Atũmwa Nĩmambĩĩe Ĩngĩ Kwĩmanthĩa Ũnene

Yesũ na amanyĩwʼa make maiminĩĩa kyalo kyoo kĩsionĩ kya Velea maendete Yelusaleme, nĩmaingie Ũsĩ wa Yolotani vakuvĩ na Yeliko. Maendanĩtye na andũ angĩ kwondũ wa Vasaka ya mwaka wa 33 ĩtina wa Klĩsto.

Yesũ aĩ mbee wa amanyĩwʼa make e na kĩeleelo kya kũvika ndũanĩ ĩsu ate mũselee kwondũ wa Vasaka. Ĩndĩ amanyĩwʼa maĩ na wia. Ĩvinda ĩkuvĩ ĩvĩtu, yĩla Lasalo wakwie na Yesũ avanga kuma Velea athi Yutia, Thoma eeie amanyĩwʼa ala angĩ atĩĩ: “O naitũ tũthi, nĩ kana tũkakwʼe vamwe nake.” (Yoana 11:16, 47-53) Kwoou kũthi Yelusaleme kwaĩ kũtonya kũete mũisyo, na kĩu nĩkĩtonya kwĩthĩwa nekyo kyatumaa amanyĩwʼa methĩwa na wia.

Nĩ kana amombanyʼe kwondũ wa maũndũ ala mesaa kwĩkĩka, Yesũ eetie atũmwa make nzama na amea atĩĩ: “Twambatĩte Yelusaleme na Mwana wa mũndũ akanenganwe mokonĩ ma anene ma athembi na aandĩki. Makamũsilĩla kũawa na maimũnengane kwa andũ ma mbaĩ ingĩ nĩ kana mamũthekeee na maimũvũa na maimũaĩa mũtĩnĩ; na mũthenya wa katatũ aithayũũkwʼa.”—Mathayo 20:18, 19.

Yĩu nĩyo yaĩ ĩvinda ya katatũ ya Yesũ kũtavya amanyĩwʼa make ĩũlũ wa kĩkwʼũ na kũthayũũkwʼa kwake. (Mathayo 16:21; 17:22, 23) Ĩndĩ ĩvindanĩ yĩu ya katatũ, nĩwamatavisye kana aĩ oaĩwe mũtĩnĩ. O na kũtwʼĩka nĩmamwĩthukĩĩsye, mayaaelewa ũndũ wamatavasya. Nĩmatonya kwĩthĩwa moonaa Yesũ ta ũkũtũngĩĩa ũsumbĩ wa Isilaeli ĩũlũ wa nthĩ na kwoou maitanĩa ũnene na ndaĩa ũsumbĩnĩ ũsu vaa ĩũlũ wa nthĩ vamwe na Klĩsto.

Salome, ũla ũtonya kwĩthĩwa aĩ inyia wa Yakovo na Yoana, ala maĩ atũmwa, aĩ ũmwe wa andũ ala maĩ kyalonĩ kĩu. Yesũ aĩ anengete atũmwa asu elĩ ĩsyĩtwa yĩla ũalyũlo wayo nĩ “Ana ma Kĩtundumo.” Vate nzika, ametie ũu nũndũ maĩ aũme me kĩthito kingĩ. (Maliko 3:17; Luka 9:54) Kwa ĩvinda yĩana ũna, atũmwa asu me elĩ nĩmeethĩĩtwe na wendi wa kwĩthĩwa me anene Ũsumbĩnĩ wa Klĩsto. Inyia woo nĩweesĩ ũndũ ũsu. Kwondũ wa ũu, nĩwaendie vala ve Yesũ, amũtulĩlya ndu na amũkũlya eke ũndũ kwondũ wa ana make. Yesũ amũkũlilye: “Wĩenda kyaũ?” Nake amũsũngĩa: “Ĩka kwasya kana ana aa makwa elĩ makekala ũmwe kwʼokonĩ kwaku kwa aũme na ũla ũngĩ kwʼokonĩ kwaku kwa aka Ũsumbĩnĩ waku.”—Mathayo 20:20, 21.

Ngewa ĩsu yaumanĩte na Yakovo na Yoana. Yesũ aĩ anaelesya ĩũlũ wa maũndũ me nthoni ala maĩ mamũkwate, na kwoou amea atĩĩ: “Mũyĩsĩ kĩla mũũvoya. Nĩmũtonya kũnywʼa kĩkombe kĩla nĩkilyĩ kũnywʼa?” Namo mamwĩa: “Nĩtũtonya.” (Mathayo 20:22) Nĩvatonyeka ũkethĩa atũmwa asu mayaaelewa vyũ ũndũ ndeto isu syoonanasya.

O na vailye ũu, Yesũ ameie: “Mũitĩa kũnywʼa kĩkombe kyakwa, ĩndĩ kwĩkala kwʼokonĩ kwakwa kwa aũme na kwʼokonĩ kwakwa kwa aka ti ĩũlũ wakwa kũnengane, ĩndĩ vakekala ala maseũvĩwʼe nĩ Asa wakwa.”—Mathayo 20:23.

Yĩla atũmwa ala angĩ ĩkũmi mamanyie ũndũ ũla Yakovo na Yoana makũlĩtye, nĩmamathatĩie mũno. Yo noĩthwa Yakovo na Yoana nemo maĩ na wasya mũno nthĩnĩ wa ngananĩo ila atũmwa maĩ nasyo ĩũlũ wa nũũ ũla mũnene katĩ woo? (Luka 9:46-48) Methĩwe nĩmo kana ti mo, ũndũ ũla mamũkũlĩtye Yesũ woonanisye kana onthe me Ĩkũmi na Elĩ mayatũmĩĩte ũkanyʼo ũla Yesũ wamanengete ĩũlũ wa kĩla ũmwe kwĩkua tawe mũnini. Wendi woo wa kwĩthĩwa anene waĩ o vo.

Yesũ nĩwatwie kũmina ngananĩo isu vamwe na thĩna ũla syaumĩlĩtye. Kwoou nĩweetie ala Ĩkũmi na Elĩ na amanenga ũkanyʼo kwa nzĩa ya wendo, aimea: “Nĩmwĩsĩ kana ala matalawa ta masumbĩkĩte andũ ma mbaĩ ingĩ nĩmenenevasya, na ala me na ũkũmũ nĩmavinyĩĩaa ala angĩ. Inywʼĩ mũyaĩle kwĩthĩwa mũilye ũu; ĩndĩ mũndũ o na wĩva ũla ũkwenda kwĩthĩwa e mũnene katĩ wenyu aĩle kwĩthĩwa e mũthũkũmi wenyu, na mũndũ o na wĩva ũla ũkwenda kwĩthĩwa e mbee katĩ wenyu aĩle kwĩthĩwa e ngombo ya onthe.”—Maliko 10:42-44.

Yesũ nĩwamatavisye kana maaĩle kũatĩĩaa ngelekanyʼo yake mwene. Ameie atĩĩ: “Mwana wa mũndũ [ndaaũka] kũthũkũmwa, ĩndĩ kũthũkũma na kũnengane thayũ wake wĩthĩwe wovosyo kwondũ wa aingĩ.” (Mathayo 20:28) Kwa myaka ĩtatũ, Yesũ eethĩĩtwe aithũkũma kwondũ wa angĩ. Na aĩ eke ũu nginya akwʼe kwondũ wa andũ! Amanyĩwʼa maaĩle kwĩthĩwa me na woni ta wa Klĩsto. Ũu nĩ kwasya kana maaĩle kwĩthĩwa na wendi wa kũthũkũma angĩ ĩndĩ ti kũthũkũmwa, mayĩkua ta anini ĩndĩ ti ta andũ me na ũnene.