Yesũ Nĩwavoisye Kamwana Kaĩ na Ndaimoni

Ĩtina wa Yesũ, Vetelo, Yakovo, na Yoana kũtheea kuma kĩĩmanĩ, nĩmeethĩie ĩkomano ĩnene ya andũ yũmbanĩte. Ĩndĩ ve ũndũ ũte mũseo watumĩte ĩkomano yĩu yũmbana. Aandĩki maũngeme mathyũlũlũkĩte amanyĩwʼa, na makwete kũkananĩa namo. Andũ ala maĩ vau vakuvĩ nĩmatanie mũno yĩla moonie Yesũ, na masemba makamũkethye. Yesũ amakũlilye atĩĩ: “Mwĩneenanĩasya kyaũ namo?”—Maliko 9:16.

Mũndũ ũmwe waĩ ĩkomanonĩ yĩu nĩwatulilye ndu mbee wa Yesũ na amwĩa: “Mũmanyĩsya, nĩngũeteie mwana wakwa nũndũ e na veva ũtumaa ataneena. Yĩla veva ũsu wamũkwata, nũmũvalũkasya nthĩ na ayumwa nĩ ĩvũyũ kanywʼanĩ, aivevetanyʼa maeo, na aithela vinya. Nĩnĩmakũlilye amanyĩwʼa maku mawumye, ĩndĩ mainatonya kwĩka ũu.”—Maliko 9:17, 18.

Veonekana aandĩki makwete kũneenea amanyĩwʼa naĩ nũndũ nĩmaemetwe nĩ kũvosya kamwana. Na no ĩthĩwa aandĩki asu mathekeeaa amanyĩwʼa nũndũ wa kũtata mavosye kamwana kau na vaemela. Kwoou vandũ va Yesũ kũneena na ĩthe wa kamwana kau, ũla waĩ na kĩmako, aneenie na ĩkomano akyasya: “Inywʼĩ nzyawa ĩte mũĩkĩĩo na nthyoeku, ngaendeea kwĩthĩwa nenyu ĩvinda yĩana ata? Nĩendeea kũmũmĩĩsya nginya ĩndĩĩ?” Vate nzika, ndeto isu Yesũ waneenie syakonetye aandĩki ala maneeneaa amanyĩwʼa ma Yesũ maũndũ mathũku ate vo. Ĩtina wa Yesũ kũneena ndeto isu nĩwavĩndũkĩie ĩthe wa kala kamwana na amwĩa: “Mũetei vaa nĩĩ.”—Mathayo 17:17.

Kamwana kau kaendete vala ve Yesũ, ndaimoni ĩsu nĩyakavalũkilye nthĩ na yakathingithangya na vinya mũno. Ke vau nthĩ kaendeeie kwiliita na kumya ĩvũyũ kanywʼanĩ wako. O kaendeee kwiliita, Yesũ akũlilye ĩthe wako atĩĩ: “Kethĩĩtwe kaikwatwa nĩ ũndũ ũũ kwa ĩvinda yĩana ata?” Asũngĩie asya: “Kuma ke o kana kanini, na mavinda maingĩ nũkekasya mwakinĩ o na kĩwʼũnĩ nĩ kana ũkoae.” Mũndũũme ũsu amwĩsũvie Yesũ amwĩa: “Ethĩwa nũtonya kwĩka ũndũ, twĩwʼĩe tei na ũitũtetheesya.”—Maliko 9:21, 22.

Ĩthe wa kamwana kau atũlĩkĩte ngoo mũno nũndũ amanyĩwʼa ma Yesũ nĩmaemetwe nĩ kũkavosya. Ĩtina wa mũndũũme ũsu kũmwĩsũva Yesũ avosye mwanae, Yesũ amwĩkĩie vinya kwa kũmwĩa atĩĩ: “Atĩ wĩasya, ‘Ethĩwa nũtonya’! Maũndũ onthe nĩmatonyeka kwa ũla wĩ na mũĩkĩĩo.” Na vau kwa vau ĩthe wa kana kau aneena na wasya mũnene na amwĩa: “Nĩ na mũĩkĩĩo! Ndetheesye vala nde na mũĩkĩĩo!”—Maliko 9:23, 24.

Yesũ nĩwoonie ĩkomano yĩsembete yelekele vala ũĩ. Andũ onthe masyaĩĩsye, Yesũ nĩwakanisye ĩla ndaimoni ayasya: “We veva ũtumaa mũndũ ataneena na atewʼa, nĩngũkwĩaĩa, uma nthĩnĩ wako na ndũkaakalike ĩngĩ!” Veva ũsu ũyuma kamwananĩ kau, watumie kakaya na wasya mũnene na wakathingithangya mavinda maingĩ na wakatia kailye ta kakwʼũ. Yĩla andũ moonie ũu, aingĩ mambĩĩie kwasya: “Nĩ kakwʼũ!” (Maliko 9:25, 26) Ĩndĩ yĩla Yesũ wakwatie kamwana kau kwʼoko, nĩkookĩlile na “kavoa saanĩ o ũsu.” (Mathayo 17:18) Ĩkomano yĩla yaĩ vau nĩyasengʼiwʼe mũno nĩ kĩla Yesũ weekie.

Mbeenĩ, yĩla Yesũ watũmie amanyĩwʼa make makatavanyʼe, nĩmaumisye ndaimoni. Nũndũ wa ũu, mesa kũvika nyũmba mamũkũlilye Yesũ atĩĩ: “Nĩkĩ tũemiwe nĩ kũwumya?” Yesũ ameie kana maemiwe nĩ kumya ndaimoni ĩsu nũndũ wa kwĩthĩwa mate na mũĩkĩĩo. Ameie atĩĩ: “Veva wa mũthemba ũũ ũtonya kumwʼa kwĩsĩla o mboya.” (Maliko 9:28, 29) Amanyĩwʼa maaĩle kwĩthĩwa na mũĩkĩĩo mũlũmu na kũvoya Ngai amanenge vinya wa kumya ndaimoni ĩsu yaĩ na vinya mwingĩ.

Yesũ aminĩĩie kwa kũmea: “Nĩ wʼo nĩngũmwĩa, ta kethĩwa mwĩ na mũĩkĩĩo wĩana mbeũ ya kalatali, no mwĩe kĩĩma kĩĩ, ‘Uma vaa ũthi vaya,’ na kĩyuma, na vaiĩ ũndũ ũmũema.” (Mathayo 17:20) Mũĩkĩĩo nũtumaa maũndũ manene mũno mekĩka!

Mathĩna na maũndũ maito ala tũkomanaa namo tũimũthũkũma Yeova no moneke matathela na me manene mũno ta kĩĩma. Ĩndĩ, tweethĩwa na mũĩkĩĩo mũlũmu no tũsinde mathĩna asu.