũ aelekanisye nzyawa ĩsu nthũku na mũndũ waumiwʼe maveva mavuku. (Mathayo 12:45) Nũndũ mũndũ ũsu ndaausũsya syĩndũ nzeo vala vaumie veva ũsu mũthũku, veva ũsu mũthũku nĩwasyokie wĩ na maveva angĩ mũonza mathũku kwĩ ala waĩ namo na mamũlika. O ta ũu, mbaĩ ya Isilaeli yaĩ ĩnathewʼa na ĩkaalyũka, o tondũ kweethĩiwe kwa ũla mũndũ ĩtina wa veva mũthũku kuma nthĩnĩ wake. Ĩndĩ mbaĩ ĩsu nĩyaleile athani ma Ngai, na mwĩkalĩle ũsu woo wesa kũtuma mbaĩ ĩsu ĩmũvĩnga ũla waĩ na veva wa Ngai, nake nĩ Yesũ. Ũndũ ũsu nĩwoonanisye kana mbaĩ ĩsu yaĩ nthũku kwĩ ũndũ yailyĩ mwambĩĩonĩ.

Yesũ aendeee kũneena, inyia wake na ana-a-inyia nĩmavikie na maũngama vakuvĩ na ĩkomano ya andũ. Andũ amwe mekalĩte vakuvĩ nake mamwĩie atĩĩ: “Inyia waku na ana-a-inyia maku maũngamĩte vaya nza mayenda kũkwona.” Yesũ nĩwoonanisye ũndũ waĩ na ngwatanĩo ya vakuvĩ na amanyĩwʼa make ala wamonaa ta ana-a-inyia, eĩtu-a-inyia, na inyia. Nĩwatambũũkisye kwʼoko kwake kwelekela amanyĩwʼa make na asya: “Inyia wakwa na ana-a-inyia makwa nĩ aa ala mewʼaa ndeto ya Ngai na kũmĩka.” (Luka 8:20, 21) Kwa kwĩka ũu nĩwoonanisye kana o na kaũ nĩwendete andũ make ma mũsyĩ, ngwatanĩo yake na amanyĩwʼa make nĩyo ya vata vyũ. Nĩ ũndũ wa vata kwitũ kwĩthĩwa na ngwatanĩo ya vakuvĩ na ana-a-asa maitũ na mũno mũno yĩla andũ angĩ meethĩwa na nzika ĩũlũ witũ kana maneena maũndũ mathũku kwelekela wĩa witũ!