Nthoo Nini Vyũ ya Kĩevelania Ĩtonya Kũlũlũmĩĩlya Mũĩkĩĩo Waku

Yo no tũĩkĩĩe kana mawatho onthe ma Ngai makeanĩa? Yesũ aĩ na mũĩkĩĩo kana makeanĩa, na momanyĩsyo make nĩmatetheeisye ala mamwĩthukĩĩsye methĩwe na mũĩkĩĩo. Kwasisya ngelekanyʼo ĩmwe wanenganie Ũtavanyʼanĩ wa Kĩĩmanĩ, o tondũ vonanĩtwʼe ĩvukunĩ ya Mathayo 5:18: “Nũndũ nĩ wʼo nĩngũmwĩa, Mũvaka yĩla ĩtu na nthĩ ikavĩta, kũikavĩta kaũandĩko kamwe kana kaũkenyũsyo kamwe mĩaonĩ, mũvaka onthe meanĩwʼe.”

Nthoo ĩla nini vyũ ya Kĩevelania yĩtawa (yod), na nĩyo ya mbee nthĩnĩ wa Tetragrammaton. Tetragrammaton nĩ nthoo sya ĩsyĩtwa ĩtheu ya Ngai, Yeova.a O vamwe na ndeto na nthoo ila itũmĩĩtwe kũandĩka Mĩao ya Ngai, aandĩki na Avalisi moonaa kaũandĩko kana “kaũkenyũsyo kamwe” ke ka vata mũno.

Yesũ oonanasya kana waĩ ũndũ ũtonyeka ĩtu na nthĩ kũvĩta kwĩ o na kaũndũ kala kanini Mĩaonĩ kũlea kwĩanĩa. Ĩndĩ Maandĩko matũĩkĩĩthasya kana matu na nthĩ ĩno twĩkalaa ikekala tene na tene. (Savuli 78:69) Kwoou ndeto isu syoonanasya kana o na kaũndũ kala kanini vyũ ke Mĩaonĩ kakeanĩa.

We Yeova Ngai nĩwonaa tũmaũndũ tũla tũnini mĩaonĩ yake twĩ twa vata? Ĩĩ. Kwasũanĩa ũndũ ũũ: Aisilaeli ma tene manengetwe mwĩao wa kana mayaĩle kũtũla ĩvĩndĩ o na yĩmwe ya katena ka ĩlondu ka Vasaka. (Kuma 12:46) Ũndũ ũsu no woneke wĩ o kaũndũ kanini. Aisilaeli nĩmeesĩ nĩkĩ mataaĩle kũtũla ĩvĩndĩ o na yĩmwe ya katena kau? Noĩthwa mateesĩ. Ĩndĩ Yeova Ngai nĩweesĩ kana kaũndũ kau kaĩ wathani ũla woonanasya kana vai ĩvĩndĩ o na yĩmwe ya Masia yĩkatũlwa ĩla ũkoaĩwa mũtĩnĩ wa mathĩna.—Savuli 34:20; Yoana 19:31-33, 36.

Ndeto ila Yesũ waneenie syĩtũmanyĩsya kyaũ? No twĩthĩwe na mũĩkĩĩo mũlũmu kana mawatho onthe ma Yeova makeanĩa, nginya o na tũmaũndũ tũla tũnini vyũ. Vai nzika kana nthoo ĩla nini vyũ ya Kĩevelania nĩtonya kũlũlũmĩĩlya mũĩkĩĩo waku!