Amanyĩwʼa Ana ma Yesũ Nĩmatwʼĩkie Atei ma Andũ

Ĩtina wa andũ ma Nasaleti kwenda kũmũaa Yesũ, nĩwaumie kũu na athi Kavelinaumi, vakuvĩ na Ũkanga wa Kalilii, ũla kwa ĩsyĩtwa yĩngĩ weetawa “ĩia ya Kenesaleti.” (Luka 5:1) Ũndũ ũsu weanĩisye wathani ũla wĩ ĩvukunĩ ya Isaia ũla waĩtye kana andũ ma Kalilii ala mekalaa vakuvĩ na ũkanga makoona kyeni kingĩ.—Isaia 9:1, 2.

Yesũ e kĩsionĩ kĩu kya Kalilii, nĩwaendeeie kũtavanyʼa kana “Ũsumbĩ wa ĩtu nĩ mũthengeeu.” (Mathayo 4:17) Aendeee kũtavanyʼa, nĩweethĩie amanyĩwʼa make ana ndũanĩ ĩsu. Mbeenĩ, amanyĩwʼa asu nĩmaendanasya nake, ĩndĩ yĩla maumie Yutia me na Yesũ, nĩmasyokeie wĩa woo wa kũtea makũyũ. (Yoana 1:35-42) Ĩndĩ yu ĩvinda yaĩ yĩnavika ya kũtia wĩa woo wa kũtea makũyũ na kũendanasya nake kĩla ĩvinda. Maaĩle kwĩka ũu nĩ kana amamanyĩsye ũndũ maaĩlĩte kũendeesya wĩa wa kũtavanyʼa ĩtina wa Yesũ kũsyoka ĩtunĩ.

Yesũ atembeete ũtee wa ũkanga, nĩwoonie Simoni Vetelo, mwana-a-inyia Endelea, na atei angĩ ma makũyũ maithambya itei syoo. Yesũ nĩwaendie vala maĩ na alika ĩsiwanĩ ya Vetelo na amũkũlya ayĩtwae vaasanga na nthĩ nyũmũ. Yĩla maendie vaasanga, Yesũ nĩwekalile nthĩ ĩsiwanĩ na ambĩĩa kũmanyĩsya makomano ala maĩ ũtee wa ũkanga ũwʼo ĩũlũ wa Ũsumbĩ wa Ngai.

Ĩtina wa kũmanyĩsya makomano e ĩsiwanĩ, Yesũ eeie Vetelo atĩĩ: “Yĩtwae vala valiku, na mũyĩkya itei syenyu nĩ kana mũkwatye.” Nake Vetelo amũsũngĩa amwĩa: “Mũmanyĩsya, tũthũkũmie ũtukũ wʼonthe na tũinakwatya kĩndũ, ĩndĩ nũndũ wa ndeto syaku nĩngũtheesya kĩtei.”—Luka 5:4, 5.

Yĩla mekisye itei syoo, nĩmakwatisye makũyũ maingĩ mũno nginya itei syoo syambĩĩa kũtwʼĩkanga! Nũndũ wa ũu, nĩmeetie na mĩtũkĩ atei angĩ ma makũyũ ala maĩ vakuvĩ namo moke na ĩsiwa yoo mamatetheesye. Ĩtina wa ndatĩka mbũthũ, masiwa asu elĩ nĩmausũie makũyũ nginya mambĩĩa kũvota kĩwʼũnĩ. Yĩla Vetelo woonie ũu, nĩwatulilye ndu mbee wa Yesũ na amwĩa: “Uma vaa nĩĩ, Mwĩaĩi, nũndũ nĩ mwene naĩ.” Ĩndĩ Yesũ amwĩa: “Eka kwĩthĩwa na wia. Kuma yu ũkakwatasya andũ me thayũ.”—Luka 5:8, 10.

Ĩtina wa vau, Yesũ eeie Vetelo na Endelea atĩĩ: “Ngatĩĩai, nakwa ngamũtwʼĩkĩthya atei ma andũ.” (Mathayo 4:19) O na nĩweetie atei angĩ elĩ ma makũyũ, namo nĩ Yakovo na Yoana, ana ma Sevetii. O namo nĩmamũatĩĩie o saa isu. Amanyĩwʼa asu me ana nĩmatiie wĩa woo wa kũtea makũyũ na meethĩwa ne mo amanyĩwʼa ma mbee kũtavanasya na Yesũ kĩla ĩvinda.