Aisye atĩĩ: “Nĩ atanu ala mesĩ me na nzaa ya kĩ-veva, nũndũ Ũsumbĩ wa ĩtu nĩ woo. Nĩ atanu ala me na kĩmeto, nũndũ makakiakiwʼa. . . . Nĩ atanu ala me na nzaa na waũni wa ũlũngalu, nũndũ wendi woo ũkeanĩwʼa. . . . Nĩ atanu ala mathĩnawʼa kwondũ wa ũlũngalu, nũndũ Ũsumbĩ wa ĩtu nĩ woo. Tanai yĩla andũ meũmũumanga na kũmũthĩnyʼa . . . nũndũ wakwa. Tanai na mũyĩthĩwa na mũyo mwingĩ.”​—⁠Mathayo 5:​3-12.

Yesũ aisye kana andũ ala mesĩ kana me na nzaa ya kĩ-veva, na ala melilaa nũndũ wa naĩ syoo, vamwe na ala mamwĩsĩ na mamũthũkũmaa Ngai nĩmo methĩawa na ũtanu wa wʼo. O na ĩvinda yĩla meũmenwa kana kũthĩnwʼa nũndũ wa kwĩka kwenda kwa Ngai, maendeeaa kwĩthĩwa me atanu nũndũ nĩmesĩ kana maũndũ ala mekwĩka nĩmamũtanĩthasya Ngai, na kana akamaathima na kũmanenga thayũ wa tene na tene.